(vovworld) - ໃນສະພາບການເສດຖະກິດປະສົບກັບຄວາມຫຍຸ້ງຍາກ, ຕະຫລາດ, ລາຄາວັດຖຸດິບເຄື່ອງຕ່ຳແຜ່ນຕັດຫຍິບບໍ່ເປັນປົກກະຕິ, ໃນ 8 ເດືອນຜ່ານມາ ຂະແຫນງຕ່ຳແຜ່ນຕັດຫຍິບຫວຽດນາມ ຍັງຄົງປະຕິບັດການສົ່ງອອກເກີນດຸນກວ່າ 5,3 ຕື້ USD. ຜ່ານຜ່າຈຸດເວລາຫຍຸ້ງຍາກ, ຈາກສະພາບຢູ່ໃນທ່າຮັບ, ມາຮອດປະຈຸບັນ ຂະແຫນງຕຳແຜ່ນຕັດຫຍິບ ຫວຽດນາມ ໄດ້ ແລະ ພວມຫັນໄປສູ່ທ່າເປັນເຈົ້າການ, ເລືອກເຟັ້ນຕະຫລາດ ແລະ ຜະລິດຕະພັນສົ່ງອອກຕາມທິດຍາດແຍ່ງທ່າໄດ້ປຽບ, ບັນລຸປະສິດທິຜົນສູງ.
ການສົ່ງອອກເຄື່ອງຕ່ຳແຜ່ນຕັດຫຍິບຂອງຫວຽດນາມ ປະເຊີນຫນ້າກັບສິ່ງທ້າທາຍຫລາຍຢ່າງ
ພາບ: internet |
ກໍເຊັ່ນດຽວກັນກັບຫລາຍຂະແຫນງ, ຂົງເຂດເສດຖະກິດອື່ນ, ກ້າວເຂົ້າສູ່ປີ 2012, ການສົ່ງອອກເຄື່ອງຕ່ຳແຜ່ນຕັດຫຍິບຂອງຫວຽດນາມ ຕ້ອງປະເຊີນຫນ້າກັບສິ່ງທ້າທາຍຫລາຍຢ່າງ ຍ້ອນຜົນສະທ້ອນຈາກວິກິດການເສດຖະກິດທົ່ວໂລກທີ່ບໍ່ທັນຟື້ນຕົວເທື່ອ, ຫນິ້ສິນຂອງລັດຢູ່ປະເທດເອີລົບຈຳນວນຫນຶ່ງຍັງບໍ່ທັນແກ້ໄຂໄດ້. ບັນດາຕະຫລາດໃຫຍ່ຄື: ອາເມລິກາ, ຍີ່ປຸ່ນ, ອີຢູ ປະສົບກັບຄວາມຫຍຸ້ງຍາກຫລາຍຢ່າງ ເມື່ອບັນດາໃບຊ່ັງຊື້ສິນຄ້າມີທ່າອ່ຽງຫລຸດລາຄາລົງ ຍ້ອນປະລິມານສິນຄ້າຄ້າງສາງຂອງບັນດາບໍລິສັດຈຳຫນ່າຍເປັນຈຳນວນຫລວງຫລາຍ. ຄຽງຄູ່ກັນນັ້ນ, ມູນຄ່າໃບຊັ່ງຊື້ມີທ່າອ່ຽງຫລຸດລົງ ຍ້ອນລາຄາວັດຖຸດິບຫລຸດລົງໄດ້ເຮັດໃຫ້ຕະຫລາດສົ່ງອອກເຄື່ອງຕ່ຳແຜ່ນຕັດຫຍິບຂອງ ຫວຽດນາມ ຍິ່ງປະສົບກັບຄວາມຫຍຸ້ງຍາກ. ເພື່ອສາມາດຄົງຕົວ ແລະ ເພີ່ມທະວີຄວາມແກ້ງແຍ້ງໄດ້, ກຸ່ມບໍລິສັດຕ່ຳແຜ່ນຕັດຫຍິບໄດ້ວາງອອກຫລາຍມາດຕະການ, ໃນນັ້ນຖືເປັນສຳຄັນມາດຕະການຫລຸດຜ່ອນລາຍຈ່າຍ, ປະຕິບັດການປະຢັດໃນການຜະລິດດຳເນີນທຸລະກິດ. ນັບແຕ່ໄລຍະຕົ້ນປີ, ວິສາຫະກິດໃຫຍ່ 14 ແຫ່ງຂອງກຸ່ມບໍລິສັດຕ່ຳແຜ່ນຕັດຫຍິບ ໄດ້ພ້ອມກັນລົງນາມໃນຄຳໝັ້ນສັນຍາຫລຸດລາຍຈ່າຍລົງລະດັບຕ່ຳສຸດ 5% ໃນປີ 2012, ໃນນັ້ນ ປະຕິບັດຫລຸດລາຍຈ່າຍດ້ານບໍລິຫານ, ວັດຖຸດິບ, ພະລັງງານ, ຄ່າຄ້າງສາງ... ດ້ວຍຍອດຈຳນວນລາຍຈ່າຍເກືອບ 100 ຕື້ດົ່ງ. ນອກຈາກບັນດາມາດຕະການທີ່ຈຳເປັນ, ກຸ່ມບໍລິສັດຕຳແຜ່ນຕັດຫຍິບ ຫວຽດນາມ ຍັງວາງອອກບັນດາມາດຕະການທີ່ມີລັກສະນະຕັດສິນຊີ້ຂາດເພື່ອເພີ່ມທະວີກຳລັງຄວາມສາມາດແກ້ງແຍ້ງໃຫ້ແກ່ແຕ່ລະວິສາຫະກິດສົ່ງອອກຕາມທິດພັດທະນາແບບຍືນຍົງ. ທ່ານ ເລຕຽນເຈື່ອງ, ຮອງຜູ້ອຳນວຍການໃຫຍ່ກຸ່ມບໍລິສັດຕຳແຜ່ນຕັດຫຍິບ ຫວຽດນາມ ໃຫ້ຮູ້ວ່າ:
“ກ່ຽວກັບມາດຕະການ, ກຸ່ມບໍລິສັດຕຳແຜ່ນຕັດຫຍິບຍັງຄົງສືບຕໍ່ເດີນຕາມທ່າອ່ຽງກະທັດລັດ ແລະ ພວກຂ້າພະເຈົ້າຖືວ່າ ນີ້ແມ່ນວິວັດທະນາການຄັດເລືອກແບບທຳມະຊາດ. ພຽງແຕ່ບັນດາວິສາຫະກິດມີກຳລັງຄວາມສາມາດໃນການຜະລິດ, ກຳລັງຄວາມສາມາດແກ້ງແຍ້ງດີ, ສາມາດສ້າງລາຄາແກ້ງແຍ້ງສູງຈຶ່ງຄົງຕົວໄດ້, ຈາກນັ້ນເຮັດໃຫ້ຂອບຂະຫນາດຂອງຂະແຫນງຕ່ຳແຜ່ນຕັດຫຍິບຈະກະທັດລັດກວ່າ ແຕ່ຍັງຄົງຕອບສະຫນອງຄວາມຕ້ອງການສົ່ງອອກໄດ້. ສຳລັບຂະແຫນງຕ່ຳແຜ່ນຕັດຫຍິບ ຫວຽດນາມ ບໍ່ມີມາດຕະການໃດນອກເຫນືອບັນຫາຕະຫລາດ ນັ້ນແມ່ນຕ້ອງຍົກສູງກຳລັງຄວາມສາມາດແກ້ງແຍ້ງ, ສະມັດຕະພາບ, ຄຸນນະພາບ ແລະ ປະສິດທິຜົນໃນການບໍລິການທີ່ມີຕໍ່ລູກຄ້າ.”
