ໃນຮອບເວລາ 10 ປີມານີ້, ການສົ່ງອອກຜັກ, ໝາກໄມ້ເວົ້າລວມ, ພິເສດແມ່ນຜະລິດຕະພັນໝາກໄມ້ຂອງຫວຽດນາມ ມີລະດັບການເຕີບໂຕຢ່າງວ່ອງໄວ. ຖ້າຫາກປີ 2005, ຜັກ, ໝາກໄມ້ ມີໜ້າຢູ່ 36 ປະເທດ ແລະ ເຂດແຄ້ວນໃນໂລກ, ວົງເງິນການຄ້າບັນລຸກວ່າ 235 ລ້ານ USD, ໄລຮອດປີຜ່ານມາ, ໄດ້ມີ 60 ປະເທດ ແລະ ເຂດແຄ້ວນນຳເຂົ້າໝາກໄມ້ຂອງຫວຽດນາມ, ດ້ວຍວົງເງິນການຄ້າກວ່າ 1,8 ຕື້ USD. ໄລ່ສະເພາະເດືອນ 08/2016, ວົງເງິນສົ່ງອອກຜັກ, ໝາກໄມ້ບັນລຸ 1,7 ຕື້ USD, ເພີ່ມຂຶ້ນ 130% ເມື່ອທຽບໃຫ່ໄລຍະດຽວກັນຂອງປີ 2015. ການສົ່ງອອກຜັກ, ໝາກໄມ້ບັນລຸລະດັບເຕີບໂຕ ບໍ່ພຽງແຕ່ກາຍເປັນກຳລັງໜູນສ້າງຄວາມດຶງດູດບັນດາວິສາຫະກິດເຂົ້າຮ່ວມການລົງທຶນຕື່ມອີກເທົ່ານັ້ນ, ຫາກຍັງຊ່ວຍໃຫ້ຊາວກະສິກອນເພີ່ມລາຍຮັບ ແລະ ປ່ຽນແປງຈິນຕະນາການໃນການຈັດຕັ້ງການຜະລິດ ດ້ວຍບັນດາຂັ້ນຕອນການຜະລິດກະສິກຳປອດສານຜິດ ຕາມມາດຕະຖານ VietGap, GlobalGap… ອີກດ້ວຍ. ທ່ານ ຢ໋າບວັນແທ່ງ, ຫົວໜ້າກຸ່ມຜະລິດໝາກລິ້ນຈີ່ປອດສານຜິດ ທີ່ສົ່ງໄປຍັງອາເມລິກາ, ຢູ່ບ້ານ ແກ໋ບ 1, ຕາແສງຮົ່ງຢາງ, ເມືອງລຸກຫງ້ານ, ແຂວງບັັ໋ກຢາງ ໄດ້ແບ່ງປັນວ່າ.
“ໃນບ້ານ, ມີປະມານ 270 ຄອບຄົວ, ແຕ່ໃນໂຄງການມີພຽງ 6 ລະຫັດເຂດ. ໝາຍຄວາມວ່າ, ຍັງມີຫຼາຍຄອບຄົວເຫັນໄດ້ຜົນປະໂຫຍດຈາກການປູກໝາກລິ້ນຈີ່ປອດສານຜິດສົ່ງອອກຂອງບັນດາກຸ່ມຜະລິດແລ້ວ, ແຕ່ຍັງບໍ່ທັນເຂົ້າຮ່ວມ. ພວກຂ້າພະເຈົ້າປາດຖະໜາຢາກເປີດກວ້າງເຂດຜະລິດໝາກລິ້ນຈີ່ປອດສານຜິດຕື່ມອີກ ເພື່ອໃຫ້ບັນດາຄອບຄົວໃນບ້ານ ແລະ ຊາວກະສິກອນໃນເທດສະບານເມືອງຮົ່ງຢາງ ລ້ວນແຕ່ເຂົ້າຮ່ວມ”.
