(vovworld)- ວັນທີ 1/7, ກົດໝາຍວ່າດ້ວຍວິສາຫະກິດ ສະບັບປັບປຸງ ຈະມີຜົນສັກສິດຢ່າງເປັນທາງການ. ຕາມນັ້ນແລ້ວ, ການອອກຫນັງສືອະນຸຍາດດຳເນີນທຸລະກິດພຽງເສຍເວລາ 3 ມື້ ແທນທີ 5 -10 ມື້ຄືກ່ອນນີ້. ເລື່ອງຈົດທະບຽນດຳເນີນທຸລະກິດຂອງບັນດາສ່ວນບຸກຄົນ, ວິສາຫະກິດ ນັບມື້ນັບສະດວກນັ້ນໄດ້ຕອບສະຫນອງຄວາມຕ້ອງການພັດທະນາຂອງພື້ນຖານເສດຖະກິດຫວຽດນາມ.
ພາບປະກອບ:baomoi.com
|
ໃນໄຕມາດ 1, ພະແນກແຜນການ ແລະ ການລົງທຶນ ນະຄອນຮ່າໂນ້ຍ ແກ້ໄຂໄດ້ກວ່າ 3.400 ລະບຽບການຂໍຫນັງສືອະນຸຍາດສ້າງຕັ້ງວິສາຫະກິດ. ທ່ານ ຫງວຽນຕຽນຫອກ, ຮອງຫົວຫນ້າພະແນກແຜນການ ແລະ ການລົງທຶນ ນະຄອນ ຮ່າໂນ້ຍ ໃຫ້ຮູ້ວ່າ: ນະຄອນ ຮ່າໂນ້ຍ ແມ່ນທ້ອງຖິ່ນທຳອິດນຳໃຊ້ກົດໝາຍວ່າດ້ວຍວິສາຫະກິດປີ 2014 ສະບັບປັບປຸງ ໃນການອອກຫນັງສືອະນຸຍາດດຳເນີນທຸລະກິດ, ເຖິງວ່າ ມາຮອດວັນທີ 1/7 ກົດໝາຍດັ່ງກ່າວຈຶ່ງມີຜົນສັກສິດ. ສິ່ງດັ່ງກ່າວໄດ້ສ້າງເງື່ອນໄຂສະດວກທີ່ສຸດໃຫ້ແກ່ບັນດາວິສາຫະກິດໃນວິວັດການຈົດທະບຽນດຳເນີນທຸລະກິດ, ເຮັດລະບຽບການໃຫ້ສຳເລັດໂດຍໄວເພື່ອເຂົ້າຮ່ວມຕະຫລາດ ແລະ ແມ່ນຫນຶ່ງໃນບັນດາມາດຕະການເພື່ອເພີ່ມດັດຊະນີການແກ້ງແຍ້ງຂອງຮ່າໂນ້ຍ.
“ນະຄອນ ຮ່າໂນ້ຍ ໄດ້ຊີ້ນຳບັນດາຂະແຫນງການ, ພິເສດແມ່ນພະແນກແຜນການ ແລະ ການລົງທຶນ ສຳຫລວດກວດຄືນລະບຽບການຈົດທະບຽນດຳເນີນທຸລະກິດທັງໝົດ. ສະນັ້ນ ການຈົດທະບຽນສ້າງຕັ້ງວິສາຫະກິດໃຫມ່ມີແຕ່ເສຍເວລາພຽງ 3 ມື້ແທນທີ 5 ມື້ຄືແຕ່ກ່ອນ. ນີ້ແມ່ນເງື່ອນໄຂສຳຄັນທີ່ສຸດ ເພື່ອໃຫ້ວິສາຫະກິດມີເວລາເຂົ້າຮ່ວມຕະຫລາດໂດຍໄວ ແລະ ຈຳນວນວິສາຫະກິດຈົດທະບຽນດຳເນີນທຸລະກິດເພີ່ມຂຶ້ນ.”
