ປີ 2017, ຫວຽດນາມຈະສືບຕໍ່ປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງທັງຢູ່ພາຍໃນ ແລະ ຕ່າງປະເທດ. ຕາມບັນດາຜູ້ຊ່ຽວຊານດ້ານເສດຖະກິດແລ້ວ, ຫວຽດນາມຍັງຄົງມີຄວາມສະດວກຫຼາຍຢ່າງ, ອັນໄດ້ສ້າງເງື່ອນໄຂໃຫ້ແກ່ເສດຖະກິດເຕີບໂຕ.
(ພາບປະກອບ)
|
ບັນດາເງື່ອນໄຂສະດວກສຳລັບເສດຖະກິດຫວຽດນາມໃນປີ 2017 ແມ່ນມາຈາກບັນດາສັນຍາການຄ້າເສລີ, ບັນດາຄຳໝັ້ນສັນຍາປ່ຽນແປງໃໝ່ທາງດ້ານລະບອບລະບຽບການ, ນະໂຍບາຍສ້າງເງື່ອນໄຂສະດວກໃຫ້ແກ່ສະພາບແວດລ້ອມແຫ່ງການດຳເນີນທຸລະກິດ. ໃນຂະນະນັ້ນ, ການສົ່ງອອກ, ອະສັງຫາລິມະຊັບ ແລະ ຫຼັກຊັບກໍຄາດວ່າ ມີການເຕີບໂຕປົກກະຕິ.
ຄວາມສະດວກທີ່ມາຈາກບັນດາສັນຍາການຄ້າເສລີ.
ທ່ານນາງ ຝ້າມຈີລານ, ຜູ້ຊ່ຽວຊານດ້ານເສດຖະກິດຖືວ່າ ທາງດ້ານພື້ນຖານແລ້ວ, ຫວຽດນາມຍັງຄົງຢູ່ໃນວິວັດການເຊື່ອມໂຍງເຂົ້າກັບສາກົນ. ສັນຍາຄູ່ຮ່ວມມືຂ້າມປາຊີຟິກ TPP ອາດຈະຖືກຜົນສະທ້ອນຍ້ອນແຜນນະໂຍບາຍຂອງລັດຖະບານອາເມລິກາ, ແຕ່ບັນດາກົນໄກທົດແທນນີ້ ພວກໄດ້ຮັບການປຶກສາຈາກບັນດາປະເທດ. ຫວຽດນາມອາດຈະເຂົ້າຮ່ວມພ້ອມກັບບັນດາປະເທດທີ່ຍັງເຫຼືອຂອງ TPP ໃນການປັບປຸງສັນຍາເພື່ອສາມາດພ້ອມກັນປະຕິບັດ. ນອກຈາກນັ້ນ, ພວກເຮົາຍັງມີສັນຍາການຄ້າເສລີ FTA ກັບສະຫະພາບເອີລົບ. ທ່ານນາງ ຝ້າມຈີລານ ເວົ້າວ່າ :
“ສະຫະພາບເອີລົບພວມຢືນຢູ່ຕໍ່ໜ້າບັນດາສິ່ວທ້າທາຍຢ່າງໃຫຍ່ຫຼວງຢູ່ພາຍໃນຂອງເຂົາເຈົ້າ, ແຕ່ສຳລັບແຕ່ລະປະເທດສະມາຊິກໃຫຍ່ຂອງສະຫະພາບເອີລົບ, ຫວຽດນາມກໍໄດ້ສ້າງບັນດາສາຍພົວພັນພື້ນຖານຄື ເປັນຄູ່ຮ່ວມມືຍຸດທະສາດຫຼືຄູ່ຮ່ວມມືຮອບດ້ານ. ພວກເຮົາຄວນຊຸກຍູ້ການພົວພັນເຫຼົ່ານັ້ນເພື່ອສ້າງພື້ນຖານໃຫ້ແກ່ການພັດທະນາຍາວນານກັບເຂົາເຈົ້າ. ແລະ ບັນດາ FTA ອື່ນໆທີ່ພວກເຮົາເຊັນກັບ ສ.ເກົາຫຼີຫຼືປະເທດອື່ນໆນັ້ນ ຍັງຄົງແມ່ນພື້ນຖານໃຫ້ແກ່ຫວຽດນາມພັດທະນາ ”