ດ້ວຍບັນດາມາດຕະການໃນພາຍພາກຫນ້າ, ທັງມຸ່ງໄປເຖິງຈຸດໝາຍຢ່າງຍາວນານໃນການສ້າງທ່າເປັນເຈົ້າການນັ້ນ ໄດ້ຊ່ວຍໃຫ້ການສົ່ງອອກເຄື່ອງຕ່ຳແຜ່ນຕັດຫຍິບຂອງ ຫວຽດນາມ ຜ່ານຜ່າໄລຍະຫຍຸ້ງຍາກ. ຕາມຕົວເລກຊື່ງສະຫະສະມາຄົມຕ່ຳແຜ່ນຕັດຫຍິບຫວຽດນາມ (Vitas) ຫາກໍ່ປະກາດໄດ້ສະແດງໃຫ້ເຫັນວ່າ: ໃນ 8 ເດືອນຕົ້ນປີນີ້, ວົງເງິນສົ່ງອອກຂອງຂະແຫນງຕ່ຳແຜ່ນຕັດຫຍິບ ບັນລຸ ກວ່າ 10,8 ຕື້ USD, ໃນຂະນະນັ້ນ ທົ່ວຂະແຫນງກໍນຳເຂົ້າສິນຄ້າຮັບໃຊ້ການຜະລິດລວມມູນຄ່າ 5,5 ຕື້ USD, ຫລຸດຜ່ອນ 7% ເມື່ອທຽບໃສ່ໄລຍະດຽວກັນຂອງປີ 2011. ເປັນອັນວ່າ, ຂະແຫນງຕ່ຳແຜ່ນຕັດຫຍິບສົ່ງອອກເກີນດຸນກວ່າ 5,3 ຕື້ USD ເພີ່ມຂຶ້ນ 24 % ເມື່ອທຽບໃສ່ໄລຍະດຽວກັນຂອງປີກາຍ. ດ້ວຍໝາກຜົນບັນລຸໄດ້ນັ້ນ, ມາດຕະການທີ່ຂະແຫນງຕ່ຳແຜ່ນຕັດຫຍິບວາງອອກສະແດງໃຫ້ເຫັນປະສິດທິຜົນທາງດ້ານເສດຖະກິດຢ່າງແທ້ຈິງ. ທີ່ກອງປະຊຸມຂອງຂະແຫນງຕ່ຳແຜ່ນຕັດຫຍິບທີ່ຫາກໍ່ຖືກຈັດຕັ້ງຂຶ້ນຢູ່ ຮ່າໂນ້ຍ, ທ່ານ ເວືອງດີງເຫ້ວ, ລັດຖະມົນຕີກະຊວງການເງິນ ຫວຽດນາມ ຕີລາຄາວ່າ:
“ພວກເຮົາເຫັນວ່າ ກຸ່ມບໍລິສັດຕ່ຳແຜ່ນຕັດຫຍິບ ມີຄວາມເອົາໃຈໃສ່ທີ່ສຸດເຖິງບັນຫາການບໍລິຫານ. ບັນດາຜູ້ຊ່ຽວຊານກໍຕີລາຄາວ່າ: ກຸ່ມບໍລິສັດຕ່ຳແຜ່ນຕັດຫຍິບ ຫວຽດນາມ ພັດທະນາດ້ວຍກຳລັງແຮງຂອງຕົນ, ມີຄວາມແກ້ງແຍ້ງກັບບັນດາພາກສ່ວນເສດຖະກິດອື່ນພາຍໃນປະເທດຢ່າງສະໝ່ຳສະເຫມີ ແລະ ແກ້ງແຍ້ງກັບທຸກປະເທດໃນພາກພື້ນອີກ.”
