(vovworld) -ໂດຍຜ່ານຜ່າຄວາມຫຍຸ້ງຍາກລວມຂອງທົ່ວປະເທດ ແລະ ຜົນສະທ້ອນຈາກວິກິດການການເງິນໂລກ, ປີ 2013 ນະຄອນໂຮ່ຈິມີນ ຍັງຄົງຮັກສາລະດັບຈະເລີນເຕີບໂຕເສດຖະກິດເປັນປົກກະຕິ, ປະກອບ GDP ສ່ວນ 1/3 ຂອງທັງປະເທດ. ສິ່ງດັ່ງກ່າວສະແດງໃຫ້ເຫັນບົດບາດນຳຫນ້າຂອງນະຄອນ. ກ້າວເຂົ້າສູ່ປີ 2014, ນະຄອນ ໂຮ່ຈິມີນ ພວມສຸມທຸກຄວາມມານະພະຍາຍາມເພື່ອຮັກສາທ່າຟື້ນຕົວເສດຖະກິດ, ປະກອບສ່ວນຢ່າງຕັ້ງຫນ້າເຂົ້າໃນການເຕີບໂຕ ແລະ ຫັນປ່ຽນໂຄງປະກອບເສດຖະກິດພາຍໃນພາກພື້ນ ແລະ ທັງປະເທດ.
ນະຄອນ ໂຮ່ຈິມີນ
photo:internet
|
ດ້ວຍທ່າຈະເລີນເຕີບໂຕເສດຖະກິດຂອງຫວຽດນາມ ໃນປີ 2014, ນະຄອນ ໂຮ່ຈິມີນ ໄດ້ວາງອອກບັນດາຄາດໝາຍພັດທະນາເສດຖະກິດ ດ້ວຍການເອົາໃຈໃສ່ເປັນພິເສດເຖິງຄຸນນະພາບ, ລະດັບເຕີບໂຕ. ເສດຖະກິດສັງຄົມຂອງນະຄອນ ໂຮ່ຈິມີນຈະພັດທະນາຕາມທິດໝັ້ນຄົງ, ດ້ວຍລະດັບ GDP ບັນລຸແຕ່ 9,5- 10%. ປີ 2014, ນະຄອນໂຮ່ຈິມີນ ສືບຕໍ່ປະຕິບັດບັນດານະໂຍບາຍຍົກເວັ້ນ, ຕໍ່ກຳນົດເວລາເສຍອາກອນ, ສ້າງເງື່ອນໄຂໃຫ້ແກ່ບັນດາວິສາຫະກິດຟື້ນຕົວການຜະລິດດຳເນີນທຸລະກິດ, ສ້າງເງື່ອນໄຂສະດວກໃຫ້ແກ່ການສົ່ງອອກໃນສະພາບທີ່ພື້ນຖານເສດຖະກິດຍັງປະສົບກັບຄວາມຫຍຸ້ງຍາກຫລາຍຢ່າງ. ທ່ານ ເລຮ່ວາງກວນ, ປະທານ ຄະນະກຳມະການປະຊາຊົນນະຄອນ ໂຮ່ຈິມິນໃຫ້ຮູ້ວ່າ:
“ນະຄອນໂຮ່ຈິມີນສືບຕໍ່ປະຕິບັດມາດຕະການຕ່າງໆ ເພື່ອແກ້ໄຂສະພາບສິນຄ້າຄ້າງສາງ, ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ, ຊຸກຍູ້ການດຳເນີນທຸລະກິດພັດທະນາ, ເປີດກວ້າງຕະຫລາດສົ່ງອອກ ບົນພື້ນຖານເພີ່ມທະວີບັນດາການເຄື່ອນໄຫວສົ່ງເສີມການຄ້າ, ພັດທະນາການທ່ອງທ່ຽວບໍລິການ, ສົ່ງເສີມບັນດາວິສາຫະກິດຮ່ວມສຳພັນນຳກັນເພື່ອຈຳຫນ່າຍຜະລິດຕະພັນພາຍໃນປະເທດ, ຍູ້ແຮງບັ້ນຂົນຂວາຍ ຊາວຫວຽດນາມ ຊົມໃຊ້ສິນຄ້າຫວຽດນາມ, ເພີ່ມທະວີການປະຕິບັດການປະຢັດ. ປະຕິບັດ 6 ລາຍການບຸກທະລຸ, ດ້ວຍການບຸລິມະສິດພັດທະນາວິທະຍາສາດເຕັກໂນໂລຊີ, ຍູ້ແຮງການສົ່ງອອກ ແລະ ຮັບປະກັນຊີວິດສັງຄົມຢ່າງມີປະສິດທິຜົນ.”
