ແຂວງຮ່ານາມ ໄດ້ວາງແຜນຜັງເຂດອຸດສາຫະກຳເຕັກໂນໂລຊີສູງ 4 ແຫ່ງ ຢູ່ບັນດາເມືອງ ບິ່ງລູກ, ລິ໋ເຍີນ ດ້ວຍເນື້ອທີ່ດິນກວ້າງປະມານ 300 ເຮັກຕາ, ໃນຈຳນວນເນື້ອທີ່ດິນທັງໝົດ 500 ເຮັກຕາ, ດ້ວຍການເຂົ້າຮ່ວມຂອງບັນດາວິສາຫະກິດ, ກຸ່ມບໍລິສັດໃຫຍ່ຄື: VinGroup, ບໍລິສັດໃຫຍ່ສະໜອງແນວພັນປູກສູນກາງ… ເລື່ອງສ້າງຕັ້ງບັນດາເຂດຜະລິດຜະລິດຕະພັນກະເສດ, ຜັກ, ໝາກໄມ້ທີ່ມີຄຸນນະພາບສູງ ພວມຫັນປ່ຽນປະເພນີການປູກຝັງເທື່ອລະກ້າວ ກໍ່ຄືເປີດກາລະໂອກາດເພີ່ມລາຍຮັບໃຫ້ຊາວກະສິກອນຢູ່ບັນດາເຂດຜະລິດ ໂດຍມີການເຂົ້າຮ່ວມຂອງວິສາຫະກິດ. ເມື່ອປະກອບທີ່ດິນທຳການຜະລິດ, ຊາວກະສິກອນຈະໄດ້ຮັບສາລີ 150 ກິໂລກຣາມ/ໄລ່/ປີ ຈາກວິສາຫະກິດ, ຊຶ່ງຈະຄິດເປັນເງິນດ້ວຍມູນຄ່າປະມານ 7000 ດົ່ງ/ ກິໂລກຣາມ ໃນຮອບເວລາ 10 ປີ. ແຂວງຮ່ານາມ ມີແຜນນະໂຍບາຍຍົກເວັ້ນຄ່າບຳລຸງສ້າງຖ້າຫາກຊາວກະສິກອນຢາກເປັນກຳມະກອນໃນບັນດາຮູບແບບຂອງວິສາຫະກິດ… ທ່ານ ເລວັນເຊີນ, ຊາວກະສິກອນ ຕາແສງ ເຍີນບິ່ງ, ເມືອງລິ໋ເຍີນ, ແຂວງ ຮ່ານາມ ໃຫ້ຮູ້ວ່າ.
“ເມືຶ່ອໄດ້ຮັບຊາບແຜນນະໂຍບາຍປະກອບທີ່ດິນທຳການຜະລິດ, ໃນເບື້ອງຕົ້ນຊາວກະສິກອນຍັງບໍ່ທັນມີຄວາມເຊື່ອໝັ້ນ, ແຕ່ພາຍຫຼັງວິສາຫະກິດຜັນຂະຫຍາຍແຜນການນີ້, ຊາວກະສິກອນມີຄວາມເບີກບານໃຈຫຼາຍ. ໄລ່ມາຮອດປະຈຸບັນ, ພວກຂ້າພະເຈົ້າໄດ້ເຫັນປະຈັກຕາການຜະລິດທີ່ບັນລຸປະສິດທິຜົນ. ເຮົາມີເນື້ອທີ່ດິນ, ແຕ່ຕົນເອງບໍ່ມີວິທະຍາສາດເຕັກນິກ ສະນັ້ນບໍ່ສາມາດຜະລິດອອກບັນດາຜະລິດຕະພັນມີມູນຄ່າສູງໄດ້, ແຕ່ປະຈຸບັນມີວິສາຫະກິດມາລົງທຶນທາງດ້ານເຕັກໂນໂລຊີແລ້ວ, ດ້ວຍເນື້ອທີ່ດິນ 1 ໄລ່ຊາວກະສິກອນອາດສາມາດຜະລິດໄດ້ຜະລິດຕະພັນຫຼາຍຢ່າງ, ຜ່ານນັ້ນລາຍຮັບຂອງຊາວກະສິກອນໄດ້ເພີ່ມຂຶ້ນ, ໃນອະນາຄົດລຸ່ນລູກລຸ່ນຫຼານກໍ່ໄດ້ຊົມໃຊ້ໝາກຜົນນີ້”.
ເຂດອຸດສາຫະກຳເຕັກໂນໂລຊີສູງຮ່ານາມ ແມ່ນຮູບແບບເຕົ້າໂຮມເນື້ອທີ່ດິນນາຂອງ 300 ຄອບຄົວ, ດ້ວຍການເຊົ່າເນື້ອທີ່ດິນເປັນເວລາ 20 ປີ, ເພື່ອສ້າງເປັນເຂດຜະລິດຜັກ, ໝາກໄມ້ສົ່ງອອກສະເພາະ, ນຳໃຊ້ເຕັກໂນໂລຊີສູງ. ບັນດານັກລົງທຶນຫວັງວ່າ, ນີ້ຈະກາຍເປັນສູນຜະລິດໝາກແຕງຫອມໃຫຍ່ກວ່າໝູ່ຢູ່ພາກເໜືອ, ຮັບໃຊ້ຄວາມຕ້ອງການຢູ່ພາຍໃນປະເທດ ແລະ ການສົ່ງອອກ, ຕອບສະໜອງບັນດາມາດຕະຖານຂອງບັນດາຕະຫຼາດທີ່ຕ້ອງການມີຄຸນນະພາບສູງຄື: ຍີ່ປຸ່ນ, ສະຫະພາບເອີລົບ - ອີຢູ, ອາເມລິກາ. ທ່ານນາງ ເຈີນກິມລຽນ, ປະທານສະພາຄຸ້ມຄອງ, ທັງເປັນຜູ້ອຳນວຍການໃຫຍ່ບໍລິສັດຫຸ້ນສ່ວນແນວພັນປູກສູນກາງ, ໃຫ້ຮູ້ວ່າ.
