(vovworld)-ໃນແຜນຮ່າງສັງລວມກ່ຽວກັບການສ້າງໂຄງປະກອບເສດຖະກິດຄືນໃຫມ່ຊື່ງໄດ້ຮັບການອະນຸມັດຈາກນາຍົກລັດຖະມົນຕີ, ເລື່ອງສ້າງໂຄງປະກອບຂະແຫນງທະນາຄານຄືນໃຫມ່ ຕິດພັນກັບການແກ້ໄຂຫນີ້ເສຍ ໄດ້ຮັບຖືວ່າ ແມ່ນຫນ້າທີ່ຈຸດສຸມ. ພາຍຫລັງ 3 ປີແຫ່ງການຜັນຂະຫຍາຍການສ້າງລະບົບທະນາຄານຄືນໃຫມ່, ການແກ້ໄຂຫນີ້ເສຍມາຮອດປະຈຸບັນ ສາມາດບັນລຸໄດ້ໝາກຜົນເບື້ອງຕົ້ນ.
ພາບປະກອບ:soha.vn
|
ໃນ 3 ປີຜ່ານມາ, ລະບົບທະນາຄານຫວຽດນາມ ແກ້ໄຂຫນີ້ເສຍໄດ້ ລວມມູນຄ່າ 249.000 ຕື້ດົງ. ບັນດາອົງການສິນເຊື່ອໄດ້ຫັກເງິນສ້າງຕັ້ງກອງທຶນຮັບມືກັບຄວາມສ່ຽງຫລາຍພໍສົມຄວນ, ສະເລ່ຍແຕ່ລະປີຫັກໄດ້ 70.000 ຕື້ດົງເພື່ອແກ້ໄຂຫນີ້ເສຍ. ຖ້າປີ 2012, ອັດຕາສ່ວນຫນີ້ເສຍຂອງທັງລະບົບບັນດາອົງການສິນເຊື່ອແມ່ນ 17%, ມາຮອດປີນີ້ອັດຕາສ່ວນຫນີ້ເສຍໄດ້ ແລະ ພວມຫລຸດລົງເທື່ອລະກ້າວ. ໄລ່ມາຮອດເດືອນ 9 ຜ່ານມາ, ຫນີ້ເສຍ ຍັງເຫລືອພຽງ 3,8%. ດ້ວຍລະດັບການແກ້ໄຂ ຫນີ້ເສຍຄືປະຈຸບັນ ແລະ ດ້ວຍຄວາມຕັດສິນໃຈຂອງບັນດາອົງການສິນເຊື່ອ, ມາຮອດທ້າຍປີນີ້ຫນີ້ເສຍ ຈະຢູ່ໃນລະດັບກວ່າ 3%. ທ່ານ ຫງວຽນດືກວີງ, ຜູ້ອຳນວຍການໃຫຍ່ທະນາຄານຫວຽດນາມ ວັດທະນາຖາວອນ (VP Bank) ຖືວ່າ: ຫນີ້ເສຍບໍ່ແມ່ນບັນຫາເປັນຫ່ວງກັງວົນ ຖ້າມັນຢູ່ໃນລະດັບສາມາດຄວບຄຸມໄດ້. ບົດຮຽນແກ້ໄຂ ຫນີ້ເສຍ ແມ່ນຊຸກຍູ້ການຜະລິດເພື່ອຂາຍສິນຄ້າ, ຊຸກຍູ້ການໃຊ້ສອຍເພືື່ອໃຫ້ປະຊາຊົນຊື້ສິນຄ້າໃຫ້ໄດ້. ດ້ວຍບົດຮຽນແກ້ໄຂ ຫນີ້ເສຍ ຢູ່ ທະນາຄານຂອງຕົນ, ທ່ານ ຫງວຽນດືກວີງ ໃຫ້ຮູ້ວ່າ:
“ທະນາຄານໄດ້ສ້າງບັນດາຫນ່ວຍພະນັກງານພິເສດມີຄວາມຊຳນານງານ ເພື່ອລົງເລິກການຕິດຕາມກວດກາ, ຕີລາຄາ, ໄຈ້ແຍກ ຫາກມີແຕ່ທະນາຄານແຫ່ງຫນຶ່ງບໍ່ອາດສາມາດປະຕິບັດໄດ້. ພວກເຮົາກໍໄດ້ສ້າງແຜນການກ່ອນນີ້ 3-4 ປີ ເພື່ອແກ້ໄຂ ສະພາບຫນີ້ເສຍເທື່ອລະກ້າວ.”
