ແຜນຮ່າງພັດທະນາການທ່ອງທ່ຽວຫວຽດນາມ ໄດ້ວາງຄາດໝາຍຮອດປີ 2020, ດຶງດູດນັກທ່ອງທ່ຽວສາກົນໃຫ້ໄດ້ແຕ່ 14 – 15 ລ້ານເທື່ອຄົນ, ເຕີບໂຕລະເລ່ຍບັນລຸແຕ່ 12 – 14%/ປີ ໃນໄລຍະ 2015 – 2020. ຂະແໜງທ່ອງທ່ຽວສູ້ຊົນປະກອບເຂົ້າ GDP ແຕ່ 9 – 10%, ຍອດລາຍຮັບຈາກນັກທ່ອງທ່ຽວບັນລຸ 29 – 32,5 ຕື້ USD; ສ້າງວຽກເຮັດງານທຳໃຫ້ 3,5 ລ້ານຄົນ, ໃນນັ້ນວຽກເຮັດງານທຳໂດຍກົງແມ່ນກວ່າ 1 ລ້ານຄົນ. ເພື່ອປະຕິບັດບັນດາຄາດໝາຍດັ່ງກ່າວໃຫ້ໄດ້, ຂະແໜງທ່ອງທ່ຽວພວມມານະພະຍາຍາມຟື້ນຟູບັນດາຂໍ້ຈຳກັດ, ຍົກສູງປະສິດທິຜົນໃນວຽກງານສົ່ງເສີມໂຄສະນາການທ່ອງທ່ຽວ, ລະດົມບັນດາແຫຼ່ງກຳລັງສັງຄົມໃຫ້ແກ່ການພັດທະນາການທ່ອງທ່ຽວ. ພ້ອມທັງສ້າງເງື່ອນໄຂສະດວກກ່ຽວກັບລະບຽບການເຂົ້າເມືອງ; ພັດທະນາຄົມມານະຄົມສາກົນ ແລະ ພາຍໃນປະເທດ. ພ້ອມກັບການຍົກສູງຄຸນນະພາບແຫຼ່ງຊັບພະຍາກອນມະນຸດດ້ານການທ່ອງທ່ຽວ, ຂະແໜງກໍ່ຕ້ອງເພີ່ມທະວີວຽກງານຄຸ້ມຄອງສະຖານທີ່ທ່ອງທ່ຽວຢ່າງໝັ້ນຄົງ ແລະ ສ້າງສະພາບແວດລ້ອມແຫ່ງການທ່ອງທ່ຽວສີວິໄລ, ໃກ້ຊິດສະໜິດສະໜົມ; ຍູ້ແຮງການຮ່ວມມືລະຫວ່າງຂະແໜງ, ລະຫວ່າງເຂດ. ທ່ານ ເຈີນເຊີນຫາຍ, ຮອງປະທານຄະນະກຳມະການປະຊາຊົນແຂວງ ແຄ໋ງຮ່ວາ, ເຊິ່ງແມ່ນແຂວງທີ່ຖືການທ່ອງທ່ຽວແມ່ນຂະແໜງເສດຖະກິດປາຍແຫຼມ ຖືວ່າ, ຕ້ອງມີບັນດາການປ່ຽນແປງເພື່ອດຶງດູດນັກທ່ອງທ່ຽວສາກົນ.
“ແຕ່ລະທ້ອງຖິ່ນມີວິທີພັດທະນາການທ່ອງທ່ຽວ ເພື່ອປະກອບເຂົ້າໃນ GDP ທົ່ວປະເທດ, ແຕ່ກ່ຽວກັບການພັດທະນາຜະລິດຕະພັນຍັງມີຄວາມແຕກຕ່າງກັນຫຼາຍ. ຂະແໜງທ່ອງທ່ຽວແມ່ນຂະແໜງເສດຖະກິດປາຍແຫຼມ ແຕ່ຍັງມີບາງທ້ອງຖິ່ນຖືການທ້ອງທ່ຽວແມ່ນຂະແໜງລະຫຼິ້ນບັນເທິງເທົ່ານັ້ນ. ດ້ວຍທັດສະນະຄືແນວນັ້ນ, ເລື່ອງເອົາໃຈໃສ່ລົງທຶນ, ນະໂຍາບໃຫ້ການທ່ອງທ່ຽວ, ບໍ່ມີຈຸດສຸມ”.