ແລະກໍຕາມ ທ່ານນາງ ຝ້າມຈີລານແລ້ວ, ຄວາມສະດວກຕໍ່ໄປກໍແມ່ບັນດາໂອກາດຍ້ອນການປ່ຽນແປງໃໝ່ນຳມາໃຫ້, ພ້ອມກັນນັ້ນ ກໍແມ່ນເລື່ອງຫວຽດນາມຖອດຖອນໄດ້ຫຼາຍບົດຮຽນໃນການພັດທະນາໄລຍະທີ່ຜ່ານມາ. ທ່ານນາງ ຝ້າມຈີລານ ໃຫ້ຮູ້ຕື່ມອີກວ່າ :
“ ຂ້າພະເຈົ້າຄິດວ່າ ກາລະໂອກາດປ່ຽນແປງໃໝ່ໄດ້ມີຢູ່ແລ້ວ. ກ່ອນອື່ນໝົດແມ່ນກຳລັງດັນຈາກພື້ນຖານເສດຖະກິດ. ມັນແມ່ນຄວາມຕ້ອງການຢູ່ພາຍໃນ, ບັງຄັບໃຫ້ຫວຽດນາມຕ້ອງພັດທະນາຕື່ມອີກບາດກ້າວໜຶ່ງ. ພ້ອມກັນນັ້ນ ກໍມີບັນດາເງື່ອນໄຂສະດວກໂດຍການປ່ຽນແປງໃໝ່ນຳມາໃຫ້. ໃນວິວັດການເຊື່ອມໂຍງຂອງຕົນ, ຫວຽດນາມພວມຮັບຮູ້ແຈ້ງກວ່າເວລາໃດໝົດວ່າ : ຢາກພັດທະນາແມ່ນຕ້ອງອີງໃສ່ກຳລັງພາຍໃນ, ຕ້ອງເລັ່ງໃສ່ເພີ່ມທະວີກຳລັງພາຍໃນຂອງພື້ນຖານເສດຖະກິດ, ນັບທັງ ກຳລັງພາຍໃນຂອງວິສາຫະກິດຫວຽດນາມ ເພາະບໍ່ມີປະເທດໃດໆສາມາດພັດທະນາໄດ້ຖ້າຫາກອີງໃສ່ພຽງກຳລັງພາຍນອກເທົ່ານັ້ນ ”
ບັນດາຜູ້ຊ່ຽວຊານດ້ານເສດຖະກິດກໍຍັງຖືວ່າ ການເຊື່ອມໂຍງແມ່ນສຳຄັນທີ່ສຸດ ແຕ່ການເຊື່ອມໂຍງສາກົນຕ້ອງບັນລຸເປົ້າໝາຍແມ່ນເພີ່ມທະວີກຳລັງພາຍໃນຂອງປະເທດຊາດ, ເຮັດໃຫ້ປະເທດຫວຽດນາມເຂັ້ມແຂງກວ່າ, ມີຄວາມສາມາດແກ່ງແຍ້ງສູງກວ່າໃນໂລກ, ນັ້ນຈຶ່ງແມ່ນການເຊື່ອມໂຍງທີ່ມີມູນຄ່າ.
ນອກຈາກບັນດາຄວາມສະດວກໂດຍບັນດາສັນຍາການຄ້າເສລີ ແລະ ວິວັດການປ່ຽນແປງໃໝ່ນຳມາໃຫ້ນັ້ນ, ການເຕີບໂຕດ້ານການສົ່ງອອກ ແລະ ການໃຊ້ສອຍຂອງເອກະຊົນຈະໄດ້ຮັບການປົວແປງຍ້ອນການຟື້ນຟູລາຍຮັບຈາກກະສີກຳ. ຕະຫຼາດອະສັງຫາລິມະຊັບຫວຽດນາມ ກໍພວມຢູ່ໃນທ່າອຽງກ້າວຂຶ້ນດ້ວຍລະດັບປົກກະຕິກ່ວາເກົ່າ, ຊ້ຳບໍ່ໜຳ, ຫວຽດນາມຍັງໄດ້ຮັບຖືວ່າ ແມ່ນສະຖານທີ່ດູດດື່ມສຳລັບບັນດານັກລົງທຶນໃຫຍ່ໃນພາກພື້ນ. ສຳລັບຕະຫຼາດຫຼັກຊັບ, ໃບຫຸ້ນຫວຽດນາມພວມມີລາຄາສູງກວ່າເມື່ອທຽບໃສ່ຫຼາຍປະເທດອື່ນໃນພາກພື້ນອາຊີຕາເວັນອອກສ່ຽງໃຕ້.
