ແຂວງນີງທ້ວນ, ແມ່ນແຂວງແຄມທະເລທາງທິດໃຕ້ພາກກາງ ຫວຽດນາມ, ແມ່ນທ້ອງຖິ່ນຖືກຜົນສະທ້ອນຈາກໄພແຫ້ງແລ້ງໜັກໜ່ວງທີ່ສຸດໃນທົ່ວປະເທດ. ໃນຊຸມປີມໍ່ໆມານີ້, ຍ້ອນຜົນສະທ້ອນຂອງວິວັດການຫັນປ່ຽນຈາກດິນຟ້າອາກາດ, ສະພາບໄພແຫ້ງແລ້ງນັບມື້ນັບຮ້າຍແຮງກ່ວາ, ສົ່ງຜົນສະທ້ອນເຖິງການຜະລິດກະສິກຳ ແລະ ຊີວິດການເປັນຢູ່ຂອງຊາວກະສິກອນ. ເພື່ອສະກັດກັ້ນບັນດາຜົນກະທົບທີ່ຫຍໍ້ທໍ້ຈາກໄພພິບັດທຳມະຊາດ, ຂະແໜງກະສິກຳແຂວງ ນີງທ້ວນ ພວມຊີ້ນຳພໍ່ແມ່ປະຊາຊົນຊາວກະສິກອນຫັນປ່ຽນຜົນລະປູກໃຫ້ເໝາະສົມ, ເພື່ອບັນລຸປະສິດທິຜົນເສດຖະກິດສູງ. ບົດຂຽນຂອງ ກາວທວາ, ນັກຂ່າວ VOV.
ຮູບແບບປູກໝາກຖົ່ວຂຽວຢູ່ນີງທ້ວນ
(ພາບ: Việt Quốc)
ໂດຍນອນໃນເຂດໄດ້ຮັບຜົນປະໂຫຍດຈາກອ່າງເກັບນ້ຳ ເຟື໋ອກຈູງ, ແຕ່ເຫັນວ່າປູກເຂົ້າຈະບໍ່ນຳມາເຊິ່ງໝາກຜົນໃນເງື່ອນໄຂຖືກແຫ້ງແລ້ງ, ລະດູໜາວຕໍ່ລະດູບານໃໝ່ປີ 2016, ອ້າຍ ກາວບັກ, ຢູ່ບ້ານ ໝີຮຽບ, ຕາແສງ ໝີເຊີນ, ເມືອງ ນີງເຊີນ, ໄດ້ຫັນປ່ຽນເນື້ອທີ່ປູກເຂົ້າ 3 ໄລ່ມາປູກຖົ່ວຂຽວຕາມຮູບການກະເສດສຸມ. ໃນລະດູການທຳອິດຂອງຄອບຄົວອ້າຍວັກ ເກັບກ່ຽວໝາກຖົ່ວຂຽວໄດ້ 600 ກ່ວາກີໂລກຼາມ. ປະຈຸບັນ, ຄອບຄົວອ້າຍ ວັກ ພວມເກັບກ່ຽວລະດູການທີ 2. ອ້າຍ ກາວວັກ, ໃຫ້ຮູ້ວ່າ:
“ປີນີ້, ຍ້ອນຂາດນຳ້ດັ່ງນັ້ນໃນເນື້ອທີ່ດິນໄລ່ໜຶ່ງກໍ່ສາມາດເກັບກ່ຽວໝາກຖົ່ວຂຽວໄດ້ 150 ກີໂລກຼາມ. ຖ້າຫາກມີນຳ້ຫົດຢ່າງພຽງພໍແມ່ນຈະເກັບໄດ້ 200 ກີໂລກຼາມ. ເວົ້າລວມແລ້ວ, ຖ້າຫາກປູກເຂົ້າຈະບໍ່ໄດ້ຮັບຜົນຄືປູກຖົ່ວຂຽວ.”