ຕາມການສຳຫຼວດຄຳເຫັນຂອງນັກຄຸ້ມຄອງດ້ານການທ່ອງທ່ຽວ 1.200 ຄົນແລ້ວ, ຫວຽດນາມ ຢືນອັນດັບທີ 2 ຢູ່ອາຊີ ແລະທີ 16 ຢູ່ໃນໂລກ ກ່ຽວກັບຄວາມສາມາດບົ່ມຊ້ອນພັດທະນາການທ່ອງທ່ຽວ. ຄວາມຈິງໄດ້ຊີ້ໃຫ້ເຫັນວ່າ, ໃນໄລຍະຜ່ານມາ, ການທ່ອງທ່ຽວຂອງຫວຽດນາມ ໄດ້ມີການເຕີບໂຕຢ່າງໄວ, ປະກອບສ່ວນເຂົ້າໃນການພັດທະນາເສດຖະກິດຂອງປະເທດຫຼາຍພໍສົມຄວນ, ມີການກະທົບຕັ້ງໜ້າໃນການສ້າງວຽກເຮັດງານທຳ, ຫັນປ່ຽນໂຄງປະກອບດ້ານແຮງງານ. ເຖິງຢ່າງໃດກໍ່ຕາມ, ສຳລັບບັນດາວິສາຫະກິດເຮັດວຽກງານທ່ອງທ່ຽວ, ທາງຂະແໜງຄວນມີກົນໄກທີ່ສະດວກສະບາຍ, ເປີດເຜີຍກວ່າອີກ ເພື່ອແນໃສ່ດຶງດູດບັນດານັກລົງທຶນຢູ່ພາຍໃນ ແລະ ຕ່າງປະເທດລົງທຶນເຂົ້າບັນດາຂົງເຂດຄື ພື້ນຖານໂຄງລ່າງ, ບັນດາລາຍການທ່ອງທ່ຽວ. ທ່ານ ຮ່າວັນຊຽວ, ຮອງຫົວໜ້າກົມໃຫຍ່ທ່ອງທ່ຽວຫວຽດນາ, ຖືວ່າ.
“ຊຸກຍູ້ການລົງທຶນຕາມແຜນການທີ່ວາງອອກ, ລົງທຶນເຂົ້າໃນບັນດາຂົງເຂດຈຸດສຸມ. ບັນດາການບໍລິການນີ້ຕ້ອງມີບັນດານັກລົງທຶນຕ່າງປະເທດໃຫຍ່, ມີຍຸດທະສາດເພື່ອຊີ້ນຳນຳພາກ່ຽວກັບການບໍລິການ, ຈາກນັ້ນບັນດານັກລົງທຶນຈະປະຕິບັດຕາມ, ສ້າງສະພາບລວມເພື່ອຕ້ອບສະໜອງຄວາມຕ້ອງການດ້ານການບໍລິການທ່ອງທ່ຽວເປັນຢ່າງດີ”.
