(vovworld) - ໂດຍແມ່ນເຂດທີ່ມີເງື່ອນໄຂດິນສັນດອນສະດວກ, ແຂວງ Binh Thuan ຢູ່ ທາງພາກກາງ ຫວຽດນາມ, ປະຈຸບັນ ເປັນເມືອງເອກໃນການຜະລິດໝາກມັງກອນຂອງທົ່ວປະເທດ. ກ່ອນຫນ້ານີ້, ຕົ້ນມັງກອນ ພຽງປູກເພື່ອປະດັບເອ້, ປະຈຸບັນ ໝາກມັງກອນໄດ້ສົ່ງໄປຂາຍຢູ່ຫລາຍປະເທດໃນໂລກ. ຈາກຈຸດປະສົງແມ່ນຕົ້ນໄມ້ຊ່ວຍປະຊາຊົນລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ມາຮອດປະຈຸບັນ ຕົ້ນມັງກອນແມ່ນຕົ້ນໄມ້ຊ່ວຍ ສ້າງຄວາມຮັ່ງມີໃຫ້ແກ່ປະຊາຊົນ. ເຖິງຢ່າງໃດກໍຕາມ, ຈຸດໝາຍສຳຄັນທີ່ສຸດສຳລັບຜູ້ຜະລິດໝາກມັງກອນປະຈຸບັນ, ນັ້ນແມ່ນຍົກສູງປະສິດທິຜົນເພື່ອສ້າງຜະລິດຕະພັນສົ່ງອອກແບບຍືນຍົງ.
ໝາກມັງກອນຢູ່ ແຂວງ ບີ່ງທ້ວນທາງພາກໃຕ້
ຫວຽນາມ
ພາບ:internet
|
ປະຈຸບັນ ໝາກມັງກອນຢູ່ ແຂວງ Binh Thuan ແລະ ບາງແຂວງທາງພາກໃຕ້ ຫວຽດນາມ ປະຈຸບັນ ຍັງສົ່ງອອກດ້ວຍຮູບການໝາກໄມ້ສົດ ແລະ ຈຳຫນ່າຍຢູ່ຕະຫລາດພາຍໃນປະເທດປະມານ 15 - 20%, ໃນຂະນະນັ້ນ ສົ່ງອອກແຕ່ 80 -90%. ໃນຊຸມປີມໍ່ໆມານີ້, ໂດຍຜ່ານຮົ້ວກີດຂວາງດ້ານຫລັກອະນາໄມດ້ານສະບຽງອາຫານຢູ່ຕະຫລາດຈຳນວນຫນຶ່ງທີ່ມີຄວາມຮຽກຮ້ອງສູງ, ໝາກມັງກອນ ຫວຽດນາມ ໄດ້ສົ່ງໄປຂາຍຢູ່ 20 ປະເທດ ແລະ ເຂດແຄ້ວນໃນໂລກຄື: ຈີນ, ສເກົາຫລີ, ອິນໂດເນເຊຍ, ມາເລຍເຊຍ, ສິງກະໂປ, ໂຮນລັງ, ອັງກິດ, ຝລ່ັງ, ເຢຍລະມັນ, ອາເມລິກາ ແລະ ການາດາ… ດ້ວຍປະລິມານ 35.000 ໂຕນ/ປີ, ບັນລຸວົງເງິນສົ່ງອອກປະມານ 20 ລ້ານ USD. ສຳລັບບັນດາປະເທດຢູ່ອາຊີ, ຈີນຍັງຄົງແມ່ນຕະຫລາດບໍລິໂພກໝາກມັງກອນຂອງ ຫວຽດນາມ ຫລາຍກວ່າໝູ່. ເຖິງຢ່າງກໍຕາມ, ປະລິມານໝາກມັງກອນສົ່ງອອກໄປຍັງຕະຫລາດນີ້ຕາມສັນຍາການຄ້າກວມພຽງ 2 - 4%, ສ່ວນຍັງເຫລືອແມ່ນຕາມແບບຂາຍຍ່ອຍ, ເພາະສະນັ້ນ ວິທີການສົ່ງອອກອາດຈະເກີດຄວາມສ່ຽງຫຼາຍ. ທ່ານ Bui Dang Hung ປະທານສະຫະສະມາຄົມ ໝາກມັງກອນ ແຂວງ Binh Thuan ໃຫ້ຮູ້ວ່າ:
“ຮູບການສົ່ງອອກແມ່ນງ່າຍດາຍ, ບໍ່ຖືກຜູກມັດແຕ່ຢ່າງໃດ, ສະນັ້ນ ສິ່ງທ່ີສະດວກນັ້ນແມ່ນສິນຄ້າຂາຍໄດ້ຢ່າງວ່ອງໄວ, ເມື່ອຮອດລະດູເກັບໝາກມັງກອນອາດຈະຂາຍໃຫ້ໝົດໃນເວລາ 5 - 10 ມື້ເທົ່ານັ້ນ. ແຕ່ສິ່ງທີ່ຫຍຸ້ງຍາກ ນັ້ນແມ່ນ ມີຫລາຍພາກສ່ວນເຂົ້າຮ່ວມການຊື້ຂາຍ ແລະ ການຄຸ້ມຄອງຂອງທັງສອງຝ່າຍບໍ່ທັນເຂັ້ມງວດເທື່ອ, ສະນັ້ນ ຍາກທີ່ຈະກວດກາຫລັກອະນາໄມດ້ານສະບຽງອາຫານໄດ້, ລາຄາກໍບໍ່ເປັນປົກກະຕິ. ນີ້ກໍແມ່ນສິ່ງທ້າທາຍສຳລັບພວກຂ້າພະເຈົ້າ, ຕ້ອງເຮັດແນວໃດໃຫ້ການຜະລິດປອດສານພິດ, ຮັບປະກັນໃຫ້ການພັດທະນາຢ່າງຍາວນານ. ທີສອງ ຕ້ອງເຮັດແນວໃດເພື່ອໃຫ້ເລື່ອງຊື້ຂາຍບໍ່ຖືກຄວາມສ່ຽງ, ສະນັ້ນ ຕ້ອງຮັບປະກັນນັບທັງໃນການຜະລິດກໍຄືການຈຳຫນ່າຍ.”