ໃນໄລຍະກວ່າ 20 ປີຜ່ານມາ, ເລື່ອງຈົດທະບຽນດຳເນີນທຸລະກິດຢູ່ ຫວຽດນາມ ໄດ້ມີການຫັນປ່ຽນສຳຄັນ, ນັບມຶ້ື້ນັບຕອບສະຫນອງຄວາມຕ້ອງການພັດທະນາຂອງພື້ນຖານເສດຖະກິດ, ພິເສດ ແມ່ນຮັບໃຊ້ການເຕີບໂຕດ້ານເສດຖະກິດພາກເອກະຊົນກໍຄືດຶງດູດວິສາຫະກິດລົງທຶນຂອງຕ່າງປະເທດຢ່າງແຮງ. ໃນນັ້ນ ເວລາຈົດທະບຽນສ້າງຕັ້ງວິສາຫະກິດໄດ້ຫລຸດຜ່ອນຈາກເວລາ 15 ມື້ ໃນປີ 2008 ລົງເຫລືອພຽງ 3 ມື້ເທົ່ານັ້ນ. ຍ້ອນປັບປຸງການເຮັດລະບຽບການໄດ້ສ້າງສະພາບແວດລ້ອມແຫ່ງການດຳເນີນທຸລະກິດຂອງຫວຽດນາມຢ່າງສະດວກສະບາຍ. ທ່ານ ຫງວຽນວັນຢາບ, ຄະນະທະນາຍຄວາມນະຄອນ ຮ່າໂນ້ຍ ໃຫ້ຮູ້ວ່າ:
“ການປະຕິຮູບລະບຽບການບໍລິຫານ ນັບມື້ນັບກ້າວຫນ້າກວ່າ ໄດ້ຊຸກຍູ້ກໍຄືນຳມາເຊິ່ງບັນດາກາລະໂອກາດໃໝ່ໃຫ້ແກ່ວິສາຫະກິດ, ສ້າງເງື່ອນໄຂໃຫ້ວິສາຫະກິດເຂົ້າຮ່ວມຕະຫລາດໄວກວ່າ ແລະສາມາດກຳໄດ້ກາລະໂອກາດດີກວ່າ. ການປະຕິຮູບລະບຽບການບໍລິຫານຍິ່ງສະດວກເທົ່າໃດ ວິສາຫະກິດຍິ່ງຫລຸດຜ່ອນລາຍຈ່າຍກໍຄືເວລາໄດ້ເທົ່ານັ້ນ, ສ້າງເງື່ອນໄຂໃຫ້ວິສາຫະກິດພັດທະນາ.”
ປະຈຸບັນ, ກະຊວງແຜນການ ແລະ ການລົງທຶນ ຫວຽດນາມ ພວມຜັນຂະຫຍາຍໂຄງການເປີດກວ້າງບັນດາຮູບການວິສາຫະກິດໃນລະບົບຂໍ້ມູນຂ່າວຈົດທະບຽນວິສາຫະກິດແຫ່ງຊາດ. ຈາກນັ້ນ ບັນດາວິສາຫະກິດສາມາດແຈ້ງການຈົດທະບຽນດຳເນີນທຸລະກິດ ແລະເປີດກວ້າງບັນດາຮູບການດຳເນີນທຸລະກິດຜ່ານການບໍລິການຈົດທະບຽນວິສາຫະກິດທາງເຄືອຂ່າຍເອເລັກໂຕນິກ ແລະ ການບໍລິການສະຫນອງຂໍ້ມູນຂ່າວຈົດທະບຽນວິສາຫະກິດ. ສິ່ງດັ່ງກ່າວຈະຊ່ວຍໃຫ້ບັນດາວິສາຫະກິດປະຢັດຄ່າໃນ ການເຄື່ອນໄຫວຈົດທະບຽນສ້າງຕັ້ງໃຫມ່ກໍຄືຈົດທະບຽນປ່ຽນແປງເນື້ອໃນຈົດທະບຽນວິສາຫະກິດ. ຕາມທ່ານ ຟານດືກຮຽວ, ຮອງຫົວຫນ້າຄະນະສະພາບແວດລ້ອມດຳເນີນທຸລະກິດ ແລະ ກຳລັງແກ້ງແຍ້ງ, ຫົວຫນ້າສະຖາບັນຄຸ້ມຄອງເສດຖະກິດສູນກາງແລ້ວ, ວິສາຫະກິດແຕ່ລະແຫ່ງຈົດທະບຽນດຳເນີນທຸລະກິດທາງເຄືອຄ່າຍລະບົບຂໍ້ມູນຂ່າວຈົດທະບຽນວິສາຫະກິດແຫ່ງຊາດແມ່ນຫລຸດລາຍຈ່າຍໄດ້ 1 ລ້ານດົງ, ສະເລ່ຍແຕ່ລະປີ ມີປະມານວິສາຫະກິດ 70.000 ແຫ່ງຈົດທະບຽນດຳເນີນທຸລະກິດໃຫມ່ ແລະ ວິສາຫະກິດ 200.000 ແຫ່ງ ຈົດທະບຽນປ່ຽນແປງສຳເນົາເອກະສານ.
“ເລື່ອງສ້າງຕັ້ງຖານຂໍ້ມູນດຳເນີນທຸລະກິດນີ້ ແມ່ນຫນຶ່ງໃນບັນດາບົດຮຽນສຳເລັດຜົນຂອງການສ້າງຄວາມສະດວກໃນການເຄື່ອນໄຫວດຳເນີນທຸລະກິດ, ໃນການຈັດຕັ້ງປະຕິບັດກົດໝາຍ. ລະບົບນີ້ ມີຄຸນປະໂຫຍດວ່າ: ເມື່ອລະບຽບການບໍລິຫານມີຄວາມສະດວກ ພິເສດ ໃນການຈັດຕັ້ງປະຕິບັດ ເວລານັ້ນ ອັດຕາສ່ວນວິສາຫະກິດປະຕິບັດຕາມກົດໝາຍຈະຢູ່ໃນລະດັບສູງກວ່າ. ສິ່ງດັ່ງກ່າວສົ່ງຜົນກະທົບອັນໃຫຍ່ຫລວງໃນການດຳເນີນທຸລະກິດກໍຄືປະສິດທິຜົນການຄຸ້ມຄອງລັດ.”
ເລື່ອງສ້າງສະພາບແວດລ້ອມແຫ່ງການດຳເນີນທຸລະກິດສະດວກ ແລະ ເປັນປົກກະຕິໃຫ້ບັນດາວິສາຫະກິດ ແມ່ນບາດກ້າວເດີນຂອງລັດຖະບານ ເພື່ອເພີ່ມລັກສະນະແກ້ງແຍ້ງໃຫ້ສະພາບແວດລ້ອມແຫ່ງການດຳເນີນທຸລະກິດ. ພ້ອມກັບການສ້າງລະບົບຂໍ້ມູນຂ່າວຈົດທະບຽນວິສາຫະກິດແຫ່ງຊາດ, ເລື່ອງຫລຸດຜ່ອນເວລາອອກຫນັງສືອະນຸຍາດດຳເນີນທຸລະກິດຈະສ້າງຄວາມສະດວກໃຫ້ວິສາຫະກິດໃນການເຂົ້າຮ່ວມຕະຫລາດກໍຄືມີຂໍ້ມູນຂ່າວຢ່າງຊັດເຈນ ແລະຄົບຖ້ວນກວ່າ, ສ້າງຄວາມໂປ່ງໃສໃຫ້ລະບົບວິສາຫະກິດເຄື່ອນໄຫວດຳເນີນທຸລະກິດຢູ່ຫວຽດນາມ.