(vovworld)-ເພືຶຶ່ອຍູ້ແຮງການຮ່ວມສຳພັນລະຫວ່າງເຂດ,ພາກພັດທະນາເສດຖະກິດ, ໃນຊຸມປີມໍ່ໆມານີ້, ນະຄອນ ໂຮ່ຈິມີນ ໄດ້ຈັດຕັ້ງບັນດານັດເຊື່ອມຕໍ່ການສະຫນອງສິນຄ້າຄວາມຕ້ອງການກັບບັນດາແຂວງ, ນະຄອນ ທິດຕາເວັນອອກ ແລະ ຕາເວັນຕົກພາກໃຕ້. ຜ່ານ 3 ປີແຫ່ງການປະຕິບັດ, ການເຄື່ອນໄຫວນີ້ ໄດ້ເຕົ້າໂຮມນັກຜະລິດ, ຊາວກະສິກອນ, ນັກຈຳຫນ່າຍພ້ອມກັນຊອກຫາມາດຕະການຮ່ວມສຳພັນການສະຫນອງສິນຄ້າ.
ພາບປະກອບ:baomoi.com
|
ເຂົ້າຮ່ວມນັດເຊື່ອມຕໍ່ການສະຫນອງຄວາມຕ້ອງການສິນຄ້າປີນີ້, ແຂວງ ດົງທາບ ໄດ້ສຸມໃສ່ແນະນຳບັນດາຜະລິດຕະພັນພິເສດຂອງທ້ອງຖິ່ນ ຄື: ໝາກລຳໄຍເຈົາແທ່ງ, ມັງກອນແກ້ວ, ມັນຕົ້ນ ແລະ ໝາກນາວບໍ່ມີແກ່ນ. ບັນດາສະຫະກອນຢູ່ບໍລິເວນແຂວງ ດົງທາບ ໄດ້ກຽມພ້ອມໝາກລຳໄຍກວ່າ 10.000ໂຕນ, ມັງກອນແກ້ວ 5000 ໂຕນ ແລະ ມັນຕົ້ນ, ໝາກນາວບໍ່ມີແກ່ນນັບພັນໆໂຕນ ເພື່ອສົ່ງເຖິງບັນດາລະບົບຮ້ານສັບພະສິນຄ້າ, ຕະຫລາດຂາຍສົ່ງຢູ່ ນະຄອນ ໂຮ່ຈິມີນ ເພື່ອຮັບໃຊ້ຕະຫລາດໃນໂອກາດບຸນປີໃຫມ່ປະຈຳຊາດຈະມາເຖິງ. ປະລິມານສິນຄ້າໄດ້ເພີ່ມຂຶ້ນ 68% ເມື່ອທຽບໃສ່ປີກາຍ. ທ່ານ ຟານວັນຊຸມ, ຮອງຫົວຫນ້າຫ້ອງການກະສິກຳ ເມືອງ ເຈົາແທ່ງ ແຂວງ ດົງທາບ ໃຫ້ຮູ້ວ່າ:
“ຜ່ານການເຊື່ອມຕໍ່ດັ່ງກ່າວ, ພວກຂ້າພະເຈົ້າມີໂອກາດແນະນຳ ບັນດາຜະລິດຕະພັນຂອງຕົນເຖິງບັນດາຮ້ານສັບພະສິນຄ້າ, ຕະຫລາດຂາຍສົ່ງ ບີງດຽນ ແລະ ບັນດາບໍລິສັດຢູ່ນະຄອນ ໂຮ່ຈິມີນ.ພວກຂ້າພະເຈົ້າປາດຖະຫນາວ່າ ບັນດາແຂວງ, ນະຄອນ ແນະນຳບັນດາປະເພດສິນຄ້ານີ້ ເພື່ອເພີ່ມປະເພດສິນຄ້າທີ່ປະຊາຊົນມີຄວາມຕ້ອງການໃນຊີວິດປະຈຳວັນ.”
