ប្រធានាធិបតីអ៊ុយក្រែនត្រូវបានអញ្ជើញទៅចូលរួមកិច្ចប្រជុំកំពូលរបស់ EU
(VOVWORLD) - នៅលើបណ្តាញសង្គម Twitter អ្នកនាំពាក្យរបស់ប្រធានក្រុមប្រឹក្សាអឺរ៉ុបលោក Barend Leyts កាលពីថ្ងៃទី ៧ ខែកុម្ភៈ បានជូនដំណឹងថា ប្រធានក្រុមប្រឹក្សាអឺរ៉ុបបានអញ្ជើញប្រធានាធិបតីអ៊ុយក្រែនលោក Volodymyr Zelensky ចូលរួមដោយផ្ទាល់នៅក្នុងកិច្ចប្រជុំកំពូលនៃសហភាពអឺរ៉ុប (EU) ដែលគ្រោងនឹងប្រារព្ធឡើងនៅទីក្រុងប្រ៊ុចសែល ប្រទេសបែលហ្សិក នៅថ្ងៃទី ៩ និង ១០ ខែកុម្ភៈ។
 ប្រធានាធិបតីអ៊ុយក្រែន លោក Volodymyr Zelensky និងប្រធានក្រុមប្រឹក្សាអឺរ៉ុបលោក Charles Michel ក្នុងសន្និសីទសារព័ត៌មានរួមនៅទីក្រុង Kiev ថ្ងៃទី១៩ ខែមករា ឆ្នាំ២០២៣។ (រូបថត៖ AFP/TTXVN) |
ប្រសិនបើលោក Zelensky ធ្វើដំណើរទស្សនកិច្ចនៅទីក្រុង Brussels នោះ ដំណើរនេះនឹងក្លាយជាដំណើរទស្សនកិច្ចលើកដំបូងរបស់លោក Zelensky ទៅកាន់សហភាពអឺរ៉ុប ហើយក៏ជាដំណើរទស្សនកិច្ចបរទេសលើកទីពីររបស់លោក ចាប់តាំងពីជម្លោះរុស្ស៊ី-អ៊ុយក្រែនបានផ្ទុះឡើងកាលពីឆ្នាំមុន។ មុននោះ ក្នុងខែធ្នូ ឆ្នាំ ២០២២ លោក Zelensky បានទៅបំពេញទស្សនកិច្ចនៅទីក្រុងវ៉ាស៊ីនតោន ជួបជាមួយប្រធានាធិបតីសហរដ្ឋអាមេរិក លោក Joe Biden និងថ្លែងសុន្ទរកថាទៅកាន់សភាសហរដ្ឋអាមេរិក។
នៅក្នុងកិច្ចប្រជុំកំពូលរបស់សហភាពអឺរ៉ុបលើកនេះ មេដឹកនាំសហភាពអឺរ៉ុបនឹងពិភាក្សាអំពីបញ្ហាសេដ្ឋកិច្ច ការធ្វើចំណាកស្រុក ក៏ដូចជាការបន្តគាំទ្រអ៊ុយក្រែនក្នុងជម្លោះបច្ចុប្បន្ន៕