(vovworld)- ໃນໄລຍະ 15 ປີຜ່ານມາ, ໂຄງການນຳໄຟຟ້າລົງສູ່ເຂດຊົນນະບົດໄດ້ພັດທະນາເປັນຫນ້າຊື່ນຊົມ ດ້ວຍບັນດາໝາກຜົນດີພໍສົມຄວນ. ຮອດປີ 2013, ທົ່ວປະເທດມີຕື່ມອີກກວ່າ 9 ລ້ານຄອບຄົວຢູ່ເຂດຊົນນະບົດໄດ້ຊົມໃຊ້ໄຟຟ້າ, ຍົກ ຈຳນວນຄອບຄົວຢູ່ເຂດຊົນນະບົດໄດ້ນຳໃຊ້ຕາຫນ່າງໄຟຟ້າແຫ່ງຊາດຂຶ້ນເຖິງ 98%. ຍ້ອນມີໂຄງການນຳໄຟຟ້າລົງສູ່ເຂດຊົນນະບົດ ໄດ້ເຮັດໃຫ້ໂສມຫນ້າຢູ່ເຂດຊົນນະບົດປ່ຽນແປງຫລາຍຢ່າງ, ອັດຕາຄອບຄົວທຸກຍາກ, ຊີວິດດ້ານເສດຖະກິດ, ວັດທະນະທຳ, ຈິດໃຈຂອງປະຊາຊົນໄດ້ຮັບການຍົກສູງຂຶ້ນ.
98%ຄອບຄົວຢູ່ເຂດຊົນນະບົດຫວຽດນາມໄດ້ນຳໃຊ້ຕາຫນ່າງໄຟຟ້າ
photo: internet
|
ບັນດາຜົນກງານກ່ຽວກັບການລົງທຶນກໍ່ສ້າງ, ບູລະນະ, ຍົກລະດັບຕາຫນ່າງໄຟຟ້າໃຫ້ແກ່ເຂດຊົນນະບົດ, ເຂດຫ່າງໄກສອກຫລີກ ໃນ 15 ປີຜ່ານມາ ໄດ້ຮັບການຮັບຮູ້ຈາກປະຊາຄົມໂລກວ່າ ແມ່ນຜົນງານພົ້ນເດັ່ນຂອງຫວຽດນາມໃນຂົງເຂດນຳໄຟຟ້າລົງສູ່ເຂດຊົນນະບົດ. ວິວັດການນຳໄຟຟ້າລົງສູ່ເຂດຊົນນະບົດໄດ້ປະກອບ 30-40%ເຂົ້າໃນການພັດທະນາເສດຖະກິດຢູ່ເຂດຊົນນະບົດ, ເປັນຕົ້ນແມ່ນປະກອບສ່ວນຢ່າງຕັ້ງຫນ້າເຂົ້າໃນການຫັນປ່ຽນໂຄງປະກອບເສດຖະກິດບັນດາຄອບຄົວຊາວຊົນເຜົ່າ, ສ້າງເງື່ອນໄຂສະດວກໃນການພັດທະນາກະສິກຳ, ປະກອບສ່ວນພັດທະນາບັນດາຂະແຫນງການ, ອາຊີບຫັດຖະກຳ. ໄຟຟ້າກໍໄດ້ປະກອບສ່ວນຍົກສູງຊີວິດທັງດ້ານວັດທະນະທຳ ແລະ ຈິດໃຈຂອງປະຊາຊົນ, ພິເສດແມ່ນຢູ່ເຂດຫ່າງໄກສອກຫລີກ, ເຂດຊົນເຜົ່າ. ພື້ນຖານໂຄງລ່າງກະສິກຳ, ຊົນນະບົດໄດ້ຮັບການປັບປຸງ, ມີກິດຈະກຳຫລາຍແຫ່ງໄດ້ຮັບການລົງທຶນ, ກໍ່ສ້າງໃຫມ່, ເປັນຕົ້ນແມ່ນລະບົບຄົມມະນາຄົມຊົນນະບົດ, ໄຟຟ້າ, ຊົນລະປະທານ, ສຸກສາລາຢູ່ຕາແສງ, ຕະຫລາດທ້ອງຖິ່ນ.