ເປັນຄັ້ງທີ 2 ຈັດຕັ້ງການເຊື່ອມຕໍ່ການສະຫນອງຄວາມຕ້ອງການສິນຄ້າ ໃນປີ 2014 ໄດ້ດຶງດູດການເຂົ້າຮ່ວມຂອງວິສາຫະກິດ 360 ແຫ່ງຢູ່ ນະຄອນໂຮ່ຈິມີນ, ບັນດາແຂວງ, ນະຄອນທາງທິດຕາເວັນອອກ, ທາງທິດຕາເວັນຕົກພາກໃຕ້ ແລະ ທ້ອງຖິ່ນຈຳນວນຫນຶ່ງທາງພາກເຫນືອຫວຽດນາມ. ຄວາມຈິງໃຫ້ເຫັນວ່າ ໃນສະພາບຄວາມຫຍຸ້ງຍາກກ່ຽວກັບສົ້ນອອກຄືປະຈຸບັນ, ການ ການເຊື່ອມຕໍ່ ລະຫວ່າງການສະຫນອງ-ຄວາມຕ້ອງການສິນຄ້າ ຕາມຮູບແບບ ການເຊື່ອມຕໍ່ ລະຫວ່າງ ລັດ- ຊາວກະສິກອນ- ນັກຜະລິດ ແລະ ນັກຈຳແຫນ່າຍ, ບໍ່ພຽງແຕ່ມີຄວາມໝາຍພິເສດສຳລັບບັນດາສະຫະກອນ, ກັບຊາວກະສິກອນເທົ່ານັ້ນ ຫາກຍັງມີຄວາມໝາຍທີ່ມີຕໍ່ບັນດານັກຈຳຫນ່າຍ, ນັກຂາຍຍ່ອຍ ເມື່ອເຂົາເຈົ້າສາມາດພົບປະກັນ ແລະ ຊອກໄດ້ບັນດາຜະລິດຕະພັນຊື່ງຕະຫລາດຕ້ອງການ. ທ່ານ ຫງວຽນມີງຕ້ວາຍ, ຫົວຫນ້າພະແນກອຸດສາຫະກຳ ແລະ ການຄ້ານະຄອນ ເກີນເທີ ໃຫ້ຮູ້ວ່າ: ການເຄື່ອນໄຫວການເຊື່ອມຕໍ່ພັດທະນາສິນຄ້າລະຫວ່າງບັນດາທ້ອງຖິ່ນ, ພິເສດ ແມ່ນເປັນເຈົ້າການຂອງນະຄອນໂຮ່ຈິມີນ ໄດ້ຊ່ວຍໃຫ້ສິນຄ້າໃນເຂດສາມາດຈໍລະຈອນດີກວ່າ. ສະເພາະ ເກີນເທິ ປີນີ້ ມີສິນຄ້າ 20 ກວ່າປະເພດ ຖືກນຳເອົາໄປຂາຍຢູ່ບັນດາລະບົບຮ້ານສັບພະສິນຄ້າ, ຕະຫລາດຂາຍສົ່ງ ແລະ ຮ້ານຄ້າຂາຍຍ່ອຍຢູ່ບໍລິເວນນະຄອນ ເກີນເທີ, ໃນນັ້ນ ສ່ວນຫລາຍແມ່ນເຂົ້າສານ, ສິນໃນນ້ຳ, ໝາກໄມ້ ແລະ ຜັກພືດຕ່າງໆ. ສ່ວນທ່ານນາງ ມາຍທິແອງຕວຽດ, ຫົວຫນ້າພະແນກອຸດສາຫະກຳ ແລະ ການຄ້າ ແຂວງ ອານຢາງ ຖືວ່າ: ຜ່ານບັນດານະໂຍບາຍຫນູນຊ່ວຍເສດຖະກິດ, ການຮ່ວມມືດ້ານການຄ້າລະຫວ່າງບັນດາແຂວງ, ນະຄອນ, ການຈຳຫນ່າຍບັນດາຜະລິດຕະພັນພິເສດຂອງ ອານຢາງ ໄດ້ມີຄວາມສະດວກກວ່າ, ລາຄາແລະ ປະລິມານສິນຄ້າຈຳຫນ່າຍເປັນປົກກະຕິ. ທ່ານນາງມາຍທິແອງຕວຽດ ໃຫ້ຮູ້ວ່າ:
“ພະແນກອຸດສາຫະກຳ ແລະ ການຄ້າ ອານຢາງ ພວມມີຫລາຍໂຄງການຮ່ວມມື, ເຊັນຂໍ້ຜູກພັນ, ຮ່ວມສຳພັນກັບພະແນກອຸດສາຫະກຳການຄ້ານະຄອນ ໂຮ່ຈິມີນ. ນີ້ກໍແມ່ນໂອກາດເພື່ອໃຫ້ພວກເຮົາ ກຳໄດ້ສະພາບການຂອງຕະຫລາດ ກໍຄືກຳໄດ້ຄວາມຕ້ອງການຂອງຕະຫລາດນະຄອນໂຮ່ຈິມີນ. ນອກນັ້ນ ຍັງຮູ້ຈັກເຖິງມາດຕະຖານ ແລະ ບັນຫາກ່ຽວຂອ້ງເຖິງຜະລິດຕະພັນຂອງລະບົບຈຳຫນ່າຍຢູ່ນະຄອນໂຮ່ຈິມີນ ຈາກນັ້ນ ພວກຂ້າພະເຈົ້າຈະຊ່ວຍວິສາຫະກິດແຊກຊືມເຂົ້ານະຄອນ ໂຮ່ຈີມີນ ນັບມື້ນັບຈຶ່ງມີປະສິດທິຜົນກວ່າ.”
ຕາມການຄາດຄະເນ, ປະຈຸບັນ ມີປະມານ 60-70% ຜະລິດຕະພັນກະເສດໄດ້ຈຳຫນ່າຍຢູ່ບໍລິເວນ ນະຄອນ ໂຮ່ຈິມີນ ໂດຍບັນດາແຂວງ, ນະຄອນ ທາງທິດຕາເວັນອອກ ແລະ ທາງທິດຕາເວັນຕົກພາກໃຕ້ສະຫນອງໃຫ້. ອາດຈະເວົ້າໄດ້ວ່າ ລາຍການກະຕຸ້ນການໃຊ້ສອຍຜ່ານບັນດານັດ ການເຊື່ອມຕໍ່ ການສະຫນອງຄວາມຕ້ອງການສິນຄ້າ ໄດ້ເປີດກາລະໂອກາດໃຫຍ່ເພື່ອໃຫ້ຊາວກະສິກອນ, ຫົວຫນ່ວຍຜະລິດ ແລະ ວິສາຫະກິດ ມີຕະຫລາດກວ້າງຂວາງ ຊື່ງລວມມີ: 21 ແຂວງ, ນະຄອນ ດ້ວຍພົນລະເມືອງກວ່າ 30 ລ້ານຄົນເພື່ອໃຊ້ສອຍສິນຄ້າ. ພ້ອມກັນນັ້ນ ນີ້ກໍແມ່ນກາລະໂອກາດເພື່ອໃຫ້ຜູ້ໃຊ້ສອຍສຳພັດກັບແຫລ່ງຜະລິດຕະພັນສິນຄ້າທີ່ມີຄຸນນະພາບສູງ, ເປັນຫລາຍຮູບຫລາຍແບບ, ມີຕົ້ນກຳເນີດ ແລະ ລາຄາເໝາະສົມ. ເລື່ອງຍູ້ແຮງການ ການເຊື່ອມຕໍ່ ການສະຫນອງ ແລະ ຄວາມຕ້ອງການສິນຄ້ານີ້ ກໍປະກອບສ່ວນເຂົ້າໃນການຂົນຂວາຍ ຊາວຫວຽດນາມຊົມໃຊ້ສິນຄ້າຂອງຫວຽດນາມ ຢ່າງມີປະສິດທິຜົນ ແລະ ປະກອບສ່ວນເຮັດໃຫ້ຕະຫລາດເປັນປົກກະຕິ.