ປີ 2016, ການເຕີບໂຕ GDP ຂອງຫວຽດນາມ ທັງປີ ບັນລຸ 6,21%. ເຖິງວ່າບໍ່ບັນລຸໄດ້ຄາດໝາຍຂອງແຜນການໂດຍສະພາແຫ່ງຊາດວາງອອກແມ່ນ 6,7% ກໍຕາມ, ແຕ່ກໍ່ໄດ້ສະແດງໃຫ້ເຫັນຄວາມມານະພະຍາຍາມຂອງບັນດາວິສາຫະກິດ, ບັນດານັກຜະລິດໃນ ໜຶ່ງປີທີ່ປະສົບກັບຄວາມຫຍຸ້ງຍາກຫຼາຍຢ່າງ. ສາຍເຫດຕົ້ນຕໍທີ່ພາໃຫ້ລະດັບການເຕີບໂຕຍັງບໍ່ທັນບັນລຸໄດ້ຄາດໝາຍທີ່ໄດ້ວາງອອກແມ່ນຍ້ອນສາຍເຫດຕ່າງໆຄື: ສະພາບໄພທຳມະຊາດ, ໄພແຫ້ງແລງ, ນ້ຳເຄັມຊຶມເຂົ້າຢູ່ເຂດທົ່ງພຽງແມ່ນ້ຳຂອງທາງພາກໃຕ້ໄດ້ສົ່ງຜົນສະທ້ອນບໍ່ແມ່ນໜ້ອຍເຖິງສະພາບຜະລິດກະສິກຳ. ຄຽງຂ້າງນັ້ນ, ການສົ່ງອອກຖືກຫຼຸດລົງ ລວມທັງລາຄານ້ຳມັນດິບໃນໂລກກໍ່ຫຼຸດລົງ ພ້ອມກັບການໜັງຕີງໃນຕະຫຼາດສາກົນ ໄດ້ສົ່ງຜົນກະທົບບໍ່ແມ່ນໜ້ອຍເຖິງພື້ນຖານເສດຖະກິດຫວຽດນາມ. ເຖິງຢ່າງໃດກໍ່ຕາມ, ໃນຂະນະທີ່ມີບາງຂະແໜງກະສິກຳ, ປ່າໄມ້ ແລະ ສິນໃນນ້ຳ ພວມປະສົບກັບຄວາມຫຍຸ້ງຍາກກໍ່ຕາມ, ບັນດາຂົງເຂດການບໍລິການ, ອຸດສາຫະກຳ, ຜະລິດ, ປຸງແຕ່ງ, ການກໍ່ສ້າງ… ພັດມີລະດັບເຕີບໂຕດີພໍສົມຄວນ. ສິ່ງທີ່ໜ້າສົນໃຈແມ່ນດັດຊະນີເຕີບໂຕຂອງຂະແໜງປຸງແຕ່ງ, ສ້າງສົ້ນອອກມີສະຖຽນລະພາບໃຫ້ພື້ນຖານເສດຖະກິດ. ທ່ານ ຟ້າມດິ່ງຖຸຍ, ຫົວໜ້າກົມສະຖິຕິອຸດສາຫະກຳ ໃຫ້ຮູ້ວ່າ.
“ດັດຊະນີການຜະລິດອຸດສາຫະກຳຂອງຂະແໜງຜະລິດປຸງແຕ່ງເພີ່ມຂຶ້ນສູງກວ່າໝູ່ໃນຫຼາຍປີຜ່ານມາ. ນີ້ແມ່ນສັນຍານຕັ້ງໜ້າ, ໜ້າຊົມຊື່ນ. ມີສັນຍານໜຶ່ງອີກນັ້ນແມ່ນ, ອຸດສາຫະກຳຜະລິດປຸງແຕ່ງມີສະຖຽນລະພາບ. ສິ່ງດັ່ງກ່າວຊີ້ໃຫ້ເຫັນວ່າ, ການຜະລິດອຸດສາຫະກຳ, ພິເສດແມ່ນອຸດສາຫະກຳຜະລິດປຸງແຕ່ງໄດ້ບັນລຸລະດັບເຕີບໂຕສູງ, ຊ່ວຍໃຫ້ລະດັບເຕີບໂຕລວມຂອງພື້ນຖານເສດຖະກິດໃນປີນີ້”.
