ការបោះឆ្នោតនៅអាមេរិក៖ លោក Joe Biden និង Donald Trump បានទទួលជ័យជម្នះយ៉ាងលើសលប់នៅ "Super Tuesday"
(VOVWORLD) -លោក Joe Biden និង Donald Trump បានទទួលជ័យជម្នះនៅក្នុងរដ្ឋភាគច្រើន ក្នុងការបោះឆ្នោត "Super Tuesday" ដែលបានប្រព្រឹត្តិទៅកាលពីថ្ងៃទី ៥ ខែមីនា នៅសហរដ្ឋអាមេរិក ដោយពង្រឹងឋានៈរបស់ពួកគេជាបេក្ខជនប្រធានាធិបតីលេខ ១ នៃគណបក្សប្រជាធិបតេយ្យ និងគណបក្សសាធារណរដ្ឋ។
យោងតាមលទ្ធផលដែលបានប្រកាសដោយប្រព័ន្ធផ្សព្វផ្សាយធំៗជាច្រើននៅក្នុងសហរដ្ឋអាមេរិក រហូតដល់ព្រឹកថ្ងៃទី ៦ ខែមីនា ប្រធានាធិបតីអាមេរិកបច្ចុប្បន្ន និងជាបេក្ខជននៃគណបក្សប្រជាធិបតេយ្យ លោក Joe Biden និងអតីតប្រធានាធិបតី បេក្ខជនមកពីគណបក្សសាធារណរដ្ឋ លោក Donald Trump បានទទួលជ័យជម្នះយ៉ាងលើសលប់នៅក្នុងការបោះឆ្នោត "Super Tuesday" ដែលបានធ្វើឡើងនៅក្នុងរដ្ឋចំនួន ១៦ នៅសហរដ្ឋអាមេរិក កាលពីថ្ងៃទី ៥ ខែមីនា។
 ប្រធានាធិបតីអាមេរិក Joe Biden និងអតីតប្រធានាធិបតី Donald Trump។ រូបថត៖ រ៉យទ័រ |
ជាក់ស្តែង លទ្ធផលនៃការបោះឆ្នោតបឋមបានបង្ហាញថា ទាំងលោក Biden និងលោក Trump បានយកឈ្នះនៅក្នុងបណ្តារដ្ឋ California, Virginia, North Carolina, Maine, Massachusetts, Oklahoma, Tennessee, Texas, Arkansas, Alabama, Colorado និង Minnesota។ ថ្លែងទៅកាន់អ្នកគាំទ្រដើម្បីអបអរសាទរជ័យជម្នះរបស់ខ្លួន លោក Donald Trump បានអំពាវនាវឱ្យគណបក្សសាធារណរដ្ឋរួបរួមគ្នាឆ្ពោះទៅរកការបោះឆ្នោតសកល៖ “យើងមានគណបក្សសាធារណៈរដ្ឋដ៏អស្ចារ្យ ដែលមានទេពកោសល្យជាច្រើន។ ខ្ញុំចង់ឲ្យយើងរួបរួមគ្នា ហើយរួបរួមគ្នាក្នុងពេលឆាប់ៗ ព្រោះយើងគ្មានជម្រើសផ្សេងទៀតទេ នៅពេលដែលថ្ងៃបោះឆ្នោតថ្ងៃទី ៥ វិច្ឆិកា ខិតជិតមកដល់”។
 លោក Trump ថ្លែងនៅក្នុងពិធីជប់លៀងមួយ ដើម្បីតាមដានលទ្ធផលនៃការបោះឆ្នោតបឋម Super Tuesday នៅថ្ងៃទី ៥ ខែមីនា។ រូបថត៖ រ៉យទ័រ |
ជាមួយនឹងជ័យជម្នះយ៉ាងលើសលប់នៅ "Super Tuesday" លោកប្រធានាធិបតី Joe Biden បានទទួលសំឡេងគាំទ្របន្ថែមពីគណៈប្រតិភូប្រជាធិបតេយ្យចំនួន ១.៤២០សម្លេង ហើយបច្ចុប្បន្នមានសម្លេងគាំទ្រសរុបចំនួន ១.៦២៦ ។ ក្នុងពេលជាមួយគ្នានោះ លោក Donald Trump បានទទួលសម្លេងគាំទ្រចំនួន ៨៦៥ បន្ថែមទៀត ហើយបច្ចុប្បន្ន មានសម្លេងគាំទ្រសរុបចំនួន ១,១៣៨។ មជ្ឈដ្ឋានអ្នកសង្កេតការណ៍បានឲ្យដឹងថា លោក Joe Biden និងលោក Donald Trump អាចទទួលបានសម្លេងគាំទ្រដែលត្រូវការ មុនជាងគេបំផុតគឺនៅថ្ងៃទី ១៨ ខែមីនា នៅពេលដែលការបោះឆ្នោតបឋមបន្តប្រព្រឹត្តទៅនៅក្នុងរដ្ឋចំនួន ៤ (Florida, Illinois, Kansas, Ohio) ជាមួយគណបក្សប្រជាធិបតេយ្យ និងរដ្ឋចំនួន៥ ជាមួយគណបក្សសាធារណរដ្ឋ (Florida, Illinois, Kansas, Ohio និង Arizona)៕