ຄວາມສະດວກທີ່ມາຈາກຄວາມຕັດສິນໃຈປ່ຽນແປງໃໝ່ກົນໄກນະໂຍບາຍ
ການເຕີບໂຕເສດຖະກິດປີ 2017 ຂອງຫວຽດນາມຈະໄດ້ຮັບການປົວແປງຍ້ອນການປະຕິຮູບລະບອບລະບຽບການ, ປົວແປງສະພາບແວດລ້ອມການລົງທຶນ, ສ້າງພະລັງຊີວິດໃໝ່ໃຫ້ແກ່ຂົງເຂດເສດຖະກິດພາກເອກະຊົນ ກາຍເປັນກຳລັງໜູນຕົ້ນຕໍຂອງພື້ນຖານເສດຖະກິດໃນປີໜ້າ. ຄວາມຕັດສິນໃຈຂອງຫວຽດນາມໃນການຍູ້ແຮງການສ້າງໂຄງປະກອບການລົງທຶນສາທາລະນະ, ງົບປະມານແຫ່ງລັດ ແລະ ໜີ້ສາທາລະນະຄືນໃໝ່, ຜັນຂະຫຍາຍບັນດາມາດຕະການຕ້ານການສໍ້ລາດບັງຫຼວງ, ການຮົ່ວໄຫຼ, ການຟູມເຟືອ່ຍທຶນຮອນ, ຊັບສິນຂອງລັດຢ່າງຂ້ຽວຂາດ ຊຶ່ງຈະສ້າງເງື່ອນໄຂສະດວກໃຫ້ແກ່ ສະພາບແວດລ້ອມການດຳເນີນທຸລະກິດ. ບັນດາຜູ້ຊ່ຽວຊານຄາດຄະເນວ່າ ຈະມີການພັດທະນາຕະຫຼາດການເງິນທີ່ດຸ່ນດ່ຽວກວ່າລະຫວ່າງຕະຫຼາດເງິນຕາ ແລະ ຕະຫຼາດທຶນຮອນ, ລະຫວ່າງຕະຫຼາດທຶນໃບຫຸ້ນ ແລະ ພັດທະບັດ; ລະຫວ່າງພັດທະບັດລັດຖະບານ ແລະ ພັນທະບັດວິສາຫະກິດ, ລະຫວ່າງການບໍລິການສິນເຊື່ອ ແລະ ບັນດາການບໍລິການທະນາຄານປອດສິນເຊື່ອ. ທ່ານເລດັງແຢງ ຜູ້ຊ່ຽວຊານດ້ານເສດຖະກິດຖືວ່າ
“ໃນການຈັດອັນດັບສະພາບແວດລ້ອມການລົງທຶນ, ທະນາຄານໂລກໄດ້ຍົກອັນດັບຫວຽດນາມຂຶ້ນ 9 ຂັ້ນ. ເວທີປາໄສເສດຖະກິດກໍສືບຕໍ່ຍົກອັນດັບຫວຽດນາມກ່ຽວກັບ ສະພາບແວດລ້ອມການຄ້າສາກົນ. ຫວຽດນາມກໍໄດ້ຮັບການຕີລາຄາວ່າ ໄດ້ມີບັນດາການປົວແປງໃນການແກ້ໄຂບັນດາສິ່ງຄ້າງຄ່າ, ບັນດາລະບຽບການໃນການສົ່ງອອກ ແລະ ນຳເຂົ້າ. ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໝັ້ນໝາຍຫຼາຍຄັ້ງວ່າ ຈະຍົກສູງກຳລັງແກ່ງແຍ້ງໃຫ້ແກ່ພື້ນຖານເສດຖະກິດຫວຽດນາມ. ທ່ານນາຍົກລັດຖະມົນຕີໝັ້ນໝາຍຈະສ້າງລັດແຫ່ງສ້າງສັນ, ໝາຍຄວາມວ່າ ແມ່ນລັດໜູນຊ່ວຍວິສາຫະກິດ, ຮ່ວມມືກັບ ວິສາຫະກິດ, ແລະ ສ້າງລັດຖະບານສື່ຊັດບໍລິສຸດ, ຍູ້ຖອຍການສໍ້ລາດບັງຫຼວງ ແລະ ຫຼຸດຜ່ອນລະບຽບການບໍລິຫານ ”
ເສດຖະກິດຫວຽດນາມປີ 2017 ເຖິງວ່າ ປະສົບກັບຄວາມຫຍຸ້ງຍາກ, ສິ່ງທ້າທາຍຫຼາຍຢ່າງກໍຕາມ, ແຕ່ກໍຍັງມີບັນດາຄວາມສະດວກຢູ່, ອັນໄດ້ຊ່ວຍພື້ນຖານເສດຖະກິດສືບຕໍ່ພັດທະນາ, ປະກອບສ່ວນເຮັດໃຫ້ສັງຄົມມີສະຖຽນລະພາບ ແລະ ເຮັດສຳເລັດບັນດາເປົ້າໝາຍການເຕີບໂຕທີ່ໄດ້ວາງອອກ.