ຄຽງຂ້າງບັນດາຕະຫຼາດທີ່ເປັນມູນເຊື້ອແລ້ວ, ໃນໄລຍະຜ່ານມາ ຂະແໜງຜັກ, ໝາກໄມ້ ກໍຕັ້ງໜ້າເຊື່ອມໂຍງເຂົ້າຕະຫຼາດໃໝ່ຫຼາຍແຫ່ງ, ພິເສດແມ່ນບັນດາຕະຫຼາດທີ່ຮຽກຮ້ອງຕ້ອງການຄຸນນະພາບສູງຄື: ອາເມລິກາ, ສະຫະພາບເອີລົບ, ຍີ່ປຸ່ນ, ສ.ເກົາຫຼີ…. ລະດູເກັບກ່ຽວໝາກລິ້ນຈີ່ປີນີ້, ຫວຽດນາມ ຈະສົ່ງອອກໄປຍັງອົດສະຕາລີ, ອາເມລິກາ. ທ່ານ ຫງວຽນຈິ໋ຫງອກ, ບໍລິສັດຫຸ້ນສ່ວນກ້າວໜ້າສາກົນ, ກຸ່ມບໍລິສັດ AIC, ສົ່ງອອກສະເພາະຜະລິດຕະພັນກະເສດ ແລະ ລົງທຶນກະສິກຳເຕັກໂນໂລຊີສູງ ຖືວ່າ, ເລື່ອງສົ່ງອອກໄປຍັງບັນດາຕະຫຼາດມີຕ້ອງການມີຄຸນນະພາບສູງຈະນຳມາເຊິ່ງ “ຜົນປະໂຫຍດ 2 ດ້ານ” ທັງຫຼິກລ້ຽງສະພາບຜັກ, ໝາກໄມ້ຕ້ອງຂຶ້ນກັບຕະຫຼາດໃດໜຶ່ງ, ທັງຊ່ວຍໃຫ້ຊາວກະສິກອນປ່ຽນແປງຄວາມຊິນເຄີຍ, ແບບວິທີການຜະລິດ, ຫັນຈາກການຂາຍບັນດາຜະລິດຕະພັນທີ່ຕົນມີ ໄປສູ່ການຂາຍບັນດາຜະລິດຕະພັນທີ່ຕະຫຼາດມີຄວາມຕ້ອງການ. ນີ້ກໍແມ່ນທິດທາງທີ່ຈຳເປັນເຊິ່ງຂະແໜງກະສິກຳເວົ້າລວມ, ຂົງເຂດຜະລິດຕະພັນກະເສດເວົ້າສະເພາະຕ້ອງມຸ່ງໄປເຖິງ ໃນສະພາບຫວຽດນາມ ເຊື່ອມໂຍງເຂົ້າກັບຕະຫຼາດໂລກນັບມື້ນັບເລິກເຊິ່ງ, ກວ້າງຂວາງ.
“ເຊື່ອມໂຍງເຂົ້າກັບເສດຖະກິດສາກົນ ຮຽກຮ້ອງຕ້ອງມີການຜະລິດຕາມລະບົບມູນຄ່າ ແລະ ສິ່ງດັ່ງກ່າວໄດ້ເຮັດໃຫ້ຜະລິດຕະພັນກະເສດຂອງຫວຽດນາມ ພັດທະນາແບບຍືນຍົງ ແລະ ຮັບປະກັນລາຍຮັບເປັນປົກກະຕິໃຫ້ຊາວກະສິກອນ ເມື່ອມຸ່ງໄປເຖິງຕະຫຼາດສາກົນ. ສິ່ງດັ່ງກ່າວຍັງມີຄວາມໝາຍໃຫຍ່ຫຼວງທີ່ສຸດສຳລັບບັນດາວິສາຫະກິດສົ່ງອອກ ເພາະຄຸນນະພາບແມ່ນປັດໃຈຕັດສິນປະສິດທິຜົນການດຳເນີນທຸລະກິດຜະລິດຕະພັນກະເສດຂອງວິສາຫະກິດ ເມື່ອແຊກຊຶມເຂົ້າຕະຫຼາດ ແລະ ເຊັນສັນຍາບັນດາຄູ່ຮ່ວມມື”.
ຕາມທ່ານ ເຈີນດິ່ງລອງ, ປະທານສະມາຄົມແນວພັນປູກຫວຽດນາມ ແລ້ວ, ຄວາມສາມາດບົ່ມຊ້ອນໃນການສົ່ງອອກຜັກ, ໝາກໄມ້ຂອງຫວຽດນາມ ຍັງໃຫຍ່ຫຼວງຢູ່ ແລະ ຄວາມຕ້ອງການຂອງໂລກກໍ່ພວມເພີ່ມຂຶ້ນຢ່າງແຮງ. ປະຈຸບັນ, ມູນຄ່າສົ່ງອອກຜັກ, ໝາກໄມ້ຂອງຫວຽດນາມ ພວມມີທ່າເຕີບໂຕຢ່າງແຮງ, ແຕ່ຍັງຈຳກັດຢູ່ເມື່ອທຽບໃສ່ຄວາມຕ້ອງການ.
