ໂດຍຕັ້ງຢູ່ເຂດບ້ານນາທີ່ມີຄວາມສະຫງົບສຸກ ມໍ່ກັບນະຄອນ ຍ່າຈ່າງ, ເຊິ່ງແມ່ນນະຄອນທ່ອງທ່ຽວທີ່ລືຊື່ຢູ່ພາກກາງຫວຽດນາມ ມີໝູ່ບ້ານບູຮານແຫ່ງໜຶ່ງທີ່ມີມາກ່ອນນີ້ 300 ປີ, ນັ້ນແມ່ນໝູ່ບ້ານຜະລິດເຄື່ອງເຄືອບດິນເຜົາ.
ລືເກິມ ໝາຍຄວາມວ່າ ເຕົາອົບເຄື່ອງເຄືອບດິນເຜົາ, ເຊິ່ງແມ່ນອາຊີບທີ່ມີມານັບແຕ່ບູຮານນະການຂອງປະຊາຊົນແຫ່ງນີ້. ພໍ່ຕູ້ ເຈິ່ນວັນບີ່ງ ຜູ້ທີ່ເຮັດອາຊີບຜະລິດເຄື່ອງເຄືອບດິນເຜົາຢູ່ໝູ່ບ້ານ ລືເກິມ, ໄດ້ເລົ່າສູ່ຟັງວ່າ:
”ອາຊີບຜະລິດເຄື່ອງເຄືອບດິນເຜົາ ໂດຍບັນດາລູກສິດຂອງບັນພະບຸລຸດຜູ້ສ້າງອາຊີບແມ່ນທ່ານ ດ່າວລືເງ໋ ນຳມາຈາກພາກເໜືອ ແລະ ສອນໃຫ້ຊາວບ້ານກ່ອນນີ້ປະມານ 250 ປີ. ໃນເມື່ອກ່ອນ, ອາຊີບນີ້ພັດທະນາຢາງແຂງແຮງ, ອັນໄດ້ເຮັດໃຫ້ປະຊາຊົນມີຊີວິດອີ່ມໜຳສຳລານ ແລະ ມີຄວາມຜາສຸກ.”
(ພາບ:http://yume.vn)
ປະຈຸບັນ, ປະຊາຊົນໃນໝູ່ບ້ານ ລືເກິມ ຍັງຄົງບູຊາບັນພະບຸລຸດຜູ້ສ້າງອາຊີບ ຕະກຸນດ່າວຢູ່. ວິຫານບູຊາບັນພະບຸລຸດຜູ້ສ້າງອາຊີບ ລືເກິມ ໃນເມື່ອກ່ອນພຽງແຕ່ແມ່ນຫໍບູຊານ້ອຍໆເທົ່ານັ້ນ, ຕໍ່ມາປະຊາຊົນໃນໝູ່ບ້ານໄດ້ບໍລິຈາກເງິນທອງ ແລະ ປະກອບເຫື່ອແຮງເພື່ອກໍ່ສ້າງເປັນວິຫານ. ປີ 1874, ບ້ານ ລືເກິມ ແຍກອອກຈາກໝູ່ບ້ານ ງອກວ້ານ, ນັບແຕ່ນັ້ນມາ ວິຫານບູຊາບັນພະບຸລຸດຜູ້ສ້າງອາຊີບ ລືເກິມ ກໍ່ໄດ້ຮັບການກໍ່ສ້າງຢ່າງໃຫຍ່ໂຕ ແລະ ສວຍງາມກວ່າ ກາຍເປັນສາລາບ້ານ ແລະ ຄົງຕົວມາຮອດປະຈຸບັນ. ແຕ່ລະປີຊາວບ້ານ ລືເກິມ ເຄີຍຈັດຕັ້ງພິທີບູຊາຢູ່ສາລາຂື້ນຢ່າງສົມກຽດ. ນີ້ກໍ່ແມ່ນໂອກາດເພື່ອພາວະນາຂໍໃຫ້ປະເທດຊາດມີຄວາມສະຫງົບ, ປະຊາຊົນມີຊີວິດທີ່ອີ່ມໜຳສຳລານ ແລະ ມີຄວາມຜາສຸກ. ທັງແມ່ນໂອກາດເພື່ອໃຫ້ລູກຫຼານບູຊາບັນພະບຸລຸດຜູ້ສ້າງອາຊີບ, ສະແດງໃຫ້ເຫັນຄວາມຮູ້ບຸນຄຸນທີ່ມີຕໍ່ບັນດາບັນພະບຸລຸດ, ເຊິ່ງແມ່ນຜູ້ທີ່ໄດ້ສ້າງ ແລະ ຮັກສາອາຊີບໄວ້ໃຫ້ແກ່ໝູ່ບ້ານ. ຢູ່ ລືເກິມ ມີໄລຍະໜຶ່ງຄອບຄົວໃດກໍ່ເຮັດອາຊີບຜະລິດເຄື່ອງປັ້ນດິນເຜົາ. ຈາກລຸ້ນຄົນນີ້ໄປຍັງລຸ້ນຄົນອື່ນ, ອາຊີບຜະລິດເຄື່ອງປັ້ນດິນເຜົານັບມື້ນັບມີຊື່ສຽງ… ຜະລິດຕະພັນຂອງໝູ່ບ້ານແມ່ນມີຫຼາຍປະເພດ ແລະ ໄດ້ຮັບຄວາມນິຍົມຊົມຊອບຈາກປະຊາຊົນເປັນຈຳນວນຫຼວງຫຼາຍ. ຍ້ອນມີສີມືການຊ່າງຂອງບັນດານັກສິລະປະກຳ ແລະ ຄວາມສາມາດຂອງນາຍຊ່າງຜະລິດເຄື່ອງເຄືອບດິນເຜົາ ຈາກດິນໜຽວ, ດິນດາກ ໄດ້ກາຍເປັນເຄື່ອງປັ້ນດິນເຜົາທັງມີລັກສະນະສິລະປະ, ທັງເປັນເຄື່ອງໃຊ້ສອຍທີ່ມີປະໂຫຍດໃນຊີວິດຂອງມະນຸດ. ຮອງສາສະດາຈານ - ປະລິຍາເອກ ຫງວຽນຂັກສື, ສະຖາບັນບູຮານຄະດີຫວຽດນາມ, ໃຫ້ຮູ້ວ່າ:
”ໃນວົງການນັກສະສົມຮຽບຮຽງເຄື່ອງປັ້ນດິນເຜົາ, ເຂົາເຈົ້າຮູ້ວ່າ ເຄື່ອງປັ້ນດິນເຜົາ ລືເກິມ ແມ່ນມີຫຼາຍປະເພດທີ່ສຸດ ມີທັງເຄື່ອງເຮັດເປັນວັດສະດຸກໍ່ສ້າງຄືດິນຈີ່, ດິນຂໍ, ເຄື່ອງໄຊ້ໄມ້ສອຍໃນຊີວິດປະຈຳວັນຄື: ໂຖ, ກວດ, ໝໍ້, ກາ, ນັບທັງບັນດາເຄື່ອງໃຊ້ໃນພິທີງານບຸນ… ຜະລິດຕະພັນຢູ່ທີ່ນີ້ບັນລຸມາດຕະຖານດ້ານເຕັກນິກສູງພໍສົມຄວນ ແລະເປັນເອກະລັກສະເພາະຂອງໝູ່ບ້ານອາຊີບ”.
(ພາບ:http://yume.vn)
ຍ້ອນມີຄວາມສະດວກສະບາຍທາງດ້ານຄົມມະນາຄົມ, ເຄື່ອງປັ້ນດິນເຜົາ ລືເກິມ ໄດ້ມີໜ້າຢູ່ທົ່ວທຸກແຫ່ງຫົນ. ປະຈຸບັນໄດ້ມີຫຼາຍໝູ່ບ້ານເຮັດອາຊີບນີ້, ແຕ່ຜະລິດຕະພັນຂອງໝູ່ບ້ານອາຊີບ ລືເກິມ ຍາມໃດກໍ່ໄດ້ຮັບຄວາມນິຍົມຊົມຊອບຈາກຜູ້ຊົມໃຊ້ຫຼາຍກວ່າໝູ່. ປະຈຸບັນ, ຍ້ອນວັດຖຸທີ່ຜະລິດເຄື່ອງໃຊ້ສອຍມີຫຼາຍ, ດັ່ງນັ້ນມີຫຼາຍຜະລິດຕະພັນຂອງໝູ່ບ້ານອາຊີບ ລືເກິມ ພຽງແຕ່ໄດ້ຮັບການຈາລຶກໄວ້ໃນຄວາມຊົງຈຳຂອງບັນດານັກສິລິປະກຳອາຍຸສູງເທົ່ານັ້ນ. ມີຫຼາຍຄອບຄົວໄດ້ຫັນໄປເຮັດອາຊີບອື່ນ, ດັ່ງນັ້ນ ໝູ່ບ້ານອາຊີບພວມມີໄພຈະຖືກສູນຫາຍໄປ. ເຖິງຢ່າງໃດກໍ່ຕາມ, ຍັງມີບັນດາຄອບຄົວພວມຮັກສາອາຊີບເຊິ່ງບັນພະບຸລຸດໄດ້ປະໄວ້ໃຫ້ຢູ່. ອ້າຍ ຮວີ່ງ, ຊາວໜຸ່ນຜູ້ໜຶ່ງໃນໝູ່ບ້ານ, ເວົ້າຄວາມໃນໃຈສູ່ຟັງວ່າ:
