ໃນຊຸມມື້ຕົ້ນປີ 2017, ບັນດາສະຫະກອນ, ໜ່ວຍສະຫະກອນປູກສະເພາະໝາກມ່ວງຢູ່ແຂວງ ດົ່ງທ໋າບ ໄດ້ຕ້ອນຮັບບັນດາວິສາຫະກິດຕ່າງປະເທດ, ວິສາຫະກິດສົ່ງອອກໝາກໄມ້ພາຍໃນປະເທດມາຊອກຮູ້, ລົງນາມໃນສັນຍາເກັບຊື້ໝາກໄມ້ເປັນຈຳນວນຫຼວງຫຼາຍ. ທ່ານ ຮີ່ນແທງບ໋າ, ຮອງຜູ້ອຳນວຍການສະຫະກອນໝາກມ່ວງ ມີ້ເຊືອງ, ໃຫ້ຮູ້ວ່າ: ຍ້ອນມີການຜະລິດຜະລິດຕະພັນກະເສດປອດສານພິດ, ຮັບປະກັນຄວາມປອດໄພ, ສະນັ້ນກາລະໂອກາດຈຳໜ່າຍຜະລິດຕະພັນຂອງສະຫະກອນ ຂາຍໄດ້ດ້ວຍລາຄາສູງ, ໝັ້ນຄົງ. ທັງຜູ້ປູກ ແລະ ຜູ້ຊື້ລ້ວນແຕ່ມີຄວາມຊິນເຄີຍໃນການຜະລິດແບບໃໝ່, ຮັບປະກັນຄວາມປອດໄພ ແລະ ມີປະສິດທິຜົນຝັງເລິກຢູ່ໃນຫົວຄິດ. ທ່ານ ຮີ່ນແທງບ໋າ ຢືນຢັນວ່າ, ບໍ່ພຽງແຕ່ສະຫະກອນ ມີ້ເຊືອງ ເທົ່ານັ້ນ, ຫາກບັນດາເຮືອນສວນປູກສະເພາະໝາກມ່ວງຫຼາຍແຫ່ງກໍ່ມີຄວາມເຊື່ອໝັ້ນໃນການປູກໝາກມ່ວງທີ່ແຊບ, ຫວານ, ຕອບສະໜອງບັນດາມາດຕະຖານສົ່ງອອກທີ່ເຄັ່ງຄັດ, ປະກອບສ່ວນນຳເຄື່ອງໝາຍການຄ້າໝາກໄມ້ຂອງຫວຽດນາມ ໃຫ້ນັບມື້ນັບແຊກຊຶມເຂົ້າຫຼາຍປະເທດກວ່າ.
“ຍາມໃດພໍ່ແມ່ປະຊາຊົນຊາວກະສິກອນກໍ່ພະຍາຍາມສູ້ຊົນຜະລິດໝາກມ່ວງສົ່ງອອກຕ່າງປະເທດໃຫ້ໄດ້ 70% ແລະ ຂາຍພາຍໃນປະເທດແມ່ນ 30%. ໃນຂະນະນັ້ນ, ພໍ່ແມ່ປະຊາຊົນຈະມີສະຖຽນລະພາບທີ່ສຸດ ແລະ ສາມາດສ້າງຄວາມຮັ່ງມີຢູ່ບ້ານເກີດເມືອງນອນຂອງຕົນ”.
ບໍ່ພຽງແຕ່ມີໝາກມ່ວງເທົ່ານັ້ນ, ໃນປີຜ່ານມາ, ຂະແໜງຜະລິດ, ສົ່ງອອກຜັກ, ໝາກໄມ້ເວົ້າລວມຂອງເຂດທົ່ງພຽງແມ່ນ້ຳຂອງ ກໍ່ຈະເລີນເຕີບໂຕຢ່າງແຮງ. ມີໝາກໄມ້ເກືອບ 30 ຊະນິດຂອງເຂດຖືກສົ່ງອອກຕ່າງປະເທດບັນລຸໄດ້ 74% ຍອດວົງເງິນການຄ້າສົ່ງອອກຜັກ, ໝາກໄມ້ຂອງທົ່ວປະເທດ. ບັນດາໝາກໄມ້ຄື: ໝາກມັງກອນ, ໝາກລຳໄຍ, ໝາກໂມ, ໝາກມ່ວງ… ໄດ້ຕອບສະໜອງຄວາມຕ້ອງການຄຸນນະພາບສູງຂອງບັນດາຕະຫຼາດຄື: ຍີ່ປຸ່ນ, ອາເມລິກາ, ຝລັ່ງ, ໂຮນລັງ, ແບນຊິກ, ເຢຍລະມັນ, ອົດສະຕາລີ, ສ.ເກົາຫຼີ, ມາເລເຊຍ… ທ່ານສາດສະດາຈານ, ປະລິຍາເອກ ວໍຕ່ອງຊວນ ໃຫ້ຮູ້ວ່າ.