ເພື່ອເປີດກວ້າງຕະຫລາດສົ່ງອອກໝາກມັງກອນໃຫ້ຍືນຍົງ, ກ່ອນອື່ນໝົດໝາກມັງກອນຕ້ອງປອດສານພິດ, ແຊບ, ລາຄາຖືກ ແລະ ມີປະລິມານຫລວງຫລາຍ. ສຳລັບຕະຫລາດໃຫຍ່ທີ່ມີຄວາມສາມາດບົ່ມຊ້ອນຄື: ອາເມລິກາ, ການາດາ, ຍີ່ປຸ່ນ, ເອີລົບ..ໄດ້ຮຽກຮ້ອງໃຫ້ບັນດາຜູ້ຜະລິດໝາກມັງກອນຕ້ອງບັນລຸບັນດາມາດຕະຖານທັງໝົດນັບແຕ່ລະບົບເກັບຊື້, ຫຸ້ມຫໍ່, ຮັກສາ... ນີ້ກໍແມ່ນບັນຫາຊື່ງສະຫະສະມາຄົມໝາກມັງກອນ, ບັນດາວິສາຫະກິດ ແລະ ພໍ່ແມ່ຊາວກະສິກອນສົ່ງອອກໝາກມັງກອນສົນໃຈທີ່ສຸດ. ທ່ານ Ngo Xuan Nghiem ເຈົ້າຂອງຮາກຖານຜະລິດໝາກມັງກອນຢູ່ ແຂວງ Binh Thuan ໃຫ້ຮູ້ວ່າ:
“ປ່ຽນແປງຮີດຄອງປະເພນີໃຫ້ແກ່ຊາວກະສິກອນແມ່ນສິ່ງທີ່ຫຍຸ້ງຍາກທີ່ສຸດ, ເມື່ອຫວຽດນາມເຂົ້າເປັນສະມາຊິກອົງການການຄ້າໂລກ (WTO) ແມ່ນຮຽກຮ້ອງ ໃຫ້ສິນຄ້າບັນລຸຄຸນນະພາບສູງ ໃນຂະນະນັ້ນ ລະດັບຄວາມຮູ້ຂອງຊາວກະສິກອນຍັງຈຳກັດຢູ່. ຊາວກະສິກອນເຄີຍຜະລິດຕາມຮູບແບບເດີມ, ສະນັ້ນບໍ່ໝັ້ນຄົງໃນອະນາຄົດໄດ້. ຢາກສ່ົງອອກໝາກມັງກອນຢ່າງໝັ້ນຄົງຕ້ອງມີວິທີການ, ປ່ຽນແປງສະຕິຄວາມຮັບຮູ້, ຮັບເອົາພື້ນຖານວິທະຍາສາດເຕັກນິກທີ່ກ້າວຫນ້າ, ໃນນັ້ນຮັບປະກັນຫລັກອະນາໄມດ້ານສະບຽງອາຫານເປັນມາດຕະຖານທຳອິດກ່ອນທີ່ຈະຈຳຫນ່າຍ.”