ຜົນສຳເລັດຂອງໂຄງການໄດ້ປະກອບສ່ວນເຮັດໃຫ້ໂສມຫນ້າເຂດຊົນນະບົດມີການປ່ຽນແປງຫລາຍຢ່າງ, ແມ່ນເງື່ອນໄຂສຳຄັນເພື່ອພັດທະນາການຜະລິດກະສິກຳ, ອຸດສາຫະກຳປຸງແຕ່ງ ແລະ ຂະແຫນງອາຊີບບໍລິການກະສິກຳ. ໃນນັ້ນ, ມູນຄ່າການຜະລິດກະສິກຳ ແຕ່ປີ 1998 ຮອດປີ 2013 ເພີ່ມຂຶ້ນ 6,6 ເທົ່າ, ອຸດສາຫະກຳປຸງແຕ່ງເພີ່ມຂຶ້ນ 3,5 ເທົ່າ, ລາຍຮັບສະເລ່ຍໃສ່ຫົວຄົນເພີ່ມຂຶ້ນ 8 ເທົ່າ.
ທ່ານ ຫວໍກີມກື້, ປະທານຄະນະກຳມະການປະຊາຊົນ ແຂວງ ຮ່າຕີ້ງ, ໃຫ້ຮູ້ວ່າ: ໃນໄລຍະ 15 ປີຜ່ານມາ, ໂຄງການນຳໄຟຟ້າລົງສູ່ເຂດຊົນນະບົດ ໄດ້ນຳມາເຊິ່ງປະສິດທິຜົນຢ່າງແທ້ຈິງໃນຊີວິດການເປັນຢູ່ໃຫ້ແກ່ປະຊາຊົນທ້ອງຖິ່ນ. ກ່ອນປີ 2000, ເມື່ອໂຄງການບໍ່ທັນປະຕິບັດ, ແຂວງ ຮ່າຕິ້ງ ມີພຽງ 75% ຈຳນວນຕາແສງ ແລະ 76% ຈຳນວນຄອບຄົວ ໄດ້ຊົມໃຊ້ໄຟຟ້າ. ຮອດທ້າຍປີ 2013 ໄດ້ມີ 100% ຈຳນວນ ຕາແສງ ແລະ 97% ຈຳນວນຄອບຄົວໄດ້ຮັບຜົນປະໂຫຍດຜ່ານໂຄງການນຳໄຟຟ້າລົງສູ່ຊົນນະບົດ. ທ່ານ ຫວໍກີມກື້ ໃຫ້ຮູ້ວ່າ:
“ຍ້ອນມີໂຄງການນຳໄຟຟ້າລົງສູ່ເຂດຊົນນະບົດ ສະນັ້ນໄດ້ເຮັດໃຫ້ພື້ນຖານເສດຖະກິດສ້າງໂຄງປະກອບຄືນໃຫມ່, ຫັນປ່ຽນໂດຍພື້ນຖານ. ຕົວຢ່າງຄື: ຮອດປີ 2013 ໂຄງປະກອບພື້ນຖານເສດຖະກິດອຸດສາຫະກຳ, ການກໍ່ສ້າງ, ບໍລິການການຄ້າ ກວມເອົາ 82%, ກະສິກຳກວມພຽງ 18%. ຍ້ອນມີໂຄງການດັ່ງກ່າວ ໄດ້ເຮັດໃຫ້ການລ້ຽງສັດຂະຫຍາຍຕົວຄື: ການລ້ຽງກູ້ງ, ລ້ຽງງົວ, ໝູ ເປັນຕົ້ນແມ່ນການປຸງແຕ່ງຜະລິດຕະພັນກະເສດ, ສິນໃນນ້ຳ… ແລະອຸດສາຫະກຳທ້ອງຖິ່ນຕິດພັນ ກັບກະສິກຳ.”