ທ່ານນາງ ຫງວຽນທິຮົ່ງ, ຮອງຜູ້ອຳນວຍການທະນາຄານແຫ່ງລັດ ໃຫ້ຮູ້ວ່າ: ປະຈຸບັນ, ທະນາຄານແຫ່ງລັດ ໄດ້ກຳນົດບ້ວງຫນີ້ດ້ວຍບັນດາມາດຖານສາກົນ, ຕາມຄວາມສາມາດຊຳລະ ຫນີ້ສິນຕົວຈິງຂອງລູກຄ້າ. ສະພາບ ຫນີ້ເສຍ ຢູ່ຫວຽດນາມ ປະຈຸບັນ ພວມໄດ້ຮັບການແກ້ໄຂດ້ວຍຫລາຍມາດຕະການຄື: ບັນດາທະນາຄານຫັກເງິນສ້າງກອງທຶນຮັບມືກັບຄວາມສ່ຽງ, ຂາຍຊັບສິນຜ່ານບັນດາບໍລິສັດຄຸ້ມຄອງຊັບສິນ. ພ້ອມກັນນັ້ນ ແມ່ນແຫລ່ງຫັກເງິນສ້າງກອງທຶນຮັບມືກັບຄວາມສ່ຽງຂອງອົງການສິນເຊື່ອ. ທະນາຄານແຫ່ງລັດໄດ້ຊີ້ນຳບັນດາອົງການສິນເຊື່ອຕ້ອງຕັ້ງຫນ້າໃນການເກັບຫນີ້ສິນ, ຈຳກັດສະພາບຫນີ້ເສຍເພີ່ມຂຶ້ນເມື່ອໃຫ້ກູ້ຢືມບັນດາບ້ວງເງິນໃຫມ່. ທ່ານນາງ ຫງວຽນທິຮົ່ງໃຫ້ຮູ້ວ່າ:
“ແກ້ໄຂຫນີ້ເສຍ ຕ້ອງມີແຫລ່ງການເງິນຢ່າງແທ້ຈິງ. ບົດຮຽນຈາກຕ່າງປະເທດໃຫ້ເຫັນວ່າ ການແກ້ໄຂ ຫນີ້ເສຍ ຕ້ອງເສຍເງິນຫລາຍທີ່ສຸດ, ຊ້ຳບໍ່ຫນຳມີບາງປະເທດຕ້ອງເສຍເງິນເຖິງ 20-30% GDP ເພື່ອແກ້ໄຂຫນີ້ເສຍ. ການແກ້ໄຂຫນີ້ເສຍໃນໄລຍະຜ່ານມາ ແມ່ນຜ່ານບໍລິສັດຊື້ຂາຍຫນີ້ (VMC) ນັ້ນແມ່ນການນຳໃຊ້ແຫລ່ງເງິນສະຫນອງ, ໝາຍຄວາມວ່າບັນດາອົງການສິນເຊື່ອເມື່ອຂາຍຫນີ້ເສຍໃຫ້ VMC ໄດ້ຮັບພັນທະບັດພິເສດ ແລະ ສາມາດກູ້ຢືມທຶນຈາກທະນາຄານແຫ່ງລັດ ດ້ວຍອັດຕາດອກເບ້ຍຕ່ຳກວ່າອັດຕາທຳມະດາ 2%. ໃນການບໍລິຫານຂອງທະນາຄານແຫ່ງລັດ, ທະນາຄານແຫ່ງລັດ ບໍ່ພຽງແຕ່ມີຈຸດໝາຍຫນຶ່ງດຽວແມ່ນແກ້ໄຂ ຫນີ້ເສຍ ຫາກຈຸດໝາຍບໍລິຫານເງິນຕາຕ້ອງຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ ແລະ ຮັບປະກັນຄວາມປອດໄພໃຫ້ລະບົບທະນາຄານ.”
ທີ່ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມຊຸດທີ 13, ໃນວາລະປຶກສາຫາລືບົດລາຍງານຂອງລັດຖະບານກ່ຽວກັບສະພາບການພັດທະນາເສດຖະກິດສັງຄົມຂອງປະເທດຊາດ, ສະມາຊິກສະພາແຫ່ງຊາດຫລາຍທ່ານ ສະແດງຄວາມເຫັນດີເຫັນພ້ອມກັບຈຸດໝາຍການຈະເລີນເຕີບໂຕ GDP 6,2% ໃນປີ 2015 ຊື່ງລັດຖະບານໄດ້ວາງອອກ. ເຖິງຢ່າງໃດກໍຕາມ, ເພື່ອບັນລຸໄດ້ຈຸດໝາຍດັ່ງກ່າວ, ເລື່ອງສ້າງໂຄງປະກອບຂະແຫນງທະນາຄານຄືນໃຫມ່ ແລະ ແກ້ໄຂ ຫນີ້ເສຍ ຕ້ອງຕິດພັນກັບການສ້າງໂຄງປະກອບພື້ນຖານເສດຖະກິດສັງລວມຄືນໃຫມ່. ໃນນັ້ນ ຄວນສືບຕໍ່ຊຸກຍູ້ການຜະລິດດຳເນີນທຸລະກິດ, ແກ້ໄຂສະພາບສູນເສຍລາຍຮັບງົບປະມານ, ຕ້ານການຄ້າເຖື່ອນ, ການເຄື່ອນເຫນັງລາຄາ, ຫລຸດຜ່ອນຫນີ້ຄ້າງຂອງອາກອນ, ສ້າງແຫລ່ງລາຍຮັບງົບປະມານເປັນປົກກະຕິ ແລະ ໝັ້ນຄົງ, ປະຢັດລາຍຈ່າຍງົບປະມານແຫ່ງລັດຢ່າງເດັດຂາດ. ເປັນອັນວ່າ ການແກ້ໄຂບັນຫາຫນີ້ເສຍ ຜ່ານການສ້າງໂຄງປະກອບລະບົບທະນາຄານຄືນໃຫມ່ຈະມີຄຸນປະໂຫຍດຕັ້ງຫນ້າ, ປະກອບສ່ວນເຂົ້າໃນຈຸດໝາຍການຈະເລີນເຕີບໂຕ GDP ຂອງປະເທດຊາດ.