(vovworld) - ປີນີ້, ພາຍຫຼັງ 2 ປີ ແຫ່ງການປະຕິບັດໂຄງການຈຸດໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່, ແຂວງນິງບິ່ງ ພວມສູ້ຊົນເພື່ອເຮັດໃຫ້ 100% ຈຳນວນຕາແສງວາງແຜນ ກຳນົດຊົນນະນະບົດໃໝ່ສຳເລັດ ແລະ ເຖິງປີ 2015 ຈະມີ 25 ຕາແສງບັນລຸມາດຕະຖານຊົນນະບົດໃໝ່. ເພື່ອປະຕິບັດສຳເລັດຈຸດໝາຍນີ້, ຄະນະກຳມະການປະຊາຊົນແຂວງນິງບິ່ງ ໄດ້ກຳນົດວ່າ ໜຶ່ງໃນບັນດາໜ້າທີ່ສຳຄັນແມ່ນວຽກງານໂຄສະນາ ເພື່ອສ້າງຄວາມເຫັນດີເຫັນພ້ອມໃນໝູ່ປະຊາຊົນ.
ກອງປະຊຸມຕີລາຄາກ່ຽວກັບການກໍ່ສ້າງຊົນນະບົດໃໝ່ຢູ່ແຂວງນິງບິ່ງ
(ພາບ: google.com.vn)
ໂຄງການຈຸດໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່ໄດ້ ແລະ ພວມກາຍເປັນຂະບວນການແຂ່ງຂັນຢ່າງຟົດຟື້ນຢູ່ຫຼາຍທ້ອງຖີ່ນໃນແຂວງນິງບິ່ງ. ພ້ອມກັບການຜັນຂະຫຍາຍການລົງທຶນກໍ່ສ້າງບັນດາກິດຈະກຳພື້ນຖານໂຄງລ່າງ, ອຳນາດການປົກຄອງທຸກຂັ້ນໄດ້ຈັດຕັ້ງການໂຄສະນາກ່ຽວກັບການກໍ່ສ້າງຊົນນະບົດໃໝ່ ດ້ວຍຫຼາຍຮູບການທີ່ອຸດົມສົມບຸນຄື: ຜ່ານນັກປາຖະກະຖາ, ຈັດຕັ້ງຊຸດອົບຮົມກໍ່ສ້າງຖັນແຖວພະນັກງານທີ່ເຮັດງຽກງານໂຄສະນາ, ຜ່ານລະບົບສື່ສານໄປສູ່ບັນດາບ້ານຕາແສງ. ຈາກນັ້ນປະຊາຊົນຈະມີຄວາມເຂົ້າໃຈແຈ້ງກ່ຽວກັບໜ້າທີ່ຮັບຜິດຊອບຂອງຕົນໃນການກໍ່ສ້າງຊົນນະບົດໃໝ່. ພ້ອມກັບການໂຄສະນາ, ວຽກງານກໍ່ສ້າງບັນດາກິດຈະກຳໂຄງລ່າງຄືໂຮງຮຽນ, ຫໍວັດທະນະທຳ, ທາງເບຕົງ… ໄດ້ເຮັດໃຫ້ໂສມໜ້າຊົນນະບົດຢູ່ແຂວງນິງບິ່ງຈຶ່ງມີການປ່ຽນແປງ. ທ່ານ Le Ngoc Oanh, ຫົວໜ້າຄະນະໂຄສະນາສຶກສາຄະນະພັກເມືອງຮວາລື. ໃຫ້ຂໍ້ສັງເກດວ່າ:
”ໃນເບື້ອງຕົ້ນວຽກງານໂຄສະນາໄດ້ສ້າງບັນຍາກາດອັນຟົດຟື້ນມ່ວນຊື່ນ, ກໍ່ຄືຄວາມເຊື່ອໝັ້ນຕໍ່ປະຊາຊົນໃນການຜັນຂະຫຍາຍປະຕິບັດ ການກໍ່ສ້າງຊົນນະບົດໃໝ່. ປະຈຸບັນ, ບັນດາຕາແສງໃນເມືອງໄດ້ ແລະ ພວມສ້າງແຜນສັງລວມ ແລະ ແຜນຮ່າງກໍ່ສ້າງຊົນນະບົດໃໝ່ໃຫ້ສົມບູນ ຕາມການຊີ້ນຳຂອງສູນກາງ ແລະ ຂອງແຂວງ, ອັນໄດ້ບັນລຸໝາກຜົນໃນເບື້ອງຕົ້ນ”.
