កិច្ចព្រមព្រៀងមានកម្រាស់ ២០ទំព័រ ដែលបានចុះហត្ថលេខាដោយប្រទេសចំនួន ១៨ បានកំណត់គោលការណ៍នៃ "ការរចនាប្រកបដោយសុវត្ថិភាព" តាមនោះ ក្រុមហ៊ុនអភិវឌ្ឍបញ្ញាសិប្បនិម្មិតនៅក្នុងប្រទេសទាំងនេះ ត្រូវសន្យាក្នុងការអភិវឌ្ឍន៍និងដាក់ឱ្យប្រើប្រាស់ប្រព័ន្ធAI តាមរបៀបដែលជួយអ្នកប្រើប្រាស់និងសាធារណជនភាគច្រើន ជៀសវាងការប្រើប្រាស់ប្រព័ន្ធទាំងនេះខុសពីគោលដៅ។ ក្រៅពីអាមេរិក ប្រទេសមួយចំនួនដែលមានកម្រិតអភិវឌ្ឍន៍ AI ខ្ពស់ ដូចជាអង់គ្លេស អាល្លឺម៉ង់ អ៊ីស្រាអែល អូស្ត្រាលី សិង្ហបុរី... ក៏បានចូលរួមក្នុងកិច្ចព្រមព្រៀងនេះផងដែរ។

ថ្វីត្បិតតែមិនមានលក្ខណៈចាប់បង្ខំផ្លូវច្បាប់ក៏ដោយ ប៉ុន្តែនេះគឺជាកិច្ចព្រមព្រៀងអន្តរជាតិលម្អិតដំបូងបង្អស់ស្តីពីសុវត្ថិភាព AI ដែលបណ្តាប្រទេសបានយល់ព្រម។ កិច្ចព្រមព្រៀងនេះក៏ត្រូវបានចាត់ទុកថា ជាការអនុវត្តសារអំពាវនាវរបស់នាយករដ្ឋមន្ត្រីអង់គ្លេស លោក Rishi Sunak នៅក្នុងកិច្ចប្រជុំកំពូលស្តីពីសុវត្ថិភាព AI កាលពីដើមខែវិច្ឆិកានៅចក្រភពអង់គ្លេស ដែលតាមនោះ រដ្ឋាភិបាលត្រូវតែដើរតួយ៉ាងសំខាន់ក្នុងការគ្រប់គ្រងសុវត្ថិភាព AI ៖ “រហូតមកដល់ពេលនេះ អ្នកដែលត្រួតពិនិត្យនិងសាកល្បងប្រព័ន្ធ AI ថ្មី គឺជាក្រុមហ៊ុនដែលបង្កើតប្រព័ន្ធនេះតែប៉ុណ្ណោះ។ ប្រការនេះត្រូវតែផ្លាស់ប្តូរ។ យើងនឹងសម្របសម្រួលជាមួយប្រទេសផ្សេងទៀត ដើម្បីធ្វើការសាកល្បងប្រព័ន្ធ AI មុនពេលចេញផ្សាយជាផ្លូវការ។ ការប្រើប្រាស់បច្ចេកវិទ្យានេះដោយសុវត្ថិភាព នឹងបង្កើតសមិទ្ធិផលលើសពីអ្វីដែលយើងធ្លាប់បានដឹង”៕