ມາຮອດປະຈຸບັນ, ໂຄງການນຳໄຟຟ້າລົງສູ່ເຂດຊົນນະບົດໄດ້ພັດທະນາຢ່າງກ້າວກະໂດດຂັ້ນ ທັງລວງກວ້າງແລະລວງເລິກ, ໄຟຟ້າໄດ້ລົງສູ່ເຂດຊົນນະບົດທີ່ປະສົບກັບຄວາມຫຍຸ້ງຍາກ, ເຂດພູດອຍ ແລະ ໝູ່ເກາະ. ໄລ່ມາຮອດທ້າຍປີ 2013, ໄດ້ມີ 98% ຈຳນວນຄອບຄົວຢູ່ຊົນນະບົດໄດ້ຊົມໃຊ້ໄຟຟ້າ. ນີ້ແມ່ນຜົນງານອັນໃຫຍ່ຫລວງຊື່ງໄດ້ຮັບການຕີລາຄາສູງຈາກຫລາຍອົງການຈັດຕັ້ງສາກົນ ແລະ ນັກອຸປະຖຳ, ປະກອບສ່ວນສຳຄັນໃນການພັດທະນາເສດຖະກິດສັງຄົມ ແລະ ປະຕິບັດຈຸດໝາຍລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ຄຽງຄູ່ກັບການນຳໃຊ້ບັນດາແຫລ່ງທຶນສະຫນອງໄຟຟ້າໃຫ້ແກ່ບັນດາຕາແສງ, ບ້ານ, ຄອບຄົວທີ່ບໍ່ທັນໄດ້ຊົມໃຊ້ໄຟຟ້າຢູ່ເຂດດິນຕໍ່ແຜ່ນ ພ້ອມກັບຈຸດໝາຍຮັບປະກັນຄວາມສະຫງົບປອດໄພເຂດທະເລໝູ່ເກາະ, ມີຫລາຍໂຄງການສະຫນອງໄຟຟ້າຈາກຕາຫນ່າງໄຟຟ້າແຫ່ງຊາດດ້ວຍສາຍກາບໄດ້ຮັບການຜັນຂະຫຍາຍປະຕິບັດ, ໃນນັ້ນ ມີໂຄງການນຳໄຟຟ້າລົງສູ່ເມືອງເກາະ ໂກໂຕ ເພື່ອສະຫນອງໄຟຟ້າໃຫ້ແກ່ 1.600 ຄອບຄົວ. ທ່ານ ແຢນອຸດ, ຮອງປະທານສະພາຊົນເຜົ່າ ສັງກັດສະພາແຫ່ງຊາດຫວຽດນາມ ຕີລາຄາວ່າ: ໃນໄລຍະຜ່ານມາໂຄງການນຳໄຟຟ້າລົງສູ່ເຂດຊົນນະບົດ ໄດ້ຮັບການປະຕິບັດຢ່າງມີປະສິດທິຜົນ, ດ້ວຍບັນດາໂຄງການຢູ່ເຂດໄຕງວຽນ, ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ແລະ ບັນດາເຂດທະເລ,ໝູ່ເກາະ, ເຮັດໃຫ້ໂສມຫນ້າຊົນນະບົດມີການປ່ຽນແປງຫລາຍຢ່າງ. ທ່ານ ແຢນອຸດ ສະເຫນີວ່າ:
“ຄວາມສາມາດບົ່ມຊ້ອນຢູ່ເຂດຊົນນະບົດ ແລະ ເຂດຊົນເຜົ່າສ່ວນຫນ້ອຍ ຍັງໃຫຍ່ຫລວງຢູ່. ສະນັ້ນ ລັດຖະບານ ຄວນຍູ້ແຮງກວ່າອີກ ເພື່ອເຮັດແນວໃດເສີມຂະຫຍາຍເຂດທ່ົງພຽງແມ່ນ້ຳຂອງ. ຖ້າຫາກມີໄຟຟ້າໃຊ້ ຈະປະກອບສ່ວນຫລຸດຜ່ອນ ລາຍຈ່າຍໃນການຜະລິດເຂົ້າ ແລະ ຍູ້ແຮງການພັດທະນາການຜະລິດ, ພິເສດ ພັດທະນາບັນດາໝູ່ບ້ານອາຊີບຄື: ຫາສິນທະເລ.”