ພິເສດ ປີ 2014, ນະຄອນ ໂຮ່ຈິມີນ ສຸມໃສ່ປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ້ງແຍ້ງຂອງບັນດາວິສາຫະກິດ. ພ້ອມກັບການຫນູນຊ່ວຍສະຫນອງຂໍ້ມູນຂ່າວສານໃຫ້ແກ່ບັນດາວິສາຫະກິດ, ຫັນລະບຽບການບໍລິຫານເປັນງາຍດ່າຍ, ນະຄອນໂຮ່ຈິມີນ ສືບຕໍ່ສ້າງບັນດານະໂຍບາຍສົ່ງເສີມການພັດທະນາ ເພີ່ມທະວີການໝູນໃຊ້ເຕັກໂນໂລຊີຂໍ້ມູນຂ່າວສານໃນການແກ້ໄຂບັນດາລະບຽບການບໍລິຫານ ເພື່ອສ້າງຄວາມສະດວກໃຫ້ແກ່ວິສາຫະກິດ. ດ້ວຍທ່າໄດ້ປຽບກ່ຽວກັບຂົງເຂດບໍລິການ, ນະຄອນ ໂຮ່ຈິມີນ ສືບຕໍ່ ສ້າງນະໂຍບາຍສົ່ງເສີມການພັດທະນາດ້ານການຄ້າສີວິໄລ, ຍູ້ແຮງການພັດທະນາດ້ານການຄ້າເອເລັກໂຕນິກ ແລະ ໝູນໃຊ້ບັນດາຮູບແບບແຈກຢາຍ, ທຸລະກຳທີ່ທັນສະໄຫມ. ຫນຶ່ງໃນບັນດາມາດຕະການທີ່ນະຄອນ ໂຮ່ຈິມີນ ປະຕິບັດໃນປີ 2014, ນັ້ນແມ່ນ ແກ້ໄຂດ້ານທຶນຮອນໃຫ້ແກ່ວິສາຫະກິດ. ທ່ານ ຫງວຽນ ຮ່ວາງ ມີງ, ຮອງຜູ້ອຳນວຍການທະນາຄານແຫ່ງລັດ ສາຂານະຄອນໂຮ່ຈິມີນ ໃຫ້ຮູ້ວ່າ:
“ເພື່ອເຮັດໃຫ້ການຈະເລີນເຕີບໂຕ GDP ແລະ ການສົ່ງອອກ ບັນລຸລະດັບສູງ ຕາມຄາດໝາຍທີ່ໄດ້ວາງອອກ, ທະນາຄານ ຕ້ອງຕັ້ງຫນ້າຫນູນຊ່ວຍແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດຫລາຍກວ່າ. ໃນນັ້ນ ຕ້ອງສຸມໃສ່ບຸລິມະສິດ ແຫລ່ງທຶນໃຫ້ບັນດາຜະລິດຕະພັນຫລັກແຫລ່ງຂອງນະຄອນ.”