“ໝາກໄມ້ຊະນິດຂອງພວກເຮົາມີລາຄາສູງ. ເມື່ອຂາຍປະມູນລາຄາຢູ່ນະຄອນ Fukuoka, ປະເທດຍີ່ປຸ່ນ, ໝາກມ່ວງ ກ໋າດຮ່ວາລົກ ຂອງທາງທິດຕາເວັນຕົກ ມີລາຄາຂຶ້ນເຖິງ 12 USD/ໜ່ວຍ”.
ທ່ານ ເລມິງຮວານ, ເລຂາຄະນະພັກແຂວງ ດົ່ງທ໋າບ, ເຊິ່ງແມ່ນທ້ອງຖິ່ນນຳໜ້າໃນການສ້າງໂຄງປະກອບພື້ນຖານກະສິກຳຄືນໃໝ່ຂອງທົ່ວປະເທດ ຖືວ່າ, ຖ້າຫາກຄວບຄຸມຄຸນນະພາບສົ້ນເຂົ້າເປັນຢ່າງດີ, ວົງເງິນສົ່ງອອກຜັກ, ໝາກໄມ້ຂອງຫວຽດນາມ ໃນຊຸມປີຈະມາເຖິງອາດຈະບັນລຸສູງທົບ 2 - 3ເທົ່າ ເມື່ອທຽບໃສ່ປີ 2016.
“ເພື່ອແຊກແຊງເຂົ້າຕະຫຼາດໃດໜຶ່ງແລ້ວ, ເລື່ອງຮັກສາຕະຫຼາດນັ້ນບໍ່ແມ່ນເລື່ອງງ່າຍ. ຊາວກະສິກອນ, ສະຫະກອນ, ວິສາຫະກິດຕ້ອງຮັກສາຄວາມໄວ້ເນື້ອເຊື່ອໃຈ, ໃນໄລຍະຍາວຫາກບໍ່ແມ່ນໃນແຕ່ລະລະດູການ. ຕ້ອງເຮັດຢ່າງເປັນລະບຽບຮຽບຮ້ອຍ, ມີຂັ້ນຕອນ ແລະ ເດັດດ່ຽວກວ່າ”.
ປີ 2016, ເຖິງວ່າຕ້ອງປະເຊີນໜ້າກັບຄວາມຫຍຸ້ງຍາກໃນການສົ່ງອອກຢ່າງລຽນຕິດກໍ່ຄື ຕ້ອງຮັບມືກັບໄພແຫ້ງແລ້ງ, ນ້ຳເຄັມຊຶມເຂົ້າກໍ່ຕາມ ແຕ່ນີ້ພັດແມ່ນປີເຕີບໂຕໃນຂະແໜງຜັກ, ໝາກໄມ້. ນີ້ແມ່ນໜຶ່ງໃນບັນດາພື້ນຖານສຳຄັນ ແລະ ແມ່ນປະຖົມປັດໃຈເພື່ອໃຫ້ຂະແໜງກະສິກຳເຂດທົ່ວພຽງແມ່ນ້ຳຂອງພັດທະນາ. ສ້າງໂຄງປະກອບແນວພັນປູກຄືນໃໝ່, ສ້າງບັນດາມູນຄ່າຖືກໃນການຜະລິດ ແລະ ສົ່ງອອກ, ປະກອບສ່ວນສຳຄັນເຂົ້າໃນການເພີ່ມລາຍຮັບ ແລະ ປັບປຸງຊີວິດການເປັນຢູ່ຂອງປະຊາຊົນ, ກໍຄືປະກອບສ່ວນເຂົ້າວົງເງິນສົ່ງອອກຂອງປະເທດຊາດ.