”ອາຊີບຜະລິດເຄື່ອງປັ້ນດິນເຜົາແມ່ນໄດ້ຮັບການສືບທອດຈາກລຸ້ນພໍ່ລຸ້ນອ້າຍ, ດັ່ງນັ້ນເຮົາຕ້ອງຮັກສາອາຊີບທີ່ເປັນມູນເຊື້ອໄວ້. ພໍ່ເຮົາເວົ້າວ່າ ບໍ່ໃຫ້ອາຊີບນີ້ສູນຫາຍໄປ. ປະຈຸບັນເຮັດອາຊີບນີ້ລຳບາກຫຼາຍ, ແຕ່ເຮົາຍັງນິຍົມເຮັດຢູ່, ດັ່ງນັ້ນຈຶ່ງພະຍາຍາມປ່ຽນໃໝ່ເພື່ອເຮັດໃຫ້ຜະລິດຕະພັນຂອງຕົນນັບມື້ນັບດີກວ່າ”.
ປະຈຸບັນ, ຢູ່ໝູ່ບ້ານອາຊີບ ລືເກິມ, ເຖິງວ່າບໍ່ມີກ່ຳປັ່ນເຂົ້າມາຂົນສົ່ງເຄື່ອງປັ້ນດິນເຜົາໄປທົ່ວທຸກແຫ່ງຢ່າງຄຶກໂຄມຄືໃນເມື່ອກ່ອນອີກ, ແຕ່ເມື່ອມາຢ້ຽມຢາມໝູ່ບ້ານ ລືເກິມ, ນັກທ່ອງທ່ຽວຍັງຄົງພົບເຫັນດິນເຜົາສີແດງຢູ່ທົ່ວທຸກແຫ່ງ, ບັນດາຜະລິດຕະພັນຂອງໝູ່ບ້ານອາຊີບ ລືກຳ ຍັງຄົງປະກົດຢູ່ໃນແຕ່ລະຄອບຄົວ ແລະໂຮງແຮມຕ່າງໆ. ບໍລິສັດທ່ອງທ່ຽວ Vinatour ໄດ້ຈັດໝູ່ບ້ານນີ້ເຂົ້າໃນລາຍການທ່ອງທ່ຽວລຽບຕາມແມ່ນ້ຳ ກ້າຍ. ການຢ້ຽມຢາມໝູ່ບ້ານອາຊີບຫັດຖະກຳທີ່ເປັນມູນເຊື້ອ ລືເກິມ ໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວຕ່າງປະເທດ.. ຍ້ອນບັນດາຜະລິດຕະພັນທັງແປກປະຫຼາດ, ທັງງາມ ແລະ ພິເສດແມ່ນຜະລິດຕະພັນທີ່ກ່ຽວພັນເຖິງວັດທະນະທຳການກິນດື່ມຂອງຊາວຫວຽດນາມ. ປະຈຸບັນ, ບັນດານັກວິທະຍາສາດ, ນັກວັດທະນະທຳພວມສືບຕໍ່ຄົ້ນຄ້ວາກ່ຽວກັບໝູ່ບ້ານ ລືເກິມ ຢູ່, ເພາະວ່າຜ່ານນັ້ນເຂົາເຈົ້າສາມາດເຫັນໄດ້ຄຸນຄ່າດ້ານປະຫວັດສາດ, ວັດທະນະທຳຂອງບ້ານນາແຫ່ງໜຶ່ງ ດ້ວຍອາຊີບທີ່ມີມາແຕ່ບູຮານນະການ, ຮູບພາບທີ່ມີຊີວິດຊີວາໃນເມື່ອກ່ອນ ແລະ ທຶນຮອນດ້ານວັດທະນະທຳອັນລ້ຳຄ່າໃນຊີວິດຍຸກທັນສະໄໝ.
ໂຕຕ໋ວານ