ໃນຂົງເຂດອຸດສາຫະກຳ, ສືບຕໍ່ປະຕິບັດການຫັນປ່ຽນໂຄງປະກອບຂະແຫນງອຸດສາຫະກຳຕາມທິດ ຫລຸດຜ່ອນອຸດສາຫະກຳຂຸດຄົ້ນຢ່າງແຮງ, ເພີ່ມອຸດສາຫະກຳປຸງແຕ່ງ, ອຸດສາຫະກຳສ້າງເປັນຜະລິດຕະພັນທີ່ມີມູນຄ່າເພີ່ມສູງ, ສ້າງບັນດານະໂຍບາຍສົ່ງເສີມບັນດາກຸ່ມບໍລິສັດເສດຖະກິດຕ່າງປະເທດລົງທຶນເຂົ້ານະຄອນ, ນຳໃຊ້ເຕັກໂນໂລຊີສູງ, ໃນນັ້ນ ບຸລິມະສິດພັດທະນາບັນດາຂະແຫນງຄື: ເຕັກໂນໂລຊີຂໍ້ມູນຂ່າວສານ, ໂທລະຄົມມະນາຄົມ, ກົນຈັກ, ວັດຖຸອຸປະກອນໃຫມ່, ເຕັກໂນໂລຊີ nano... ຈາກນັ້ນ ສ້າງເປັນຜະລິດຕະພັນເຕັກໂນໂລຊີສູງ, ອຸດສາຫະກຳຫນູນຊ່ວຍ. ນີ້ກໍແມ່ນບັນດາຂົງເຂດທີ່ສ້າງເງື່ອນໄຂເພື່ອດຶງດູດໂຄງການລົງທຶນຂອງຕ່າງປະເທດຕື່ມອີກ. ທ່ານ ເລຮ່ວ່າຍກວກ, ຫົວຫນ້າຄະນະຄຸ້ມຄອງເຂດອຸດສາຫະກຳເຕັກໂລໂລຊີສູງ ນະຄອນໂຮ່ຈິມີນຖືວ່າ:
“ ເພື່ອພັດທະນາອຸດສາຫະກຳຫນູນຊ່ວຍ, ມຸ່ງໄປເຖິງບັນດາຜະລິດຕະພັນມີຄວາມຕ້ອງການສູງ ແມ່ນຕ້ອງມີນະໂຍບາຍຫນູນຊ່ວຍເປັນຈຸດສຸມ ເພື່ອສ້າງເງື່ອນໄຂໃຫ້ບັນດາຜະລິດຕະພັນນີ້ເຂົ້າຮ່ວມລະບົບສະຫນອງຊີ້ນສ່ວນໃຫ້ແກ່ບັນດາຜະລິດຕະພັນສົ່ງອອກ. ເຮັດໄດ້ຄືແນວນັ້ນຈຶ່ງນຳມາເຊິ່ງມູນຄ່າເພີ່ມສູງ.”
ສະເພາະຂົງເຂດກະສິກຳ, ນະຄອນໂຮ່ຈິມີນ ເອົາໃຈໃສ່ປະຕິບັດການຫັນປ່ຽນຜົນລະປູກຕາມທິດຕິດພັນກັບຈຸດພິເສດສະເພາະຂອງຕົວເມືອງໃຫຍ່ ນັ້ນແມ່ນພັດທະນາພື້ນຖານກະສິກຳສະອາດ, ເພີ່ມທະວີການໝູນໃຊ້ເຕັກໂນໂລຊີສູງ, ເຕັກໂນໂລຊີຊີວະພາບໃນການພັດທະນາກະສິກຳ. ດ້ວຍທິດລົງເລິກເຂົ້າໃນການພັດທະນາເສດຖະກິດສູງ ແລະ ຖືຄຸນນະພາບປະສິດທິຜົນເປັນສຳຄັນ, ນະຄອນ ໂຮ່ຈິມີນ ຈະສ້າງສະພາບແວດລ້ອມແຫ່ງການພັດທະນາຢ່າງສະດວກເພື່ອໃຫ້ເສດຖະກິດຂອງນະຄອນໂຮ່ຈິມີນ ພັດທະນາແບບຍືນຍົງໃນຊຸມປີຕໍ່ໄປ.