ທີ່ກອງປະຊຸມທົ່ວປະເທດກ່ຽວກັບການພັດທະນາການທ່ອງທ່ຽວ ທີ່ຫາກໍດຳເນີນຢູ່ນະຄອນໂຮ້ຍອານ, ແຂວງກວາງຈິ້, ມີຜູ້ແທນຫຼາຍທ່ານໄດ້ຖືວ່າ: ຂະແໜງທ່ອງທ່ຽວຕ້ອງຂົນຂວາຍທັງປະຊາຄົມເຂົ້າຮ່ວມການບໍລິການທ່ອງທ່ຽວ, ສ້າງການຮ່ວມສຳພັນລະຫວ່າງບັນດາຂະແໜງການ, ຂົງເຂດອື່ນ. ພິເສດ, ເພື່ອດຶງດູດນັກທ່ອງທ່ຽວສາກົນ, ລັດຖະບານ ຕ້ອງມີບັນດາມາດຕະການຄື: ຍົກເລີກວີຊາໃຫ້ນັກທ່ອງທ່ຽວຫຼາຍປະເທດກວ່າ ເພື່ອແນໃສ່ຫຼຸດຜ່ອນເວລາ, ຫຼຸດຜ່ອນລາຍຈ່າຍ ແລະ ຫຼຸດຜ່ອນບັນດາລະບຽບການເຂົ້າອອກເມືອງຫວຽດນາມ. ຕາມບັນດາວິສາຫະກິດທ່ອງທ່ຽວແລ້ວ, ຕ້ອງພິຈາລະນາການວາງແຜນການທ່ອງທ່ຽວຢ່າງໄວ ເພື່ອພັດທະນາຢ່າງມີຈຸດສຸມ, ພ້ອມກັນນັ້ນຍຸດທະສາດໂຄສະນາການທ່ອງທ່ຽວແຫ່ງຊາດຕ້ອງເປັນເອກະພາບ, ປະຕິບັດໃນໄລຍະຍາວ, ມີຂັ້ນຕອນ, ມີສີສັນເພື່ອດຶງດູດນັກທ່ອງທ່ຽວ. ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ: ລັດຖະບານ ຈະຍື່ນສະເໜີຕໍ່ສະພາແຫ່ງຊາດ ປະກາດໃຊ້ກົດໝາຍວ່າດ້ວຍການທ່ອງທ່ຽວ ສະບັບໃໝ່ ດ້ວຍເງື່ອນໄຂຢ່າງພຽງພໍ ເພື່ອນຳການທ່ອງທ່ຽວໃຫ້ກາຍເປັນຂະແໜງເສດຖະກິດປາຍແຫຼມ.
“ຕາມຂ້າພະເຈົ້າແລ້ວ, ຢາກເຮັດວຽກງານທ່ອງໃຫ້ບັນລຸຜົນສຳເລັດ, ສິ່ງທຳອິດແມ່ນຕ້ອງສ້າງເງື່ອນໄຂສະດວກກ່ຽວກັບລະບອບ, ນະໂຍາຍ, ກົດໝາຍ. ນັ້ນແມ່ນລະບອບ, ກົນໄກ. ສິ່ງສຳຄັນໜຶ່ງອີກເຊິ່ງພວກເຮົາພວມເອົາໃຈໃສ່ນັ້ນແມ່ນ, ປະຊາຄົມເຮັດທ່ອງທ່ຽວ, ສ້າງຄວາມປະທັບໃຈອັນດີງາມກ່ຽວກັບຊາວຫວຽດນາມ. ປະເທດພວກເຮົາຕ້ອງເຮັດໄດ້ຄືແນວນັ້ນ ແລະ ປະຊາຊົນທ້ອງຖິ່ນຂອງພວກເຮົາຫຼາຍຄົນມີຄວາມຮັກແພງແຂກຄົນ, ນັ້ນແມ່ນມູນເຊື້ອອັນລ້ຳຄ່າຂອງຊາດເຮົາ ແລະ ນັ້ນແມ່ນສາຍເຫດສຳຄັນເພື່ອບັນລຸຜົນສຳເລັດ”.
