(vovworld)- ໃນສອງເດືອນຕົ້ນປີ 2014, ຫວຽດນາມ ດຶງດູດໄດ້ 122 ໂຄງການລົງທຶນໂດຍກົງຂອງຕ່າງປະເທດ (FD)I ດ້ວຍຍອດທຶນຈົດທະບຽນ ແລະ ທຶນສະຫນອງໃຫມ່ເກືອບ 1,54 ຕື້ USD. ເຖິງວ່າບັນລຸພຽງປະມານ 37% ເມື່ອທຽບໃສ່ໄລຍະດຽວກັນຂອງປີກາຍກໍຕາມ, ແຕ່ຄຸນນະພາບບັນດາໂຄງການ FDI ພວມຄ່ອຍໆໄດ້ຮັບການປັບປຸງ, ໝັ້ນໝາຍດຶງດູດແຫລ່ງທຶນ FDI ນັບມື້ນັບມີປະສິດທິຜົນ, ແທດຈິງກວ່າ.
ໂຄງການກັ່ນນຳ້ມັນ
ພາບປະກອບ:internet
|
ໃນຈຳນວນ 29 ປະເທດ ແລະ ເຂດແຄ້ວນທີ່ມີໂຄງການລົງທຶນຢູ່ຫວຽດນາມ ໃນ 2 ເດືອນຕົ້ນປີ, ປະຈຸບັນ ສເກົາຫລີ ຍັງຄົງແມ່ນປະເທດນຳຫນ້າ, ຖັດມາແມ່ນສິງກະໂປ ແລະ ຍີ່ປຸ່ນ, ອາເມລິກາ… ບັນດານັກລົງທຶນຕ່າງປະເທດ ໄດ້ລົງທຶນເຂົ້າ 19 ແຂວງ, ນະຄອນ ຂອງຫວຽດນາມ, ໃນນັ້ນ ແຂວງບີງເຢືອງ ແມ່ນທ້ອງຖິ່ນດຶງດູດແຫລ່ງເງິນລົງທຶນຂອງຕ່າງປະເທດຫລາຍກວ່າໝູ່ ດ້ວຍຍອດຈຳນວນທຶນຈົດທະບຽນສະຫນອງໃຫມ່ ແລະ ເພີ່ມເຕີມກວ່າ 690 ລ້ານ USD, ຖັດມາແມ່ນ ນະຄອນ ຫາຍຟ່ອງ ດ້ວຍ195 ລ້ານ USD ແລະ ນະຄອນໂຮ່ຈິມີນ ແມ່ນເກືອບ 148 ລ້ານ USD. ບັນດາໂຄງການໄດ້ຮັບຫນັງສືອະນຸຍາດໃຫ້ລົງທຶນໃນ 2 ເດືອນຕົ້ນປີ ສ່ວນຫລາຍແມ່ນໃນຂົງເຂດຜະລິດເຕັກໂນໂລຊີສູງ, ຕົວຢ່າງຄື: ໂຄງການຂອງບໍລິສັດ Wonderful Saigon Electrics ຈຳກັດ ໄດ້ດັດປັບເພີ່ມເງິນລົງທຶນ 210 ລ້ານ USD ໂດຍ ຍີ່ປຸ່ນ ລົງທຶນຢູ່ແຂວງ ບີ່ງເຢືອງ, ໂຄງການບໍລິສັດ SL Flex ຫວຽດນາມ ຈຳກັດ ຢູ່ແຂວງ ບັກຢາງ ດ້ວຍຍອດຈຳນວນທຶນຈົດທະບຽນ 106 ລ້ານ USD. ເມື່ອທຽບໃສ່ບັນດາໂຄງການ FDI ທີ່ມີຂອບຂະຫນາດໃຫຍ່, ດ້ວຍມູນຄ່ານັບຕື້ USD ໃນທ້າຍປີ 2013 ຄື: ໂຄງການກັ່ນນຳ້ມັນ ງີເຊີນ ຫລື ໂຄງການເອເລັກໂຕນິກ Samsung, ນີ້ແມ່ນຕົວເລກທີ່ຍັງຈຳກັດຢູ່. ເຖິງຢ່າງໃດກໍຕາມ, ບັນດາໂຄງການນີ້ສະແດງໃຫ້ເຫັນການຫັນທິດສຳຄັນໃນນະໂຍບາຍດຶງດູດທຶນ FDI ຂອງຫວຽດນາມ. ເພື່ອໃຫ້ ແຫລ່ງທຶນ FDI ປະຕິບັດຢ່າງມີປະສິດທິຜົນ ແລະ ແຜ່ຂະຫຍາຍສຳລັບພື້ນຖານເສດຖະກິດ. ທ່ານ ຫງວຽນວັນຈຸງ, ຮອງລັດຖະມົນຕີ ກະຊວງແຜນການ ແລະ ການລົງທຶນ ຫວຽດນາມ ຖືວ່າ:
“ທິດທາງການດຶງດູດເງິນລົງທຶນໃນໄລຍະຈະມາເຖິງ ບໍ່ແມ່ນການດຶງດູດການລົງທຶນດ້ວຍທຸກເງື່ອນໄຂເທົ່ານັ້ນ ຫາກແມ່ນບັນດາໂຄງການທີ່ມີຄຸນນະພາບດ້ານເຕັກໂນໂລຊີ, ບັນດາໂຄງການເຕັກໂນໂລຊີສູງ. ສະນັ້ນ ພວກເຮົາຕ້ອງຄົ້ນຄ້ວາເຮັດແນວໃດເພື່ອໃຫ້ວຽກງານພັດທະນາອຸດສາຫະກຳສຳຮອງຈະໄດ້ຮັບການຜັນຂະຫຍາຍໃນໄລຍະຈະມາເຖິງ, ນັ້ນແມ່ນສ້າງຕັ້ງເຂດອຸດສາຫະກຳສຳຮອງ.”
ມີສັນຍານຫນຶ່ງທີ່ເປັນຫນ້າຊື່ນຊົມໃນການດຶງດູດທຶນ FDI ໃນໄລຍະມໍ່ໆມານີ້ ນັ້ນແມ່ນມີກຸ່ມບໍລິສັດຮ່ວມທຸລະກິດຈາກຫລາຍປະເທດ ໄດ້ເປີດກວ້າງການລົງທຶນ, ໃນນັ້ນ ມີຫລາຍໂຄງການໃຫຍ່ ລວມມູນຄ່ານັບຕື້ USD ພວມສືບຕໍ່ລໍຖ້າຫນັງສືອະນຸຍາດ. ໃນຊຸມປີມໍ່ໆມານີ້, ແຫລ່ງທຶນ FDI ໄດ້ ແລະ ພວມປະກອບສ່ວນຢ່າງຕັ້ງຫນ້າເຂົ້າໃນການເຕີບໂຕເສດຖະກິດຂອງຫວຽດນາມ. ໄລ່ມາຮອດປີ 2013, ຫວຽດນາມ ໄດ້ມີ 15.700 ໂຄງການ FDI ຍັງມີຜົນສັກສິດ ດ້ວຍຍອດຈຳນວນທຶນຈົດທະບຽນປະມານ 239 ຕື້ USD, ໃນນັ້ນ ທຶນປະຕິບັດປະມານ 112 ຕື້ USD. ໄລຍະມໍ່ໆມານີ້, ບັນດາໂຄງການ FDI ບໍ່ພຽງແຕ່ປະກອບສ່ວນເພີ່ມວົງເງິນສົ່ງອອກເທົ່ານັ້ນ ຫາກຍັງປະກອບສ່ວນປ່ຽນແປງໂຄງປະກອບປະເພດສິນຄ້າສົ່ງອອກອີກດ້ວຍ. ສາດສະດາຈານ, ດຣ ຫງວຽນມ້າຍ, ປະທານສະຫະພັນບັນດາວິສາຫະກິດ FDI ໃຫ້ຮູ້ວ່າ:
“ປີຜ່ານມາ ວົງເງິນສົ່ງອອກຂອງຫວຽດນາມ ແມ່ນ 132 ຕື້ USD, ການສົ່ງອອກ FDI ກວມເກືອບ 65% ຍອດວົງເງິນສົ່ງອອກ. ໃນນັ້ນ ວິສາຫະກິດ FDI ໄດ້ສົ່ງອອກເກີນດຸນ, ບໍ່ພຽງແຕ່ຖົງຂຸມໃຫ້ແກ່ການນຳເຂົ້າເກີນດຸນຂອງວິສາຫະກິດພາຍໃນປະເທດເທົ່ານັ້ນ ຫາກຍັງສົ່ງອອກເກີນດຸນໃນປີທີ 2 ຢ່າງລຽນຕິດດ້ວຍມູນຄ່າເຖິງ 