ក្នុងលិខិតដែលផ្ញើរទៅកាន់អគ្គលេខាបក្ស ប្រធានរដ្ឋចិនលោក Xi Jinping អគ្គលេខាបក្ស ប្រធានរដ្ឋវៀតណាមលោក Nguyen Phu Trong បានសម្ដែងក្ដី សោមនស្សរីករាយដោយឃើញទំនាក់ទំនងជាអ្នកជិតខាងមិត្តភាព កិច្ចសហ ប្រតិបតិ្តការគ្រប់ជ្រុងជ្រោយរវាងបក្សទាំងពីរនិងប្រទេសទាំងពីរ សម្រេចបាន នូវលទ្ធផលដ៏ល្អប្រសើរជាច្រើនក្នុងឆ្នាំកន្លងទៅ។ ជំនួបប្រាស្រ័យជាន់ខ្ពស់ត្រូវ បានរក្សា កិច្ចសហប្រតិបតិ្តការលើគ្រប់វិស័យត្រូវបានពង្រឹងនិងពង្រីក ហើយ ជំនួបប្រាស្រ័យមិត្តភាពរវាងប្រជាជនក៏ត្រូវបានបង្កើនផងដែរ។ ប្រការទាំងនេះ បានរួមចំណែកនាំទំនាក់ទំនងភាពជាដៃគូសហប្រតិបតិ្តការយុទ្ធសាស្ត្រគ្រប់ជ្រុងជ្រោយរវាងវៀតណាមនិងចិនបន្តរីកចម្រើនប្រកបដោយចីរភាព។

        ក្នុងលិខិតឆ្លើយតបវិញ ប្រធានរដ្ឋចិនលោក Xi Jinping បានសង្កត់ធ្ងន់ថា ឆ្នាំ២០១៨ជាឆ្នាំគម្រប់រយៈពេល១០ឆ្នាំនៃការបង្កើតទំនាក់ទំនងភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងចិននិងវៀតណាម។ ភាគីទាំងពីរ បានពង្រីកចំណងមិត្តភាពប្រពៃណី ដោយបង្កើនការជួបប្រាស្រ័យ ពង្រឹងជំនឿ ទុកចិត្តនិងការគាំទ្រគ្នាទៅវិញទៅមក ព្រមទាំងពង្រីកកិច្ចសហប្រតិបត្តិការ លើគ្រប់វិស័យអោយកាន់តែស៊ីជំរៅនិងជាក់ស្ដែងពីមួយថ្ងៃទៅមួយថ្ងៃផងដែរ។

        អគ្គលេខាបក្ស ប្រធានរដ្ឋទាំងពីររូប មានគោលបំណងថា ក្នុងឆ្នាំ២០១៩ ភាគីទាំងពីរនឹងខិតខំប្រឹងប្រែងថែមទៀតដើម្បីពង្រីកលទ្ធផលនានាដែលសម្រេចបាន ពង្រឹងការជឿទុកចិត្តគ្នាផ្នែកនយោបាយ ដោះស្រាយបញ្ហានៅសេសសល់ អោយបានសមហេតុសមផល សំដៅនាំទំនាក់ទំនងរវាងបក្សទាំងពីរ ប្រទេស ទាំងពីរអោយបន្តរីកចម្រើនពីមួយថ្ងៃទៅមួយថ្ងៃ ឆ្លើយតបនឹងបំណងប្រាថ្នានិង ផលប្រយោជន៍ជាសារវ័ន្តរបស់ប្រជាជននៃប្រទេសទាំងពីរ ដើម្បីសន្តិភាព ស្ថិរភាពនិងកិច្ចសហប្រតិបតិ្តការក្នុងតំបន់និងលើពិភពលោក ផងដែរ៕