មិត្តអ្នកអានជាទីរាប់អាន! ក្នុងយុគ្គសម័យនគរូបនីយកម្មកាន់តែរីកចម្រើន បេតិកភ័ណ្ឌដ៏មានតម្លៃរបស់វប្បធម៌សិល្បៈ និងស្មារតីវៀតណាមកំពុងរលាយសាបសូន្យ សម្បីតែកំពុងរងគ្រោះអាសន្ននឹងត្រូវបានបាត់បង់ជារៀងរហូតក៏ដោយ។ ប៉ុន្តែផ្ទុយទៅវិញ Viet Phu Thanh Chuong ត្រូវបានគេចាត់ទុកជាសារមន្ទីរមួយដែលប្រមូលផ្តុំតម្លៃវប្បធម៌សិល្បៈដ៏វិសេសវិសាលរបស់ប្រជាជាតិវៀតណាម និងក្លាយទៅជាទីកន្លែងទេសចរណ៍ដ៏ល្បីសំរាប់ភ្ញៀវទេសចរមានបំណងចង់ស្វែងយល់អំពីវប្បធម៌ ជីវភាពរស់នៅ របស់ជនវៀតណាមនៅទីក្រុងហាណូយ។

ក្លោងទ្វារ Viet Phu Thanh Chuong

Viet Phu Thanh Chuong ស្ថិតនៅឃុំ Hien Ninh ស្រុក Soc Son តាមផ្លូវជាតិលេខ២ ដែលមានចម្ងាយពីទីក្រុងហាណូយប្រមាណ៤០គីឡូម៉ែត្រ ហើយត្រូវបានសាងសង់ នៅលើភ្នំដែលមានផ្ទៃដីប្រមាណ ១០,០០០ ម៉ែត្រការ៉េ ដោយវិចិត្រករ Thanh Chuong នាឆ្នាំ២០០១ និងសម្រេចជាស្ថាពរនៅឆ្នាំ២០០៤។ ដោយមានការទាក់ទាញយ៉ាងពិសិដ្ឋដូច្នេះ  Viet Phu Thanh Chuong បានទទួលការយកចិត្តទុកដាក់យ៉ាងខ្លាំងពីភ្ញៀវទេសចរជាច្រើនកុះករទាំងជាតិ និងអន្តរជាតិ។ ជាពិសេសនៅឯក្លោងទ្វារចេញចូលរបស់ Viet Phu Thanh Chuong ក៏ធ្វើឲ្យភ្ញៀវទេសចររំលឹកដល់ភាពស្រស់ស្អាតលក្ខណៈបុរាណរបស់ក្លោងទ្វាភូមិ Tho Ha និង Duong Lam។ ក្លោងទ្វារឈើមានទ្វារចំនួន៣ ហើយដំបូលត្រូវបាន ប្រក់ក្បឿងពណ៌ក្រហមដែលគ្របដណ្តប់ដោយស្លែខៀវស្រងាត់ ហើយនៅជំវិញក៏ត្រូវបានតុបតែងរូបសំណាកថ្មឆ្លាក់មានក្បូរក្បាច់រចនាជាច្រើនផងដែរ។ ទាំងនេះបានរំលឹកនឹកដល់ភាពជិតស្និទនិងសាមញ្ញរបស់ស្រុកស្រែវៀតណាម។ Viet Phu Thanh Chuong ជាប្រព័ន្ធស្ថាបត្យកម្មខ្នាតតូចដែលផ្តោតទៅលើសេចក្តីលំអិតនៃផ្នែកនិមួយៗ ពីផ្លូវថ្នល់ ក្លោងទ្វារ ផ្ទះជញ្ជាំងដីអិដ្ឋ ដើមឈើ បឹងផ្កាឈូក រហូតដល់វត្ថុបុរាណ រូបសំណាកព្រះពុទ្ធបដិមាជាដើមទាំងនេះបានបង្កើតឡើងជាអាគារវប្បធម៌សិល្បៈមួយពោរពេញទៅដោយភាពស្និត ស្នាលរបស់វិចិត្រករ  Thanh Chuong។ វិចិត្រករ  Thanh Chuong បានចែករំលែកថា៖

“ ខ្ញុំបានប្រមូលវត្ថុបុរាណទាំងនេះតាំងពីនៅ តូចៗ។ ដោយមានវត្ថុទាំងនេះក្នុងដៃ រួមជាមួយក្តីស្រឡាញ់ ការយល់ដឹង និងគំនិតច្នៃប្រឌិតរបស់ខ្លួន ខ្ញុំបានសាងសង់ Viet Phu Thanh Chuong នេះ។ ខ្ញុំបានចាត់ទុកនេះគឺជាវណ្ណកម្មមួយ ដែលមានគោលដៅអភិរក្ស លើកតម្កើងនិងអភិវឌ្ឍន៍នូវតម្លៃវប្បធម៌សិល្បៈជាប្រពៃណីរបស់វៀតណាម។”