ເພື່ອບັນລຸໄດ້ຈຸດໝາຍເຕີບໂຕການສົ່ງອອກໃນຊຸມເດືອນທ້າຍປີ, ຂະແຫນງຕ່ຳແຜ່ນຕັດຫຍິບ ຫວຽດນາມ ພວມສືບຕໍ່ສຸມໃສ່ເຂົ້າໃນບັນດາມາດຕະການສຳຄັນ, ໃນນັ້ນເອົາໃຈໃສ່ເປັນພິເສດແກ່ການຫລຸດຜ່ອນການອີງໃສ່ບັນດາໃບຊັ່ງຊື້ສິນຄ້າແບບຮັບເໝົາປະກອບຊິ້ນສ່ວນ, ຍົກສູງອັດຕາສ່ວນ FOB ແລະ ODM, ປັບປຸງການເພີ່ມອັດຕາສ່ວນຕະຫລາດຢູ່ ອາເມລິກາ, ອີຢູ ແລະ ຍີ່ປຸ່ນ. ເພີ່ມທະວີການຂຸດຄົ້ນບັນດາຕະຫລາດໃຫມ່ຄື: ລັດເຊຍ, ການາດາ, ສເກົາຫລີ... ພິເສດ, ແມ່ນສຸມໃສ່ຕະຫລາດຈີນ ຊ່ືງແມ່ນຕະຫລາດທີ່ມີຄວາມສາມາດບ່ົ່ມຊ້ອນຫລາຍຢ່າງ, ມີປະຊາກອນຫລາຍກວ່າໝູ່ຢູ່ໃນໂລກ. ເພື່ອຕອບສະຫນອງຄວາມຮຽກຮ້ອງຕ້ອງການດັ່ງກ່າວ, ຂະແຫນງຕ່ຳແຜ່ນຕັດຫຍິບ ຫວຽດນາມ ສືບຕໍ່ເລືອກເຟັ້ນຂັ້ນຕອນຢ່າງເໝາະສົມ, ຖືການພັດທະນາເຄື່ອງໝາຍ ຕ່ຳແຜ່ນຕັດຫຍິບ ຫວຽດນາມ ຢູ່ ບັນດາຕະຫລາດເຫລົ່ານີ້ເປັນສຳຄັນ. ຕາມແຜນການແລ້ວ, ຂະແຫນງຕ່ຳແຜ່ນຕັດຫຍິບຈະເພີ່ມທະວີການນຳໃຊ້ບັນດາລະດັບເສດຖະກິດເຕັກນິກໃຫມ່, ກ້າວຫນ້າ, ນຳໃຊ້ວັດຖຸດິບຢູ່ພາຍໃນປະເທດເພື່ອຫລຸດຜ່ອນການນຳເຂົ້າ, ເພີ່ມທະວີການຮ່ວມສຳພັນລະຫວ່າງຂະແຫນງ, ຍົກສູງອັດຕາສ່ວນພາຍໃນປະເທດ, ເພີ່ມເນື້ອທີ່ປູກຝ້າຍຢູ່ພາຍໃນປະເທດໃຫ້ຂຶ້ນເຖິງ 15.000 ເຮັກຕາ, ເພີ່ມທະວີການນຳໃຊ້ວັດຖຸອຸປະກອນ, ກົນຈັກ, ອຸປະກອນຜະລິດພາຍໃນປະເທດເພື່ອປະຢັດລາຍຈ່າຍ, ພ້ອມກັນນັ້ນ ສ້າງນະໂຍບາຍອຸດຫນູນ ແລະ ເງິນເດືອນໃຫ້ເໝາະສົມເພື່ອດຶງດູດຄົນງານ.
ດ້ວຍບັນດາມາດຕະການແກ້ໄຂຢ່າງຂ້ຽວຂາດ, ເອົາໃຈໃສ່ເປັນພິເສດເຖິງຄົນງານ, ຂະແຫນງ ຕ່ຳແຜ່ນຕັດຫຍິບ ຫວຽດນາມ ວາງຄາດໝາຍບັນລຸລະດັບການເຕີບໂຕສົ່ງອອກທັງປີປະມານ 13%, ບັນລຸມູນຄ່າການສົ່ງອອກກວ່າ 18 ຕື້ USD, ໃນນັ້ນ ການສົ່ງອອກເກີນດຸນ 7 ຕື້ USD, ປະກອບສ່ວນດຸນດຽງການຄ້າຂອງພື້ນຖານເສດຖະກິດ.