850 ລ້ານ USD ອີກດ້ວຍ.. ຖ້າທ່າອ່ຽງສ່ົງອອກເກີນດຸນຄອ່ຍໆເພີ່ມຂຶ້ນ, ການຊຳລະສາກົນເກີນດຸນຂອງຫວຽດນາມ ຈະໝັ້ນແກ່ນກວ່າ ແລະ ຈາກປະເທດ ພຽງແຕ່ສະສົມເງິນຕາຕ່າງປະເທດໄດ້ 15-16 ຕື້ USD ເທົ່ານັ້ນ, ມາຮອດປະຈຸບັນ ໄດ້ເພີ່ມຂຶ້ນທົບສອງເທົ່າ ແມ່ນ 30-32 ຕື້ USD, ໃນນັ້ນ ມີການສົ່ງອອກເກີນດຸນຂອງບັນດາວິສາຫະກິດ FDI”
ບັນດາໂຄງການໃຫຍ່, ໂຄງການເຕັກໂນໂລຊີສູງຄື: ບັນດາໂຄງການອຸດສາຫະກຳເອເລັກໂຕນິກຂອງ Samsung ຢູ່ ບັກນີງ ແລະ ທາຍງວຽນ ໃນຊຸມປີມໍ່ໆມານີ້ ໄດ້ພິສູດໃຫ້ເຫັນການກະທົບຈາກແຫລ່ງເງິນລົງທຶນ FDI ຂອງບັນດາກຸ່ມບໍລິສັດນາໆຊາດຢ່າງລະອຽດ, ເປັນຕົ້ນແມ່ນສ້າງເງື່ອນໄຂເພື່ອສ້າງຕັ້ງບັນດາວິສາຫະກິດຢູ່ອ້ອມຂ້າງ, ພັດທະນາບັນດາວິສາຫະກດສຳຮອງ. ການກະທົບຈາກບັນດາໂຄງການ FDI ນີ້ ບໍ່ພຽງແຕ່ປະກອບພາສີອາກອນ, ການຈະເລີນເຕີບໂຕ GDP ເທົ່ານັ້ນ ຫາກຍັງສ້າງທ່ວງທ່າຊຸກຍູ້ການພັດທະນາເສດຖະກິດສັງຄົມພາຍໃນປະເທດໃນຫລາຍແງ່ມູມທີ່ແຕກຕ່າງກັນຄື: ສ້າງກຳລັງແຮງງານທີ່ສາມາດສຳພັດກັບລະດັບຄວາມຮູ້ສາກົນ. ນອກນັ້ນ ບັນດາໂຄງການເຕັກໂນໂລຊີສູງ ຍັງສ້າງກາລະໂອກາດໃຫ້ແກ່ຜູ້ໃຊ້ສອຍໄດ້ຊົມໃຊ້ບັນດາຜະລິດຕະພັນມີຄຸນນະພາບສູງ, ປະກອບສ່ວນປ່ຽນແປງແນວຄວາມຄິດ, ວິທີເຮັດຂອງຊາວຫວຽດນາມ ໃນການຜະລິດ ແລະ ດຳເນີນທຸລະກິດ, ເຊື່ອມໂຍງເຂົ້າກັບສາກົນເທື່ອລະກ້າວ.
ໃນໄລຍະຜ່ານມາ, ມີນັກລົງທຶນຕ່າງປະເທດຫລາຍທ່ານໄດ້ຕີລາຄາວ່າ ສະພາບແວດລ້ອມແຫ່ງການລົງທຶນຢູ່ຫວຽດນາມ ປັບປຸງດີພໍສົມຄວນ, ຍ້ອນພື້ນຖານເສດຖະກິດມະຫາພາກໄດ້ຮັບການຮັກສາໄວ້ຢ່າງໝັ້ນຄົງ, ບັນດານະໂຍບາຍບຸລິມະສິດໄດ້ຮັບການເພີ່ມທະວີ ແລະ ພື້ນຖານໂຄງລ່າງກໍຄ່ອຍໆໄດ້ຮັບການປັບປຸງ. ນີ້ແມ່ນເງື່ອນໄຂສະດວກເພື່ອໃຫ້ຫວຽດນາມ ເລືອກເຟັ້ນດຶງດູດແຫລ່ງທຶນ FDI ທີ່ມີຄຸນນະພາບ ແລະ ບັນລຸປະສິດທິຜົນກວ່າໃນໄລຍະຈະມາເຖິງ.