ວຽກງານຫຸ້ມຫໍ່ໝາກມັງກອນເພື່ອສົ່ງອອກ
ພາບ:phapluatvn.vn
|
ຕາມທິດນີ້, ປະຈຸບັນຢູ່ແຂວງ Binh Thuan ມີ ຕົ້ນມັງກອນ7.300 ເຮັກຕາໄດ້ຮັບໃບຢັ້ງຢືນບັນລຸມາດຕະຖານ Vietgap ຊື່ງແມ່ນມາດຕະຖານຜະລິດກະສິກຳດີສຸດຢູ່ຫວຽດນາມ ແລະ ມີຕົ້ນມັງກອນໃນເນື້ອທີ່ເກືອບ 160 ເຮັກຕາແມ່ນຜະລິດຕາມມາດຕະຖານ Globogap ຊື່ງແມ່ນມາດຕະຖານຜະລິດກະສິກຳດີສຸດຂອງໂລກ ແລະ 1.140 ເຮັກຕາໄດ້ຮັບອະນຸຍາດຈາກກົມກວດກາພະຍາດຂອງອາເມລິກາ ເປັນເຂດຜະລິດເພື່ອສົ່ງອອກໄປຍັງຕະຫລາດອາເມລິກາ ແລະ ສເກົາຫລີ . ປະຈຸບັນ ມີວິສາຫະກິດ 80 ແຫ່ງຢູ່ແຂວງ Binh Thuan ນຳຫນ້າໃນການກໍ່ສ້າງໂຮງງານຫຸ້ມຫໍ່ ແລະ ຈັດຕັ້ງການເກັບຊື້ຜະລິດຕະພັນຕາມມາດຕະຖານ. ມີວິສາຫະກິດຫລາຍແຫ່ງລົງທຶນກໍ່ສ້າງໂຮງງານກຳຈັດຄວາມຮ້ອນ ແລະ ສ່ອງລັງສີ ເພື່ອຕອບສະຫນອງມາດຕະຖານການສົ່ງອອກ. ທ່ານ Bui Dang Hung ປະທານສະຫະສະມາຄົມໝາກມັງກອນ ແຂວງ Binh Thuan ໃຫ້ຮູ້ວ່າ:
“ຊາວກະສິກອນສະຫນັບສະຫນູນເຫັນດີເຫັນພ້ອມ ແລະ ພວມປະຕິບັດເມື່ອມີການແນະນຳ, ຊ່ວຍເຫລືອຈາກບັນດາຝ່າຍກ່ຽວຂ້ອງ. ມີວິສາຫະກິດຫລາຍແຫ່ງໄດ້ລົງທຶນຈຳນວນເງິນນັບ 10.000 USD ເພື່ອກໍ່ສ້າງໂຄງການມາດຕະຖານ Globogap, EuroGap ເພື່ອຍົກສູງຜະລິດຕະພັນໃຫ້ເປັນປົກກະຕິຢູ່ບັນດາຕະຫລາດທີ່ມີຄວາມຮຽກຮ້ອງດ້ານຄຸນນະພາບສູງ. ນອກນັ້ນຍັງມີຫລາຍຄອບຄົວໄດ້ສ້າງມາດຕະຖານ Vietgap. ໃນໄລຍະຫນຶ່ງປີ, ສູນຄົ້ນຄ້ວາຕົ້ນໝາກມັງກອນ Binh Thuan ກໍໄດ້ຊ່ວຍເຫລືອພໍ່ແມ່ປະຊາຊົນ ແລະ ອອກໃບຢັ້ງຢືນໃຫ້ແກ່ຕົ້ນ ມັງກອນກວ່າ 5.000 ເຮັກຕາ. ອຳນາດການປົກຄອງແຂວງ ແລະ ສະຫະສະມາຄົມ ກໍໄດ້ຊອກວິທີຊ່ວຍພໍ່ແມ່ປະຊາຊົນສືບຕໍ່ສ້າງມາດຕະຖານ Vietgap.”
ໃນຊຸມປີມໍ່ໆມານີ້ ສະພາບການສົ່ງອອກໝາກມັງກອນຂອງ ຫວຽດນາມ ໄດ້ມີການຫັນປ່ຽນຢ່າງຕັ້ງຫນ້າ, ພິເສດບັນດາຕະຫລາດທີ່ນຳມາເຊິ່ງປະສິດທິຜົນດ້ານເສດຖະກິດສູງ. ປີ 2010 ການສົ່ງອອກໝາກມັງກອນໄປຍັງຍີ່ປຸ່ນ ແລະ ອາເມລິກາ ບັນລຸ 420 ແລະ 880 ໂຕນ, ປີ 2011 ເພີ່ມຂຶ້ນ 600 ໂຕນ ແລະ ກວ່າ 1.500 ໂຕນ. ຢູ່ຕະຫລາດ ເອີລົບ, ພາຍຫລັງສົ່ງໄປຂາຍຢູ່ຕະຫລາດໂຮນລັງ, ໝາກມັງກອນຂອງຫວຽດນາມ ກໍໄດ້ຖືກສົ່ງໄປຂາຍຢູ່ຕະຫລາດຝລ່ັງ, ອັງກິດ ແລະ ເຢຍລະມັນ. ໃນ 6 ເດືອນຕົ້ນປີ 2010, ຕະຫລາດສົ່ງອອກໝາກມັງກອນມີສັນຍານດີພໍສົມຄວນ. ເພື່ອຂະຫຍາຍຕະຫລາດ, ລັດພວມສົມທົບກັບບັນດາວິສາຫະກິດກໍ່ສ້າງບັນດາສູນຊື້ຂາຍໝາກມັງກອນ, ກໍ່ສ້າງລະບົບຜະລິດໃນເບື້ອງຕົ້ນ, ສາງແຊ່ເຢັນ ແນໃສ່ຕອບສະຫນອງບັນດາມາດຕະຖານສາກົນເພື່ອໃຫ້ການສົ່ງອອກໝາກມັງກອນມີປະສິດທິຜົນເປັນປົກກະຕິຢ່າງຍາວນານ.