ບັນດາໝາກຜົນກ່ຽວກັບການລົງທຶນ, ບູລະນະ, ຍົກລະດັບຕາຫນ່າງໄຟຟ້າໃຫ້ແກ່ເຂດຊົນນະບົດ, ເຂດຫ່າງໄກສອກຫລີກຂອງຫວຽດນາມ ໄດ້ຮັບຖືວ່າ: ແມ່ນເງື່ອນໄຂສຳຄັນເພື່ອພັດທະນາການຜະລິດ, ຮັບໃຊ້ການພັດທະນາກະສິກຳ, ຍູ້ແຮງການຫັນເປັນອຸດສາຫະກຳ ແລະ ທັນສະໄຫມ. ປະຈຸບັນ, ທົ່ວປະເທດ ຍັງມີ 91 ຕາແສງ ແລະ 550.000 ຄອບຄົວບໍ່ທັນໄດ້ຊົມໃຊ້ໄຟຟ້າ, ສ່ວນຫລາຍແມ່ນສຸມໃສ່ບັນດາບໍລິເວນປະສົບກັບຄວາມຫຍຸ້ງຍາກ, ເຂດຊາຍແດນ, ໝູ່ເກາະ. ສະນັ້ນ ເພື່ອສຳເລັດຈຸດໝາຍ ແຕ່ນີ້ຮອດປີ 2020, 100% ຕາແສງ ແລະ ປະຊາຊົນໄດ້ນຳໃຊ້ຕາຫນ່າງໄຟຟ້າແຫ່ງຊາດ, ລັດຈະສືບຕໍ່ນຳໄຟຟ້າລົງສູ່ຕາແສງ, ບ້ານ ແລະ ຄອບຄົວບໍ່ທັນໄດ້ຊົມໃຊ້ໄຟຟ້າ, ພ້ອມທັງຍົກສູງກຳລັງຄວາມສາມາດການສະຫນອງ ແລະ ຮັບປະກັນຄຸນນະພາບໄຟຟ້າ, ຮັບໃຊ້ການຫັນປ່ຽນ, ພັດທະນາບັນດາຮູບແບບໃຫມ່ໃນການຜະລິດກະສິກຳ. ທ່ານ ຮ່ວາງກວກເວື້ອງ, ປະທານສະພາສະມາຊິກກຸ່ມບໍລິສັດໄຟຟ້າ ຫວຽດນາມ (EVN) ໃຫ້ຮູ້ວ່າ:
“ໃນໄລຍະຈະມາເຖິງ EVN ຈະສືບຕໍ່ນຳຕາຫນ່າງໄຟຟ້າລົງສູ່ບັນດາຕາແສງຍັງເຫລືອ ເພື່ອຈຸດໝາຍສຸດທ້າຍ ແມ່ນສະຫນອງໄຟຟ້າໃຫ້ແກ່ປະຊາຊົນດີກວ່າ. ນອກນັ້ນ EVN ຫັນຮູບແບບຄຸ້ມຄອງຕາຫນ່າງໄຟຟ້າຊົນນະບົດເປັນຫລາຍຮູບຫລາຍແບບ. ”
ເພື່ອຈຸດໝາຍນຳໄຟຟ້າລົງສູ່ເຂດຊົນນະບົດໃນປີ 2020, ໃນໄລຍະຈະມາເຖິງ ລັດຖະບານ ຈະບຸລິມະສິດແຫລ່ງທຶນ ODA ແລະ ບັນດາແຫລ່ງທຶນອື່ນໃຫ້ແກ່ຂະແຫນງໄຟຟ້າ ເພື່ອປະຕິບັດການຍົກລະດັບ, ບູລະນະຕາຫນ່າງໄຟຟ້າຢູ່ຊົນນະບົດ. ນອກນັ້ນ ຢາກມີການຮ່ວມແຮງຮ່ວມໃຈຂອງວິສາຫະກິດ ແລະ ປະຊາຊົນ ເພື່ອກໍ່ສ້າງລະບົບຕາຫນ່າງໄຟຟ້າຢ່າງປອດໄພ, ປະສິດທິຜົນ ເພື່ອຮັບໃຊ້ຄວາມຕ້ອງການນຳໃຊ້ໄຟຟ້າໃຫ້ແກ່ການດຳເນີນຊີວິດ ແລະ ພັດທະນາເສດຖະກິດຂອງບັນດາທ້ອງຖິ່ນ, ປະຕິບັດຫັນກະສິກຳ, ຊົນນະບົດເປັນອຸດສາຫະກຳ ແລະ ທັນສະໄຫມ.