“ໃນປີ 2017, ວິສາຫະກິດຈະສຸມໃສ່ລົງທຶນໄລຍະ 1 ດ້ວຍຂອບຂະໜາດລົງທຶນທັງໝົດກ່ຽວກັບເຮືອນແກ້ວປະມານ 21 ເຮັກຕາ. ທັດສະນະຂອງວິສາຫະກິດແມ່ນນຳໃຊ້ເຕັກໂນໂລຊີສູງ ດ້ວຍການລົງທຶນຕ່ຳເພື່ອຍົກສູງປະສິດທິຜົນ, ສຳຄັນທີ່ສຸດແມ່ນບັນດາເຕັກໂນໂລຊີດັ່ງກ່າວຕ້ອງໄດ້ນຳໃຊ້ຢ່າງກ້ວາງຂວາງ ເພື່ອໃຫ້ຊາວກະສິກອນເຂົ້າຮ່ວມລະບົບ, ໃນຂະນະນັ້ນ, ບໍລິສັດຈະສວມບົດບາດ “ລົງທຶນເປັນແກ່ນສານ”, ກາຍເປັນສູນບຳລຸງສ້າງ, ຖ່າຍທອດເຕັກໂນໂລຊີ. ເດືອນ 05/2017 ພວກຂ້າພະເຈົ້າຈະມີຜະລິດຕະພັນທຳອິດ ແມ່ນໝາກແຕງຫອມເພື່ອນຳອອກສູ່ຕະຫຼາດຈຳໜ່າຍ ແລະ ມຸ່ງໄປເຖິງບັນດາຂັ້ນຕອນອື່ນໆໃນຕະຫຼາດ”.
ເຕັກໂນໂລຊີສູງແມ່ນຄຳຕອບໃຫ້ເລື່ອງຮັບປະກັນສຸຂະອະນາໄມດ້ານສະບຽງອາຫານ, ຜະລິດຕະພັນກະເສດມີຄຸນນະພາບສູງ, ໃນການສ້າງໂຄງປະກອບພື້ນຖານກະສິກຳຄືນໃໝ່. ແຂວງ ຮ່ານາມ ກຳນົດວ່າ, ວິສາຫະກິດທັງເປັນ “ແກ່ນສານ” ທັງເປັນກຳລັງໜູນເພື່ອນຳກະສິກຳມຸ່ງໄປເຖິງການຜະລິດສິນຄ້າລວມສູນດ້ວຍຂອບຂະໜາດໃຫຍ່. ທ່ານ ຈ້ຽວກ໋ວກດາດ, ຫົວໜ້າພະແນກກະສິກຳ ແລະ ພັດທະນາຊົນນະບົດແຂວງຮ່ານາມ ໃຫ້ຮູ້ວ່າ: ແຂວງ ໄດ້ປະກາດໃຊ້ນະໂຍບາຍໜູນຊ່ວຍວິສາຫະກິດທາງດ້ານພື້ນຖານໂຄງລ່າງຄື: ໄຟຟ້າ, ທາງຄົມມະນາຄົມຢູ່ບັນດາເຂດອຸດສາຫະກຳເຕັກໂນໂລຊີສູງ ແລະ ໃນໄລຍະຈະມາເຖິງ, ແຂວງຮ່ານາມ ຈະສືບຕໍ່ເຊີນບັນດາວິສາຫະກິດມີຄວາມສາມາດດ້ານການເງິນ, ລົງທຶນກໍ່ສ້າງໂຮງງານນຳໃຊ້ເຕັກໂນໂລຊີປຸງແຕ່ງເພື່ອສ້າງລະບົບຜະລິດ ຜະລິດຕະພັນກະເສດຄົບວົງຈອນ, ສ້າງເງື່ອນໄຂຈຳໜ່າຍສົນອອກໃຫ້ຜະລິດຕະພັນ.
“ພວກຂ້າພະເຈົ້າໄດ້ເປັນເສນາທິການໃຫ້ຄະນະກຳມະການປະຊາຊົນແຂວງ, ເຕົ້າໂຮມເນື້ອທີ່ດິນ, ມີເນື້ອທີ່ກວ້າງຂວາງ ຈຶ່ງດຶງດູດວິສາຫະກິດມາລົງທຶນໄດ້. ຈາກນັ້ນ, ກໍ່ນຳໃຊ້ພາຫະນະເຄື່ອງຈັກ, ນຳໃຊ້ວິທະຍາສາດເຕັກໂນໂລຊີເພື່ອຜະລິດອອກບັນດາຜະລິດຕະພັນທີ່ມີຄຸນນະພາບສູງ, ເຮັດໃຫ້ປ່ຽນແປງໂສມໜ້າຂອງການຜະລິດກະສິກຳຂອງທ້ອງຖິ່ນ”.