(VOV)_នាថ្ងៃទី២៨មេសា នាយករដ្ឋមន្ត្រីវៀតណាម លោក Nguyen Xuan Phuc បានអញ្ជើញចូលរួមសន្និសីទជាន់ខ្ពស់ប្រចាំឆ្នាំសមាគមប្រជាជាតិអាស៊ីអាគ្នេយ៍( អាស៊ាន) លើកទី៣០។ នេះជាសន្និសីទសំខាន់ បើកឆាកអោយបណ្ដាសកម្មភាពផ្លូវការក្នុងឆ្នាំ អាស៊ាន២០១៧ និងគូសសញ្ញាដើមដំបូង រំលឹកខួបអនុស្សាវរីយ៍លើកទី៥០ទិវាបង្កើតអាស៊ាន (១៩៦៧-២០១៧)។ ជាសមាជិកសកម្ម និងមានការទទួលខុសត្រូវក្នុងសហគមន៍អាស៊ាន ចូលរួមសន្និសីទលើកនេះ វៀតណាមបន្តអះអាងនូវគោលនយោបាយមុនក៏ដូចជាក្រោយ គឺចាត់ទុកអាស៊ានជាអាទិភាពយុទ្ធសាស្ត្រ ក្នុងគោលនយោបាយកិច្ចការបរទេសរបស់ខ្លួន រួមចំណែកយ៉ាងសកម្មក្នុងកំណាត់ផ្លូវអភិវឌ្ឍន៍ជាបន្តរបស់អាស៊ាន។
 |
| វៀតណាមសកម្មរួមវិភាគទានចំពោះការជោគជ័យនៃសន្និសីទជាន់ខ្ពស់អាស៊ាន |
ឆ្នាំ២០១៧ បានគូសសញ្ញាសម្គាល់រយៈពេល៥០ឆ្នាំកសាងនិងអភិវឌ្ឍន៍របស់អាស៊ាន។ សន្និសីទជាន់ខ្ពស់អាស៊ាន ៣០ ជាឱកាសមួយដើម្បីថ្នាក់ដឹកនាំនៃបណ្ដាប្រទេសជាសមាជិកអះអាងតួនាទីជាមជ្ឈមណ្ឌលរបស់អាស៊ាន ក្នុងតំបន់ និងទប់ទលនឹងការជះឥទ្ធិពលនានាពីសភាពការណ៍តំបន់និងលើពិភពលោក។
អាស៊ានក្រោយរយៈពេលមួយឆ្នាំបង្កើតសហគមន៍
រយៈមួយឆ្នាំកន្លងទៅ ទោះបីជាស្ថានភាពនៅលើពិភពលោកមានបំរ៉ែបំរួលស្មុគស្មាញក្តី ប៉ុន្តែអាស៊ាននៅបន្តឈានចូលដំណាក់កាលអភិវឌ្ឍន៍ថ្មី។ ក្រោយរយៈពេលមួយឆ្នាំបង្កើតសហគមន៍ និងអនុវត្តចក្ខុវិស័យ២០២៥ អាស៊ានទទួលបានលទ្ធផលគួរអោយកត់សម្គាល់ជាច្រើន ក្នុងសរសរទ្រូងទាំងបីគឺសន្តិសុខ-នយោបាយ សេដ្ឋកិច្ច វប្បធម៌-សង្គមកិច្ច។ អនុរដ្ឋមន្ត្រីការបរទេសវៀត ណាម លោក Nguyen Quoc Dung ប្រធាន SOM ASEAN របស់វៀតណាម បានចាត់ទុកថា៖
“ ក្នុងសភាពការណ៍លើពិភពលោកមានបំរ៉ែបំរួលជាច្រើន ពិបាកព្យាករណ៍។ ប្រទេសអាស៊ានជាច្រើនមានការប្រែប្រួលអំពីនយោបាយ។ ក្នុងសភាពការណ៍នោះ ឧបសគ្គធំបំផុតចំពោះអាស៊ានគឺធ្វើយ៉ាងមេចដើម្បីរក្សាបានអត្តសញ្ញាណ រក្សាបានឯករាជ្យ ភាពម្ចាសការក្នុងសេចក្ដីសម្រេចគោលនយោបាយរបស់អាស៊ាន ដើរតួនាទីស្នូលក្នុងយន្តការសហប្រតិបត្តិការក្នុងតំបន់ និងអាចរួមវិភាគទានចំពោះបញ្ហាផ្សេងៗរបស់ពិភពលោក។”