ແຂວງນິງບິ່ງ ໄດ້ຕັ້ງໜ້າໂຄສະນາ ດ້ວຍຫຼາຍຮູບການເຊັ່ນ: ໂຄສະນາຜ່ານບັນດາພາຫະນະສື່ມ່ວນຊົນ, ແຈກຢາຍເອກະສານໂຄສະນາກ່ຽວກັບການກໍ່ສ້າງຊົນນະບົດໃໝ່ໃນບໍລິເວນແຂວງ; ນຳເອົາເນື້ອໃນກໍ່ສ້າງຊົນນະບົດໃໝ່ເຂົ້າກອງປະຊຸມຕ່າງໆຂອງອົງຄະນະພັກ, ອຳນາດການປົກຄອງ, ອົງການຈັດຕັ້ງມະຫາຊົນທຸກຂັ້ນ ເພື່ອແນໃສ່ຂົນຂວາຍ, ໂຄສະນາກ່ຽວກັບໂຄງການກໍ່ສ້າງຊົນນະບົດໃໝ່. ຈັດຕັ້ງກວ່າ 700 ກອງປະຊຸມ ຈາກຂັ້ນແຂວງຕະຫຼອດຮອດຂັ້ນເມືອງ, ຕາແສງ ເພື່ອ ໂຄສະນາ, ເຜີຍແຜ່, ຊີ້ນຳ, ແນະນຳການປະຕິບັດ… ທ່ານ ເຈືອງກົ໋ງຮ່ວາ (Truong Cong Hoa), ປະທານຄະນະກຳມະການປະຊາຊົນເມືອງຢາວຽນ (Gia Vien), ຖືວ່າ ຕ້ອງມີຄວາມຮັບຮູ້ຢ່າງຄົບຖ້ວນຈາກອຳນາດການປົກຄອງເຖິງໝູ່ມະຫາຊົນ ກ່ຽວກັບໂຄງການຈຸດໝາຍແຫ່ງຊາດໃນການກໍ່ສ້າງຊົນນະບົດໃໝ່. ເພື່ອປະຕິບັດສິ່ງດັ່ງກ່າວໃຫ້ໄດ້ນັ້ນ, ວຽກງານໂຄສະນາຕ້ອງດຳເນີນກ່ອນບາດກ້າວໜຶ່ງ, ດ້ວຍວິທີການທີ່ເໝາະສົມກັບແນວຄິດຈິດໃຈ ແລະ ຜົນປະໂຫຍດຂອງຊາວທ້ອງຖີ່ນ, ໃນນັ້ນ, ບັນດາຂະບວນການແຂ່ງຂັນຄວນວາງອອກຈຸດໝາຍ ແລະ ວຽກງານອັນລະອຽດ. ທ່ານ ເຈືອງກົ໋ງຮ່ວາ (Truong Cong Hoa) ແບ່ງປັນວ່າ:
”ຕ້ອງໂຄສະນາເປັນປະຈຳ ເພື່ອໃຫ້ປະຊາຊົນເຂົ້າໃຈໄດ້ວ່າ ຕົນເອງຕ້ອງເຮັດຫຍັງຄື ປະກອບກຳລັງເຫື່ອແຮງ, ປະກອບທຶນ, ທີ່ດິນ… ແລະ ເຂົາເຈົ້າຕ້ອງມີຄວາມຮັບຜິດຊອບໃນການກໍ່ສ້າງຊົນນະບົດໃໝ່ໂດຍມີການໜູນຊ່ວຍຂອງລັດ”
(ພາບປະກອບ: google.com.vn)
ທ່ານ ຟານຕ໋ຽນຢຸງ (Phan Tien Dung), ຫົວໜ້າຄະນະໂຄສະນາສຶກສາຄະນະພັກແຂວງ ນິງບິ່ງ ໃຫ້ຮູ້ວ່າ, ໃນປີຜ່ານມາ ມີນັກປາຖະກະຖາ 2000 ຄົນໄດ້ຮັບການອົບຮົມກ່ຽວກັບ 19 