ទិដ្ឋភាពនៃសម័យប្រជុំពិភាក្សាទូទៅក្នុងពិធីបើកសម័យប្រជុំប្រចាំឆ្នាំលើកទី៦១ នៃគណៈកម្មាធិការពិសេសស្តីពីប្រតិបត្តិការរក្សាសន្តិភាពរបស់អង្គការសហប្រជាជាតិ (រូបថត៖ Tran Thanh Tuan/TTXVN)

អញ្ជើញចូលរួមក្នុងកិច្ចប្រជុំនេះ មានប្រធានមហាសន្និបាតអង្គការសហប្រជាជាតិលើកទី៧៧ លោកស្រី Csaba Korosi តំណាងប្រទេសជាសមាជិក រួមទាំងប្រទេសចំនួន ១២៥ ដែលបានបញ្ជូនធនធានទៅចូលរួមកងកម្លាំងរក្សាសន្តិភាពអង្គការសហប្រជាជាតិ និងអង្គការអន្តរជាតិ រួមទាំងតំបន់ជាច្រើនផងដែរ។ អញ្ជើញថ្លែងមតិក្នុងជំនួបនេះ ទីប្រឹក្សាឯកអគ្គរដ្ឋទូត Nguyen Hoang Nguyen អនុប្រធានបេសកកម្មអចិន្ត្រៃយ៍វៀតណាមប្រចាំនៅអង្គការសហប្រជាជាតិបានអំពាវនាវឱ្យ អ.ស.ប ចាត់វិធានការទាន់ពេលវេលាបន្ថែមទៀត ដើម្បីលើកកំពស់សមត្ថភាពធានាសន្តិសុខ និងសុវត្ថិភាពសម្រាប់កងកម្លាំងរក្សាសន្តិភាពរបស់អង្គការសហប្រជាជាតិ។ ជាពិសេសផ្តល់អាទិភាពដល់ធនធានសម្រាប់កម្មវិធីបណ្តុះបណ្តាល មុនពេលដាក់ពង្រាយ ក៏ដូចជាដាក់បំពេញបន្ថែមឧបករណ៍វេជ្ជសាស្រ្តចាំបាច់សម្រាប់បេសកកម្ម។ វៀតណាមគាំទ្រកិច្ចខិតខំប្រឹងប្រែងរបស់អង្គការសហប្រជាជាតិ ក្នុងការកសាងភាពជាដៃគូជាសកលលើការរក្សាសន្តិភាព និងជំរុញកិច្ចសហប្រតិបត្តិការរវាងអង្គការសហប្រជាជាតិ និងអង្គការក្នុងតំបន់ រួមទាំងអាស៊ានផងដែរ៕

បច្ចុប្បន្ននេះ កងកម្លាំងជាង ៧៦.០០០នាក់ កំពុងបំពេញបេសកកម្មរក្សាសន្តិភាពរបស់អង្គការសហប្រជាជាតិ ក្នុងបេសកកម្មចំនួន ១២ ក្នុងតំបន់ចំនួន ៤ ភាគច្រើននៅទ្វីបអាហ្វ្រិក។ ចាប់ពីឆ្នាំ ២០១៤ ដល់បច្ចុប្បន្ន វៀតណាមបានដាក់ពង្រាយកម្មាភិបាល យុទ្ធជន និងប៉ូលីសជាង ៥២០ នាក់នៅក្នុងបេសកកម្មរក្សាសន្តិភាពរបស់អង្គការសហប្រជាជាតិនៅសាធារណរដ្ឋអាហ្រ្វិកកណ្តាល ស៊ូដង់ខាងត្បូង អាប៊ីយ និងមុខតំណែងបុគ្គលនៅអង្គការសហប្រជាជាតិ៕