ការលំបាកសាកល្បងទាំងនោះបានទាមទារអោយមានការប្តេជ្ញាចិត្តខ្លាំងពីប្រទេសសមាជិកអាស៊ានទាំងឡាយ សំដៅជំរុញតំបន់អភិវឌ្ឍន៍តាមទិសដែលបានដាក់ចេញ។ នៅសន្និសីទនេះ បណ្ដាថ្នាក់ដឹកនាំអាស៊ាន នឹងប្រមូលផ្តុំពិភាក្សាទៅលើបញ្ហាអភិវឌ្ឍន៍ក្នុងប្លុក។
សន្និសីទលើកនេះក៏ជាឱកាសមួយដើម្បីអាស៊ានពិនិត្យមើលបើកទូលាយទំនាក់ទំនងសហប្រតិ បត្តិការជាមួយប្រទេសសន្ទនាផ្សេងៗថែមទៀត។ទន្ទឹមនឹងនោះបណ្ដាថ្នាក់ដឹកនាំអាស៊ាននឹងពិភាក្សា អំពីបញ្ហានានាក្នុងតំបន់និងអន្តរជាតិដែលបានយកចិត្តទុកដាក់ដូចគ្នា។
វៀតណាមសកម្មរួមវិភាគទានកសាងសហគមន៍អាស៊ាន
ក្រោយរយៈពេលជាង២០ឆ្នាំចូលរួមអាស៊ាន វៀតណាមជានិច្ចកាលជាសមាជិកសកម្ម និងមានការទទួលខុសត្រូវ រួមវិភាគទានចំពោះចំណងសាមគ្គីភាព ឯកភាពក្នុងអាស៊ាន។ ជោគជ័យរបស់អាស៊ាន ក្នុងរយៈពេលជាងមួយឆ្នាំកន្លងទៅ មានការរួមវិភាគទានច្រើនពីវៀតណាម ត្រូវបានបង្ហាញតាមរយៈសកម្មភាពសហប្រតិបត្តិការទាំងឡាយរបស់អាស៊ាន។ គ្រប់ក្រសួងនិងស្ថាប័នវៀតណាមសុទ្ធតែបានកសាងគំរោងការណ៍ កម្មវិធីនិង ផែនការអនុវត្តចក្ខុវិស័យ និងផែនការមេរបស់សរសរទ្រូងចំនួន៣របស់សហគមន៍។
នាយករដ្ឋមន្ត្រីវៀតណាម លោក Nguyen Xuan Phuc បានដឹកនាំគណៈប្រតិភូវៀតណាមអញ្ជើញចូលរួមសន្និសីទជាន់ខ្ពស់អាស៊ាន ទី៣០នេះ ជាឱកាសមួយដើម្បីវៀតណាមបន្តអះអាងរូបភាពសមាជិកមានកិត្យានុភាព ម្ចាសការសកម្ម និងមានការទទួលខុសត្រូវ។អនុរដ្ឋមន្ត្រីការបរទេស លោក Nguyen Quoc Dung បានសង្កត់ធ្ងន់ថា៖
“ វៀតណាមមានបណ្ដាគោលនយោបាយ សកម្មភាព មិនគ្រាន់តែដើម្បីផលប្រយោជន៍របស់ខ្លួនប៉ុណ្ណោះទេ ថែមទាំងដើម្បីផលប្រយោជន៍របស់អាស៊ាននិងសហគមន៍ទៀតផង។ វៀតណាមក៏បានយកចិត្តទុកដាក់ចំពោះផលប្រយោជន៍របស់ប្រទេសមិត្តនានា ធ្វើយ៉ាងមែចអោយសមហេតុ សមផល នាំមកនូវឯកភាពរួមក្នុងអាស៊ាន។”
វៀតណាមនឹងបន្តពង្រីកតួនាទីរបស់ខ្លួនច្រើនថែមទៀត ជំរុញខ្លាំងវិស័យសហប្រតិបត្តិការជាក់ស្ដែង នាំមកនូវផលប្រយោជន៍ជាក់ស្ដែង សំរាប់ប្រជាជនប្រទេសជាសមាជិកនានា។ពិសេស វៀតណាមកំពុងខំប្រឹងប្រែងជាមួយប្រទេសផ្សេងៗក្នុងតំបន់រក្សាចំណងសាមគ្គីភាព ឯក ភាព និងជោគជ័យរបស់អាស៊ាន៕