ផ្ទះជញ្ជាំងដីអិដ្ឋ

តាំងពី Viet Phu Thanh Chuong បើកសម្ពោធមក ជារៀងរាល់ឆ្នាំនៅទីនេះបានទទួលភ្ញៀវទេសចរក្នុងនិងក្រៅប្រទេសមកទស្សនាជាច្រើនកុះករ។ ពេលដែលមកដល់នៅទីនេះ ភ្ញៀវទេសចរមានអារម្មណ៍ស្រស់ស្រាយសប្បាយចិត្តនិងបានមើលផ្ទាល់ភ្នែកនូវភាពស្រស់ស្អាតនៃវប្បធម៌វៀតណាម។ ភាពស្រស់ស្អាតនិងសាមញ្ញនៃវប្បធម៌ស្រុកស្រែនិងភាពជិតស្នីទរបស់ Viet Phu Thanh Chuong រួមជាមួយភាពរស់រាយរាក់ទាក់ លទ្ធភាពរៀបចំ និងការតុបតែងយ៉ាងប៉ិនប្រសប់របស់ម្ចាស់ Viet Phu Thanh Chuong បានបន្សល់ទុកនូវចំណាប់អារម្មណ៍យ៉ាងជ្រាលជ្រៅក្នុងទឹកចិត្តរបស់ភ្ញៀវទេសចរពេលដែលបានមកដល់ទីនេះ។ លោកស្រី Kim Thu ភ្ញៀវទេសចរមកពីខ័ណ្ឌ Nam Tu Liem ទីក្រុងហាណូយ បានសំណេះសំណលថា

“ បរិយាកាសនៅទីនេះពិតជាអស្ចារ្យណាស់! ពេលដែលមកដល់នៅទីនេះជាមួយគ្រួសារខ្ញុំ នាងខ្ញុំមានអារម្មណ៍ដូចឈានចូលទៅក្នុងអាគារសិល្បៈមួយ ទាំងធម្មជាតិអេកូឡូស៊ី ដើមឈើ ទាំងស្ថាបត្យកម្មនិងជីវភាពរស់នៅវប្បធម៌ សុទ្ធសឹងតែមានលក្ខណៈប្រជាប្រិយ និងសាមញ្ញ។ ចំណុចដ៏សំខាន់មួយទៀតគឺកូនចៅរបស់នាងខ្ញុំមិនត្រឹមតែទទួលបាននូវបរិយាកាសរីករាយផងតែប៉ុណ្ណោះទេ ថែមទាំងបានទស្សនាដោយផ្ទាល់ភ្នែក និងចេះគោរពតម្លៃអត្តាសញ្ញាណវប្បធម៌ប្រជាជាតិវៀតណាមទៀតផង។”

Viet Phu Thanh Chuong ក្លាយទៅជាទីកន្លែងដ៏ល្បីឈ្មោះដែលមិនអាចរំលងសំរាប់ភ្ញៀវទេសចរជាតិនិងអន្តរជាតិ

កាសែតរបស់អាមេរិកដ៏ល្បីៗនៅលើពិភពលោក The New York Times បានផ្សព្វផ្សាយថា “មកដល់ Viet Phu Thanh Chuong ដើម្បីទស្សនាដោយផ្ទាល់ភ្នែកនូវស្ថាបត្យកម្មសិល្បៈដ៏ឧត្តុងឧត្តមនិងវិសេសវិសាលរបស់វៀតណាម ”។ Viet Phu Thanh Chuong បានក្លាយទៅជាទីកន្លែងមកលំហែមិនអាចរំលងសំរាប់ភ្ញៀវទេសចរជាតិនិងអន្តរជាតិពីព្រោះទីនេះគឺជាទីកន្លែងរក្សាអត្តសញ្ញាណនិងព្រលឹងនៃប្រទេសវៀតណាម៕    

លោកអ្នកនាងជាទីមេត្រី! សង្ឃឹមថាលោកអ្នកនាងនឹងពេញចិត្តជាមួយព័ត៌មានដែលយើងខ្ញុំទើបផ្ដល់ជូន។ រាល់សំបុត្រ មតិ ឬសំណួររបស់អស់លោកអ្នក សូមផ្ញើរមកអាស័យដ្ឋាន៖ កម្មវិធីផ្សាយជាភាសាខ្មែរ វិទ្យុសម្លេងវៀតណាម លេខ៤៥វិថី Ba Trieu រដ្ឋធានីហាណូយ ឬ Email៖ vov5khmer@gmail.com។ លោកអ្នកនាងអាចទាក់ទងជាមួយយើងខ្ញុំតាមរយៈទំព័រវែបសាយ Www.vovworld.vnផងដែរ។នាទីប្រអប់សំបុត្រមិត្តអ្នកស្ដាប់សូមបញ្ចប់នៅត្រឹមនេះ។ សូមជួបអស់លោកអ្នកនាងនាសប្ដាហ៍ខាងមុខ៕