ຢູ່ຕາແສງ ຍີ້ຮ່າ, ເມືອງ ທ້ວນນາມ, ເລື່ອງຫັນປ່ຽນເນື້ອທ່ີດິນປູກເຂົ້າກ່ວາ 40 ha ມາປູກຖົ່ວຂຽວໃນລະດູໜາວຕໍ່ລະດູບານໃໝ່ ໄດ້ນຳເອົາລາຍຮັບພໍສົມຄວນມາໃຫ້ຊາວກະສິກອນ. ນີ້ແມ່ນຄັ້ງທຳອິດປະຕິບັດການປູກຖົ່ວຂຽວ ດັ່ງນັ້ນພໍ່ແມ່ປະຊາຊົນບໍ່ທັນເອົາໃຈໃສ່ເຖິງການໝູນໃຊ້ວິທະຍາສາດເຕັກໂນໂລຢີ, ແຕ່ສະມັດຕະພາບຍັງບັນລຸລະດັບສູງກ່ວາແມ່ນ 150 ກີໂລກາມ/ໄລ່. ທ່ານນາງ ຫວໍຍືເຊີນ, ປະທານຄະນະກຳມະການປະຊາຊົນຕາແສງ ຍິຮ່າ, ເມືອງ ທ້ວນນາມ, ແຂວງ ນີງທ້ວນ, ໃຫ້ຮູ້ວ່າ:
“ຮອດຈຸດເວລານີ້ໃນເຂດຫັນປ່ຽນຜົນລະປູກຍັງບໍ່ທັນບັນລຸສະມັດຕະພາບສູງປານໃດ, ແຕ່ສາມາດແກ້ໄຂດ້ານເສດຖະກິດຊົ່ວຄາວໄດ້ສ່ວນໃດສ່ວນໜຶ່ງໃນໄລຍະຖືກແຫ້ງແລ້ງ. ຫວັງວ່າ, ໄລຍະຈະມາເຖິງ, ຂະແໜງກະສິກຳຈະຊ່ວຍເຫຼືອທ້ອງຖິ່ນດ້ານເຕັກນິກເພື່ອໃຫ້ພໍ່ແມ່ປະຊາຊົນບົວລະບັດ, ປູກຖົ່ວຂຽວນຳມາເຊິ່ງປະສິດທິຜົນດ້ານເສດຖະກິດສູງ, ສືບຕໍ່ຂະຫຍາຍຮູບແບບປູກໝາກຖົ່ວຂຽວໃນເນື້ອໃນດິນປູກເຂົ້າ”
ພາບປະກອບ
ຜົນງານໃນເບື້ອງຕົ້ນຂອງການຫັນປ່ຽນເນື້ອທີ່ປູກເຂົ້າມາປູກຖົ່ວຂຽວຢູ່ທ້ອງຖິ່ນຕ່າງໆໄດ້ສະແດງໃຫ້ເຫັນວ່າ: ນີ້ແມ່ນແນວພັນປູກທີ່ມີຄວາມສາມາດທົນທານກັບໄພແຫ້ງແລ້ງໄດ້ດີ ແລະ ບົວລະບັດໄດ້ຢ່າງງ່າຍດາຍ. ຖ້າຫາກໝູນໃຊ້ວິທະຍາສາດເຕັກນິກເຂົ້າໃນການປູກຝັງນັ້ນ, ໝາກຖົ່ວຂຽວສາມາດບັນລຸສະມັດຕະພາບໄດ້ 280 ກີໂລກາມ/ໄລ່. ພ້ອມກັນນັ້ນ, ໝາກຖົ່ວຂຽວກໍ່ມີຕະຫຼາດບໍລິໂພກເປັນປົກກະຕິ. ດັ່ງນັ້ນ, ເລື່ອງຫັນປ່ຽນເນື້ອທີດິນປູກເຂົ້າ ມາປູກຖົ່ວຂຽວໃນລະດູໜາວຕໍ່ລະດູບານໃໝ່ໄດ້ຮັບຖືວ່າເໝາະສົມກັບລະດູການ ແລະ ຕະຫຼາດ. ທ່ານ ເຈີ່ນກວກນາມ, ຮອງປະທານຄະນະກຳມະການປະຊາຊົນແຂວງ ນີງທ້ວນ, ໃຫ້ຮູ້ວ່າ:
“ນີ້ແມ່ນລະດູການທຳອິດທີ່ພໍ່ແມ່ປະຊາຊົນຊາວກະສິກອນປະຕິບັດການຫັນປ່ຽນຜົນລະປູກຕາມທິດຮັບມືກັບໄພແຫ້ງແລ້ງ, ປະຢັດນຳ້ ແລະ ໃນເບື້ອງຕົ້ນໄດ້ປ່ຽນແປງສະຕິຄວາມຮູ້ຂອງພໍ່ແມ່ປະຊາຊົນ. ດ້ວຍຜົນງານໃນເບື້ອງຕົ້ນຄືແນວນັ້ນ, ໃນລະດູການຕໍ່ໄປພວກຂ້າພະເຈົ້າຈະສືບຕໍ່ສຸມໃສ່ຊີ້ນຳພໍ່ແມ່ປະຊາຊົນຕອບສະໜອງ ແລະ ຫັນປ່ຽນຜົນລະປູກເພື່ອຮັບມືກັບໄພແຫ້ງແລ້ງ, ມີປະສິດທິຜົນ, ແນ່ນອນວ່າສະມັດຕະພາບຈະເພີ່ມຂຶ້ນ.”
ໃນລະດູໜາວຕໍ່ລະດູບານໃໝ່ປີນີ້, ຊາວກະສິກອນແຂວງ ນີງທ້ວນ ຜັນຂະຫຍາຍການປູກ 3 ປະເພດຜົນລະປູກຕົ້ນຕໍນັ້ນແມ່ນ: ສາລີ, ຖົ່ວຂຽວ ແລະ ຫຍ້າຮັບໃຊ້ການລ້ຽງສັດ, ໃນນັ້ນ, ຖົ່ວຂຽວກວມເນື້ອທີ່ດິນສ່ວນຫຼາຍ. ໄພແຫ້ງແລ້ງນັບມື້ນັບຮ້າຍແຮງ, ດັ່ງນັ້ນ, ບັນດາທ້ອງຖິ່ນຂອງແຂວງ ນີງທ້ວນ ພວມຄິດໄລ່ຊັ່ງຊາເຖິງຄວາມສາມາດສະໜອງນຳ້ຫົດສຳລັບແຕ່ລະເຂດ ແລະ ດຳເນີນການວາງແຜນກຳນົດເນື້ອທີ່ດິນປູກພືດແຕ່ລະປະເພດເພື່ອສະກັດກັ້ນສະພາບການປະປ່ອຍດິນເປົ່າວ່າງ.