(vovworld)- ປີ 2013 ແມ່ນປີທີ່ລັດຖະບານ ຫວຽດນາມ ສຸມໃສ່ຈຸດໝາຍສ້າງໂຄງປະກອບພື້ນຖານເສດຖະກິດຄືນໃຫມ່ ຫັນປ່ຽນຮູບແບບການຈະເລີນເຕີບໂຕຕາມທິດຮັບປະກັນການພັດທະນາເປັນປົກກະຕິ ແລະ ໝັ້ນຄົງ. ໃນທ່າອ່ຽງນັ້ນ, ການສ້າງໂຄງປະກອບໃນຂົງເຂດກະສິກຳຄືນໃຫມ່ແມ່ນທິດກ້າວເດີນທີ່ສຳຄັນ ເພື່ອປະກອບສ່ວນຍົກສູງປະສິດທິຜົນ ແລະ ກຳລັງແກ້ງແຍ່ງຂອງຜະລິດຕະພັນກະເສດຂອງ ຫວຽດນາມໃນເງື່ອນໄຂເຊື່ອມໂຍງເຂົ້າກັບເສດຖະກິດໂລກ.
ຫວຽດນາມ ໄດ້ກາຍເປັນປະເທດສົ່ງອອກເຂົ້າສານອັນດັບຫນຶ່ງຂອງໂລກ
ພາບປະກອບ:internet
|
ຍາມໃດຂະແຫນງກະສິກຳ ຫວຽດນາມ ກໍສວມບົດບາດສຳຄັນ, ປະກອບສ່ວນຫລາຍພໍສົມຄວນໃຫ້ແກ່ການຈະເລີນເຕີບໂຕເສດຖະກິດຂອງທັງປະເທດ, ພິເສດແມ່ນຂົງເຂດສົ່ງອອກ. ຫວຽດນາມ ໄດ້ກາຍເປັນປະເທດສົ່ງອອກເຂົ້າສານອັນດັບຫນຶ່ງຂອງໂລກ. ປີ 2012, ຫວຽດນາມ ມີຜະລິດຕະພັນກະເສດ, ເຄື່ອງປ່າຂອງດົງ ແລະ ສິນໃນນ້ຳ 8 ປະເພດ ສົ່ງອອກບັນລຸກວ່າ 1 ຕື້ USD, ປະກອບສ່ວນຊ່ວຍໃຫ້ມູນຄ່າການສົ່ງອອກກະສິກຳເກີນດຸນກວ່າ 10,6 ຕື້ USD. ນີ້ແມ່ນຕົວເລກເປັນຫນ້າຊື່ນຊົມໃນຂະນະທີ່ສະພາບພື້ນຖານເສດຖະກິດຍັງປະສົບກັບຄວາມຫຍຸ້ງຍາກຫລາຍຢ່າງ. ເຖິງຢ່າງໃດກໍຕາມ, ສິ່ງທີ່ຍັງເປັນຫນ້າວິຕົກກັງວົນ ນັ້ນແມ່ນຜົນສຳເລັດຂອງກະສິກຳ ຫວຽດນາມ ພຽງແຕ່ບັນລຸປະລິມານການຜະລິດສູງເທົ່ານັ້ນ ຫາກຄຸນຄ່າບໍ່ທັນສູງ. ນີ້ແມ່ນສິ່ງທ້າທາຍ ແລະ ກໍແມ່ນຫນ້າທີ່ ຊື່ງພື້ນຖານກະສິກຳ ຫວຽດນາມ ຕ້ອງຜ່ານຜ່າໃນໄລຍະປະຈຸບັນ. ຫວຽດນາມ ຕ້ອງຊອກຮູ້, ກຳໄດ້ທ່າອ່ຽງລວມຂອງກະສິກຳໂລກ, ນັ້ນແມ່ນ ອີງໃສ່ຂົງເຂດອຸດສາຫະກຳ, ບໍລິການ. ການສ້າງໂຄງປະກອບຂະແຫນງກະສິກຳຄືນໃຫມ່ ພຽງແຕ່ປະສົບຜົນສຳເລັດເມື່ອຕິດພັນກັບການສ້າງໂຄງປະກອບພື້ນຖານເສດຖະກິດຄືນໃຫມ່ຂອງລັດຖະບານ. ມາດຕະການປະຕິບັດການສ້າງໂຄງປະກອບກະສິກຳຄືນໃຫມ່ລວມມີບັນດາການປ່ຽນແປງໃນການລົງທຶນຂອງລັດ, ຍົກສູງປະສິດທິຜົນການຄຸ້ມຄອງ ແລະ ນຳໃຊ້ການລົງທຶນຂອງລັດ, ປະຕິຮູບລະບອບກົດໝາຍ, ປ່ຽນໃຫມ່ວິສາຫະກິດແຫ່ງລັດ, ມີນະໂຍບາຍເພື່ອລະດົມທຸກແຫລ່ງກຳລັງສັງຄົມເຂົ້າຮ່ວມວິວັດການສ້າງໂຄງປະກອບຂະແຫນງກະສິກຳຄືນໃຫມ່. ທ່ານ ກາວດືກຟາດ, ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມໃຫ້ຮູ້ວ່າ:
“ໃນຊຸມປີມໍ່ໆມານີ້, ສະພາແຫ່ງຊາດ ແລະ ລັດຖະບານ ໄດ້ປະຕິບັດແຜນນະໂຍບາຍທີ່ວ່າ: 5 ປີເທື່ອຫນຶ່ງແມ່ນເພີ່ມແຫລ່ງງົບປະມານການລົງທຶນຂຶ້ນທົບສອງເທົ່າໃຫ້ແກ່ກະສິກຳ, ຊົນນະບົດ ແລະ ຊາວກະສິກອນ ຢ່າງເຂັ້ມງວດ. ເພື່ອຮັບປະກັນຈຸດໝາຍພັດທະນາກະສິກຳ ແລະຊົນນະບົດ, ຫວຽດນາມ ຢືດໝັ້ນປະຕິບັດບັນດາມາດຕະການຢ່າງຄົບຊຸດເພື່ອດຶງດູດການລົງທຶນຫລາຍກວ່າອີກຂອງບັນດາພາກສ່ວນເສດຖະກິດ, ນັບທັງບັນດາວິສາຫະກິດພາກເອກະຊົນພາຍໃນປະເທດກໍຄືຕ່າງປະເທດເຂົ້າໃນຂົງເຂດກະສິກຳ, ຊົນນະບົດ.”
ພາບປະກອບ:internet
|
ປະຈຸບັນ, ບັນດານະໂຍບາຍ ສ້າງໂຄງປະກອບຂະແຫນງກະສິກຳຄືນໃຫມ່ ພວມໄດ້ຮັບການສຸມໃສ່ ຍັງປະກອບສ່ວນເພີ່ມທະວີການລົງທຶນກົນຈັກໃຫ້ແກ່ກະສິກຳ, ຫລຸດຜ່ອນກຳລັງແຮງງານ, ຫລຸດຜ່ອນຄວາມເສຍຫາຍພາຍຫລັງການເກັບກ່ຽວ, ສ້າງເຄື່ອງໝາຍການຄ້າໃຫ້ແກ່ບັນດາປະເພດສິນຄ້າຜະລິດຕະພັນກະເສດຂອງຫວຽດນາມ. ຮູບແບບທົ່ງນາສ້າງລາຍຮັບສູງ ຢູ່ຕາແສງ ລາມກົດ ເມືອງເຕີນອຽນ ແຂວງບັກຢາງ ແມ່ນຮູບແບບຫນຶ່ງ ຫລືການລະດົມທຸກແຫລ່ງກຳລັງເພື່ອສ້າງໂຄງປະກອບການລົງທຶນໃນການພັດທະນາກະສິກຳຄືນໃຫມ່. ທ່ານ ເຢືອງແອງຕວນ, ຮອງປະທານຄະນະກຳມະການປະຊາຊົນຕາແສງ ລາມກົດ ໃຫ້ຮູ້ວ່າ:
“ເພື່ອຜັນຂະຫຍາຍຮູບແບບປູກມັນຝລັ່ງໃນລະດູຫນາວ ແລະ ວາງແຜນກຳນົດທົ່ງນາຂະຫນາດໃຫຍ່ເປັນຈຸດສຸມ, ອຳນາດການປົກຄອງຕາແສງມີນະໂຍບາຍກະຕຸ້ນຄວາມຕ້ອງການ, ຫນູນຊ່ວຍບ້ວງເງິນຫນຶ່ງໃຫ້ແກ່ແຕ່ລະຄອບຄົວ, ໃນນັ້ນ ຫນູນຊ່ວຍແນວພັນປູກ, ຟຸ່ນເຄມີ ແລະ ແນະນຳດ້ານເຕັກນິກ. ນອກນັ້ນຍັງ ຫັກເງິນຈາກງົບປະມານຂອງຕາແສງ ແລະ ພໍ່ແມ່ປະຊາຊົນປະກອບເພື່ອຊື້ກົນຈັກຮັບໃຊ້ກະສິກຳ. ອຳນາດການປົກຄອງຍັງເຊັ່ນສັນຍາກັບບັນດາຫົວຫນ່ວຍເກັບຊື້, ຈຳຫນ່າຍຜະລິດຕະພັນກະເສດຢູ່ກັບທີ່ ສະນັ້ນໄດ້ຮັບການຕອບສະຫນອງຈາກປະຊາຊົນເປັນຈຳຫນວນຫລວງຫລາຍ.”