ພິເສດ, ປີ 2016 ແມ່ນປີເປັນຂີດໝາຍໃນຂົງເຂດເສດຖະກິດຕ່າງປະເທດ ເມື່ອຫວຽດນາມ ເຂົ້າຮ່ວມບັນດາເຂດຄ້າຂາຍເສລີ ດ້ວຍການລົງນາມໃນບັນດາສັນຍາ FTA ທີ່ໄດ້ ແລະ ພວມມີຜົນສັກສິດ. ໃນປີ 2016, ເສດຖະກິດຫວຽດນາມ ມີຈຸດພົ້ນເດັ່ນນັ້ນແມ່ນ, ບັນດາວິສາຫະກິດມີເງິນລົງທຶນໂດຍກົງຈາກຕ່າງປະເທດ (FDI) ໄດ້ຮັບການພັດທະນານັບທັງ 2 ດັດຊະນີຄື: ດ້ານທຶນຄຳໝັ້ນສັນຍາ ແລະ ທຶນເພີ່ມເຕີມ, ພ້ອມທັງຮັກສາໄດ້ລະດັບປ່ອຍເງິນລົງທຶນໂດຍກົງຈາກຕ່າງປະເທດ. ບັນດາວິສາຫະກິດ FDI ໄດ້ປະກອບສ່ວນເຂົ້າລະດັບເຕີບໂຕ, ໃນການສົ່ງອອກແມ່ນ 70%. ນີ້ແມ່ນປະຖົມປັດໃຈອັນຕັ້ງໜ້າເພື່ອໃຫ້ຫວຽດນາມ ຍູ້ແຮງການພັດທະນາເສດຖະກິດຕ່າງປະເທດ.
ສິ່ງທີ່ໜ້າສົນໃຈອັນໜຶ່ງໃນປີຜ່ານມາ, ນັ້ນແມ່ນໄດ້ມີບາງຂະແໜງອຸດສາຫະກຳຜະລິດປຸງແຕ່ງ, ຜະລິດກະສິກຳເຕັກໂນໂລຊີສູງບັນລຸລະດັບເຕີບໂຕສູງ, ພິເສດແມ່ນການຜະລິດຜັກ, ໝາກໄມ້ ຍ້ອນນຳໃຊ້ເຕັກໂນໂລຊີຮັກສາ ແລະ ຂັ້ນຕອນຜະລິດປອດສານພິດ ຕອບສະໜອງບັນດາມາດຕະຖານສາກົນ ບັນລຸໄດ້ລະດັບເຕີບໂຕສູງກວ່າ. ໃຫ້ຂໍ້ສັງເກດກ່ຽວກັບດ້ານຕັ້ງໜ້ານີ້, ນັກຊ່ຽວຊານດ້ານເສດຖະກິດ ຫງວຽນມິງຟອງ ໃຫ້ຂໍ້ສັງເກດວ່າ.
“ນີ້ແມ່ນຜົນສຳເລັດທີ່ພົ້ນເດັ່ນໃນການປ່ຽນໃໝ່ຈິນຕະນາການຍຸດທະສາດ ຕາມທິດເຊື່ອມໂຍງທີ່ດີກວ່າ, ຮັບຮອງທ່າອ່ຽງເຊື່ອມໂຍງຂອງໂລກ ເພື່ອສ້າງບັນດາບາດລ້ຽວຕັ້ງໜ້າ. ຫວຽດນາມ ໄດ້ລົງນາມໃນດຳລັດ, ສັນຍາ 2 ຝ່າຍນັບຮ້ອຍສະບັບ, ນັບທັງການປົກປ້ອງການລົງທຶນ ແລະ ສົ່ງເສີມດ້ານການຄ້າດ້ວຍ 11 ສັນຍາ FTA, ຍ້ອນເຫດນັ້ນໄດ້ສ້າງເງື່ອນໄຂນັບມື້ນັບມີຄວາມສະເໝີພາບກວ່າ, ເສລີກວ່າທາງດ້ານການຄ້າສາກົນກັບເຄິ່ງໜຶ່ງໂລກ”.
ປີ 2016, ຫວຽດນາມ ກໍມີບາດກ້າວໃນການປັບປຸງສະພາບແວດລ້ອມແຫ່ງການດຳເນີນທຸລະກິດ. ສິ່ງດັ່ງກ່າວໄດ້ຊ່ວຍໃຫ້ສະພາບແວດລ້ອມແຫ່ງການຜະລິດ, ດຳເນີນທຸລະກິດໄດ້ຮັບການປັບປຸງດີພໍສົມຄວນ, ພ້ອມທັງຊ່ວຍວິສາຫະກິດ, ປະຊາຊົນລົງທຶນເປີດກວ້າງການຜະລິດ, ສ້າງຕັ້ງວິສາຫະກິດໃໝ່ຮ່ວມເດີນທາງພ້ອມກັບລັດຖະບານ ຊຸກຍູ້ການພັດທະນາເສດຖະກິດໃນຊຸມປີຕໍ່ໆໄປ.