“ຕະຫຼາດຜັກ, ໝາກໄມ້ໂລກພວມພັດທະນາຢ່າງແຮງດ້ວຍຄວາມຕ້ອງການສູງ. ປະຈຸບັນ, ຊາວກະສິກອນເລີ່ມຮັບຮູ້ໄດ້ ແລະ ປ່ຽນແປງຄວາມຊິນເຄີຍໃນການປູກຟັງ, ນຳໃຊ້ບັນດາຮູບແບບການຜະລິດ ເຮັດກະສິກຳທີ່ດີ (VietGap) ປອດໄພ ຜ່ານນັ້ນ, ຊ່ວຍເພີ່ມມູນຄ່າໃຫ້ຜະລິດຕະພັນກະເສດ. ຂະແໜງຜັກ, ໝາກໄມ້ມີຄວາມສາມາດບົ່ມຊ້ອນພັດທະນາຫຼາຍຢ່າງໃນໄລຍະຈະມາເຖິງ, ພິເສດແມ່ນ ເມື່ອມີການເຂົ້າຮ່ວມຂອງບັນດາວິສາຫະກິດທີ່ມີເຕັກໂນໂລຊີສູງ, ມີແນວພັນປູກໃໝ່ທີ່ມີຄຸນນະພາບຂອງບັນດາສະຖາບັນຄົ້ນຄວ້າ ແລະ ຂອງຊາວກະສິກອນທີ່ໄດ້ນຳໃຊ້ບັນດາຂັ້ນຕອນການຜະລິດທີ່ກ້າວໜ້າ, ບັນດາປັດໃຈດັ່ງກ່າວຈະນຳມາເຊິ່ງຜົນສຳເລັດໃຫ້ຂະແໜງຜັກ, ໝາກໄມ້”.
ເຖິງຢ່າງໃດກໍ່ຕາມ, ຮົ້ວກີດຂວາງໃຫຍ່ກວ່າໝູ່ສຳລັບຂະແໜງຜັກ, ໝາກໄມ້ໃນປະຈຸບັນ ແມ່ນບັນດາຂໍ້ກຳນົດກ່ຽວກັບການກວດກາໂລກລະບາດ ແລະ ຄວາມປອດໄພດ້ານສະບຽງອາຫານ. ເພື່ອໃຫ້ການສົ່ງອອກຜັກ, ໝາກໄມ້ ສືບຕໍ່ເຕີບໂຕຢ່າງແຮງ, ໄປຄຽງຂູ່ກັບການຄວບຄຸມຄຸນນະພາບການປູກຜັກ, ໝາກໄມ້ ຢູ່ພາຍໃນປະເທດ, ບັນດາວິສາຫະກິດຕ້ອງປະຕິບັດຕາມຂໍ້ກຳນົດນຳເຂົ້າຂອງຕະຫຼາດຕ່າງໆ. ທ່ານ ເລເຊີນຮ່າ, ຫົວໜ້າຫ້ອງກວດກາໂລກລະບາດ, ກົມປົກປ້ອງພືດ, ກະຊວງກະສິກຳ ແລະ ພັດທະນາຊົນນະບົດ, ໃຫ້ຮູ້ວ່າ.
“ໝາກໄມ້ຫວຽດນາມ ນັບມື້ນັບມີໜ້າຢູ່ບັນດາຕະຫຼາດຕ້ອງການຄຸນນະພາບສູງ. ບົນພື້ນຖານນີ້, ໃນໄລຍະຈະມາເຖິງ, ພວກຂ້າພະເຈົ້າຈະຄົ້ນຄວ້າຄວາມຕ້ອງການຂອງບັນດາຕະຫຼາດ ແລະ ສຸມໃສ່ເຂົ້າບັນດາຕະຫຼາດທີ່ມີຄວາມຕ້ອງການຈຳໜ່າຍສູງ ແລະ ມີມູນຄ່າສູງເປັນຕົ້ນ. ພ້ອມທັງຂຸດຄົ້ນບັນດາຕະຫຼາດທີ່ມີຄວາມສາມາດບົ່ມຊ້ອນໃນພາກພື້ນອາຊຽນ ແລະ ຈີນ. ສຳລັບແຕ່ລະຕະຫຼາດຕ້ອງການມີມາດຕະການທີ່ແຕກຕ່າງກັນເພື່ອໃຫ້ການສົ່ງອອກບັນລຸປະສິດທິຜົນສູງກວ່າ”.
ຜັກ, ໝາກໄມ້ເຕີບໂຕຢ່າງແຮງໃນຊຸມເດືອນຕົ້ນປີ ໃນສະພາບການສົ່ງອອກຜະລິດຕະພັນກະເສດຍັງປະສົບກັບຄວາມຫຍຸ້ງຍາກຫຼາຍຢ່າງ ໄດ້ຊີ້ໃຫ້ເຫັນຄວາມສາມາດບົ່ມຊ້ອນຂອງຂະແໜງຜັກ, ໝາກໄມ້ນັບມື້ນັບຫຼາຍ ຖ້າຫາກໄດ້ຮັບການລົງທຶນຢ່າງເໝາະສົມ. ຄຽງຂ້າງເລື່ອງຍູ້ແຮງການວາງແຜນຜັງເຂດປູກ, ແນວພັນປູກ, ເຕັກນິກໃນການປູກຟັງແລ້ວ, ວິສາຫະກິດ ແລະ ຜູ້ຜະລິດພວມເອົາໃຈໃສ່ເຖິງການລົງທຶນອຸສາຫະກຳປຸງແຕ່ງ, ຜ່ານນັ້ນຍົກສູງມູນຄ່າຜະລິດຕະພັນກະເສດສົ່ງອອກ.