ເລື່ອງລາວຢູ່ ລາມກົດ ພຽງແຕ່ແມ່ນຫນຶ່ງໃນບັນດາຜົນສຳເລັດແຫ່ງການຮ່ວມສຳພັນລະຫວ່າງວິສາຫະກິດພາກເອກະຊົນກັບຊາວກະສິກອນ ເພື່ອຍົກສູງປະສິດທິຜົນໃນການຜະລິດສິນຄ້າຜະລິດຕະພັນກະເສດ. ຍ້ອນມີນະໂຍບາຍຮ່ວມສຳພັນກັບວິສາຫະກິດ, ເພີ່ມທະວີການດຶງດູດທຸກແຫລ່ງເງິນລົງທຶນໃຫ້ແກ່ການຜະລິດ, ແຕ່ລະທ້ອງຖິ່ນມີບັນດາມາດຕະການ, ວິທີເຮັດເພື່ອເພີ່ມປະສິດທິຜົນການນຳໃຊ້ທີ່ດິນ, ນຳມາເຊິ່ງປະສິດທິຜົນດ້ານເສດຖະກິດໃຫ້ແກ່ຊາວກະສິກອນ, ຈາກນັ້ນ ຍົກສູງປະສິດທິຜົນການຜະລິດໃນກະສິກຳ ແລະ ການສົ່ງອອກ. ລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມ ທ່ານກາວດືກຟາດ ຖືວ່າ:
“ເພື່ອດຶງດູດການລົງທຶນຂອງພາກເອກະຊົນເຂົ້າໃນຂົງເຂດກະສິກຳ, ຊົນນະບົດ ບັນຫາສຳຄັນນັ້ນແມ່ນຕ້ອງສ້າງສະພາບແວດລ້ອມທີ່ສະດວກກວ່າ ເພື່ອໃຫ້ບັນດາວິສາຫະກິດສາມາດພັດທະນາແບບຍືນຍົງ ແລະ ມີປະສິດທິຜົນ. ສິ່ງດັ່ງກ່າວແມ່ນກ່ຽວຂ້ອງເຖິງການປ່ຽນໃຫມ່ບັນດາກົນໄກນະໂຍບາຍ, ປ່ຽນໃຫມ່ການປະຕິຮູບລະບຽບການບໍລິຫານ, ເພີ່ມທະວີການກໍ່ສ້າງພື້ນຖານໂຄງລ່າງ, ພັດທະນາບັນດາບໍລິການຂອງລັດເພື່ອຫນູນຊ່ວຍວິສາຫະກິດທຳມາຫາກິນຢ່າງມີປະສິດທິຜົນກວ່າ.”
ເລື່ອງສ້າງໂຄງປະກອບຂະແຫນງກະສິກຳ ຫວຽດນາມ ຄືນໃຫມ່ ໃນໄລຍະຈະມາເຖິງ ຄວນເອົາໃຈໃສ່ເຖິງການຍູ້ແຮງການລ້ຽງປູກສິນໃນນ້ຳ, ລ້ຽງສັດຕາມທິດທັນສະໄຫມ. ຂະແຫນງປູກຝັງຄວນເອົາໃຈໃສ່ເຖິງການພັດທະນາຕົ້ນໄມ້ອຸດສາຫະກຳ, ດອກໄມ້ອຸດສາຫະກຳສູງ. ໃນຂະແຫນງປ່າໄມ້ແມ່ນໃຫ້ບຸລິມະສິດການພັດທະນາເສດຖະກິດປ່າ. ເພື່ອປະຕິບັດການສ້າງໂຄງປະກອບໃນແຕ່ລະຂົງເຂດຄືນໃຫມ່, ກະຊວງກະສິກຳ ແລະ ພັດທະນາຊົນນະບົດ, ສົ່ງເສີມການສ້າງຮູບແບບຈັດຕັ້ງການຜະລິດໃຫ້ສອດຄອ່ງກັບຄວາມຮຽກຮ້ອງຕ້ອງການໃນຕົວຈິງ.