ທ່ານນາຍົກລັດຖະມົນຕີເນັ້ນໜັກວ່າ: ຫວຽດນາມ ແມ່ນປະເທດມີມໍລະດົກວັດທະນະທຳໂລກຫຼາຍແຫ່ງ, ປະຊາຊົນມີຄວາມໃກ້ຊິດສະໜິດສະໜົມ, ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍໄດ້ຮັບປະກັນ… ນັ້ນແມ່ນສິ່ງທີ່ດຶງດູດນັກທ່ອງທ່ຽວສາກົນ.
“ທົ່ວປວງຊົນເຮັດການທ່ອງທ່ຽວ, ນີ້ແມ່ນທ່າອ່ຽງຂອງໂລກ, ແຕ່ໃນນັ້ນຕ້ອງເສີມຂະຫຍາຍບົດບາດຂອງວິສາຫະກິດ. ຖ້າຫາກພວກເຮົາບໍ່ມີລະບົບວິສາຫະກິດເຕີບໃຫຍ່ ມີເຄື່ອງໝາຍການຄ້າ, ຮູ້ວິທີຈັດຕັ້ງວຽກງານ, ຈາກການໂຄສະນາ, ສົ່ງເສີມຜະລິດຕະພັນ, ການບໍລິການທ່ອງທ່ຽວ ຍາກທີ່ຈະບັນລຸຜົນສຳເລັດໄດ້. ໄປຄຽງຄູ່ກັນນັ້ນ, ແມ່ນທົ່ວສັງຄົມຕອງເຮັດການບໍລິການທ່ອງທ່ຽວ, ໃນນັ້ນວິສາຫະກິດ ແລະ ປະຊາຊົນເປັນເຈົ້າ, ແມ່ນກຳລັງໜູນພັດທະນາການທ່ອງທ່ຽວ. ມີເນື້ອໃນໜຶຶ່ງອີກນັ້ນແມ່ນ ພັດທະນາການທ່ອງທ່ຽວຕ້ອງມີລັກສະນະວິຊາການ, ຮັກສາຄຸນນະພາບ, ມີຈຸດສຸມເພື່ອແຜ່ລາມອອກສູ່ທົ່ວປະເທດ”.
ເພື່ອແນໃສ່ພັດທະນາການທ່ອງທ່ຽວໃນໄລຍະຈະມາເຖິງ, ລັດຖະບານຫວຽດນາມ ພວມມີບັນດາມາດຕະການແກ້ໄຂຢ່າງລະອຽດ, ຈາກການປ່ຽນໃໝ່ຈີນຕະນາການພັດທະນາການທ່ອງທ່ຽວ ຕະຫຼອດເຖິງການຮັກສາວັດທະນະທຳທີ່ເປັນມູນເຊື້ອຂອງປະເທດຊາດ. ພ້ອມກັນນັ້ນ, ນັບແຕ່ວັນທີ 01/01/2017 ເປັນຕົ້ນໄປ, ຫວຽດນາມ ຈະຜັນຂະຫຍາຍແຜນຮ່າງສະໜອງວີຊາເອເລກໂຕນິກ, ສະໜອງວີຊາຢູ່ດ່ານຊາຍແດນ, ສ້າງຄວາມສະດວກຢ່າງສຸດຂີດໃຫ້ນັກທ່ອງທ່ຽວ. ລັດຖະບານ, ວິສາຫະກິດ ແລະ ປະຊາຊົນຫວຽດນາມ ພວມມານະພະຍາຍາມກໍ່ສ້າງ, ພັດທະນາການທ່ອງທ່ຽວຂອງປະເທດຊາດໃຫ້ສົມກັບຄວາມສາມາດບົ່ມຊ້ອນ, ທ່າແຮງ ເພື່ອກາຍເປັນສະຖານທີ່ທ່ອງທ່ຽວທີ່ດູດດື່ມສຳລັບນັກທ່ອງທ່ຽວສາກົນ, ສ້າງກຳລັງໜູນພັດທະນາໃຫ້ເສດຖະກິດຂອງປະເທດຊາດ.