ມາດຕະຖານອັນລະອຽດຂອງໂຄງການກໍ່ສ້າງຊົນະບົດໃໝ່. ສຳຫຼັບແຂວງນິງບິ່ງ, ຍາມໃດກໍ່ເປັນເຈົ້າການໃນວຽກງານໂຄສະນາ ດ້ວຍເນື້ອໃນທີ່ມີຫົວຄິດປະດິດສ້າງ ເພື່ອໃຫ້ປະຊາຊົນເຂົ້າໃຈງ່າຍ, ຈື່ງ່າຍ ບັນດາມາດຕະຖານໃນການກໍ່ສ້າງຊົນນະບົດໃໝ່ ແລະ ປະກອບກຳລັງເຫື່ອແຮງ, ປະກອບທີ່ດິນເພື່ອກໍ່ສ້າງບັນດາກິດຈະກຳພື້ນຖານໂຄງລ່າງ. ທ່ານ ຟານຕ໋ຽນຢຸງ (Phan Tien Dung), ຖືວ່າ:
”ບັນຫາທີ່ພວກຂ້າພະເຈົ້າຖອດຖອນມາໄດ້ນັ້ນແມ່ນ ວຽກງານໂຄສະນາຕ້ອງເຮັດຄືແນວໃດໃຫ້ສັ້ນ, ກະທັດລັດ, ເຂົ້າໃຈງ່າຍ, ຈື່ງ່າຍ ເພື່ອໃຫ້ປະຊາຊົນສາມາດສຳພັດກັບເນື້ອໃນໂຄສະນາໃນບໍ່ວ່າເວລາໃດ, ເມື່ອຮັບຮູ້ໄດ້ແລ້ວ, ເຂົາເຈົ້າຈະມີຄວາມເຫັນດີເຫັນພ້ອມສູງກວ່າ ເພື່ອປະຕິບັດໂຄງການຈຸດໝາຍນີ້ໃຫ້ດີ”.
ຍ້ອນເອົາໃຈໃສ່ເປັນພິເສດເຖິງວຽກງານໂຄສະນາ, ມາຮອດປະຈຸບັນ, ນິງບິ່ງ ມີ 12/120 ຕາແສງບັນລຸໄດ້ແຕ່ 3 ເຖິງ 5 ມາດຕະຖານ; 65/120 ຕາແສງບັນລຸໄດ້ 9 ມາດຕະຖານ; 45/120 ຕາແສງ ບັນລຸໄດ້ແຕ່ 10 ເຖິງ 15 ມາດຕະຖານ ໃນຈຳນວນ 19 ມາດຕະຖານກ່ຽວກັບການກໍ່ສ້າງຊົນນະບົດໃໝ່. ນອກນັ້ນ, ທົ່ວແຂວງມີ 40 ຕາແສງ ດ້ວຍ 3000 ຄອບຄົວ ໄດ້ມອບທີດິນກວ່າ 14 ເຮັກຕາ ດ້ວຍມູນຄ່າເກືອບ 15 ຕື້ດົ່ງ ແລະ ເກືອບ 10.000 ຄອບຄົວຢູ່ 26 ຕາແສງປະກອບເງິນ, ວັດຖຸອຸປະກອນ, ກຳລັງເຫື່ອແຮງ ດ້ວຍມູນຄ່າເກືອບ 12 ຕຶ້ດົ່ງ ເພື່ອກໍ່ສ້າງບັນດາກິດຈະກຳຊົນນະບົດໃໝ່. ແຂວງນິງບິ່ງ ສູ້ຊົນເພື່ອເຮັດໃຫ້ທຸກຕາແສງປະຕິບັດສຳເລັດແຜນຮ່າງວາງແຜນກຳນົດຊົນນະບົດໃໝ່ໃນໄຕມາດທີ 2 ປີນີ້. ໃນເບື້ອງຕົ້ນວຽກງານໂຄສະນາໄດ້ສ້າງຄວາມເຫັນດີເຫັນພ້ອມໃນໝູ່ປະຊາຊົນ, ນີ້ແມ່ນບາດກ້າວທຳອິດເພື່ອໃຫ້ແຂວງນິງບິ່ງ ບັນລຸໄດ້ຜົນງານໃນການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່.