ການນຳຫວຽດນາມຕ້ອນຮັບທ່ານຮອງນາຍົກລັດຖະມົນຕີລາວສົມສະຫວາດເລັ່ງສະຫວັດ
ທ່ານເລຂາທິການໃຫຍ່ ຫງວຽນຟຸຈ້ອງ ຕ້ອນຮັບ ທ່ານຮອງນາຍົກລັດຖະມົນຕີ ລາວ ສົມສະຫວາດ ເລັ່ງສະຫວັດ
ພາບ:nguyentandung.org
|
(vovworld)- ຕອນເຊົ້າວັນທີ 22/01, ທີ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງລັດຖະບານແຫ່ງ ສປປ ລາວ ໂດຍທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ນຳໜ້າພວມຢ້ຽມຢາມຫວຽດນາມ.
ທ່ານເລຂາທິການໃຫຍ່ ຫງວຽນຟຸຈ້ອງ ຕີລາຄາສູງການສົມທົບກັບຂອງກະຊວງ, ຂະແໜງການທີ່ກ່ຽວຂ້ອງ ແລະ ຄະນະກຳມ າທິການຮ່ວມມືຂອງ 2 ລັດຖະບານໃນການຜັນຂະຫຍາຍການປະຕິບັດບັນດາຂໍ້ຕົກລົງຂັ້ນສູງລະຫວ່າງ 2 ພັກ, 2 ລັດ ໃນປີ 2014 ຢ່າງມີປະສິດທິຜົນ; ສະເໜີ 2 ລັດຖະບານຜັນຂະຫຍາຍການປະຕິບັດບັນດາເນື້ອໃນຂໍ້ຕົກລົງ ລະຫວ່າງ ການນຳຂັ້ນສູງ 2 ພັກ, ບັນດາສັນຍາ, ຂໍ້ຕົກລົງທີ່ໄດ້ຮັບການລົງນາມ ແລະ ບັນດາເນື້ອໃນຂໍ້ຕົກລົງຢູ່ກອງປະຊຸມຄັ້ງທີ 37 ຄະນະກຳມາທິການລະຫວ່າງລັດຖະບານກ່ຽວກັບການຮ່ວມມື 2 ຝ່າຍຢ່າງມີປະສິດທິຜົນ. 2 ຝ່າຍສືບຕໍ່ສົມທົບກັນຄົ້ນຄ້ວາ, ສະເໜີບັນດາກົນໄກນະໂຍບາຍທີ່ເໝາະສົມກັບການພົວພັນ ລະຫວ່າງ 2 ປະເທດ ແລະ ສະພາບການຢູ່ແຕ່ລະປະເທດ ເພື່ອຊຸກຍູ້ການຮ່ວມມືລະຫວ່າງ 2 ປະເທດນັບມື້ນັບພັດທະນາເຂົ້າສູ່ລວງເລິກ, ແທດຈິງ ແລະ ມິປະສິດທິຜົນໃນທຸກຂົງເຂດ.
ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ຢືນຢັນວ່າ: ລາວ ຈະພ້ອມກັບ ຫວຽດນາມ ຮັກສາ ແລະ ເພີ່ມພູນຄູນສ້າງໃຫ້ສາຍພົວພັນສາມັກຄີແບບພິເສດ ລາວ-ຫວຽດນາມ ພັດທະນາຂຶ້ນສູ່ລະດັບສູງໃໝ່.
ແລະ ກໍໃນຕອນເຊົ້າວັນດຽວກັນ, ຢູ່ທຳນຽບປະທານປະເທດ, ທ່ານປະທານປະເທດ ເຈືອງເຕີນຊາງ ໄດ້ຕອ້ນຮັບທ່ານຮອງນາຍົກລັດຖະມົນຕີ ລາວ ສົມສະຫວາດ ເລັ່ງສະຫວັດ ເນື່ອງໃນໂອກາດມາຢ້ຽມຢາມ ແລະ ເຮັດວຽກຢູ່ ຫວຽດນາມ. ກ່າວຄຳເຫັນນະທີ່ນີ້, ທ່ານປະທານປະເທດ ເຈືອງເຕີນຊາງ ຊົມເຊີຍໝາກຜົນຂອງກອງປະຊຸມຄະນະກຳມະການລະຫວ່າງ ລັດຖະບານ ຫວຽດນາມ ແລະ ລາວ, ສະແດງຄວາມປິຕິຊົມຊື່ນຕໍ່ບັນດາຂົງເຂດຮ່ວມມືລະຫວ່າງສອງປະເທດໃນຊຸມປີຜ່ານມາແມ່ນພັດທະນາອັນດີງາມ. ທ່ານປະທານປະເທດ ເຈືອງເຕີນຊາງ ເນັ້ນຫນັກວ່າ: ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ ແລະ ລາວ ສືບຕໍ່ໄດ້ຮັບການເພີ່ມທະວີ ແລະ ພັດທະນາອັນດີງາມ, ມູ່ງໄປເຖິງປະສິດທິຜົນ ແລະແທດຈິງ. ເພື່ອຍູ້ແຮງການຮ່ວມມື, ອົງການກ່ຽວຂ້ອງຂອງສອງປະເທດ ຄວນຮີບເຮັ່ງ ແກ້ໄຂບັນດາຂໍ້ຕິດຂັດ, ຮົ້ວກີດຂວາງດ້ານການຄ້າ, ສືບຕໍ່ສົມທົບກັນຄົ້ນຄ້ວາ, ສະເຫນີກົນໄກ, ນະໂຍບາຍແກ້ໄຂ. ບັນດາໂຄງການໃຫຍ່ ຄວນປະຕິບັດຢ່າງຮີບເຮັ່ງ, ຮັບປະກັນຖືກກັບຄວາມຮຽກຮ້ອງຕ້ອງການ, ປະກອບສ່ວນເຂົ້າໃນການສະເຫລີມສະຫລອງບັນດາເຫດການສຳຄັນຂອງສອງປະເທດໃນປີ 2015 ຢ່າງແທດຈິງ.ທ່ານປະທານປະເທດ ກໍເນັ້ນຫນັກເຖິງເລື່ອງສືບຕໍ່ຍົກສູງຄຸນນະພາບ ແລະ ປະສິດທິຜົນການຮ່ວມມືການສຶກສາ ແລະ ບຳລຸງສ້າງລະຫວ່າງຫວຽດນາມແລະ ລາວ, ປະກອບສ່ວນກໍ່ສ້າງ ແລະພັດທະນາແຫລ່ງຊັບພະຍາກອນມະນຸດ ຊ່ວຍລາວ ພັດທະນາປະເທດຊາດ.