រួមវិភាគទានយ៉ាងសកម្មក្នុងការអភិវឌ្ឍរបស់អាស៊ាន

បន្ទាប់ពីចូលជាសមាជិកអាស៊ាន វៀតណាមបានជំរុញអាស៊ានយ៉ាងសកម្មដើម្បីទទួលយកឡាវ មីយ៉ាន់ម៉ា និងកម្ពុជាជាសមាជិក។ វៀតណាមបានក្លាយជាស្ពានតភ្ជាប់រវាងតំបន់អាស៊ីអាគ្នេយ៍ដីគោក និងអាស៊ីអាគ្នេយ៍កោះសមុទ្រ ដូច្នេះហើយនៅឆ្នាំ ១៩៩៩ ក្ដីសុបិនអំពីមហាគ្រួសារអាស៊ានដែលមានប្រទេសអាស៊ីអាគ្នេយ៍ចំនួន ១០ បានក្លាយជាការពិត។ វៀតណាមដើរតួនាទីយ៉ាងសំខាន់ក្នុងការកំណត់គោលដៅ ទិសដៅអភិវឌ្ឍន៍ និងបង្កើតសេចក្តីសម្រេចសំខាន់ៗក្នុងអាស៊ាន ដូចជាសន្ធិសញ្ញាអាស៊ីអាគ្នេយ៍គ្មានអាវុធនុយក្លេអ៊ែរ; ចក្ខុវិស័យអាស៊ានឆ្នាំ ២០២០ និងផែនការអនុវត្តន៍ចក្ខុវិស័យ ដូចជា៖ កម្មវិធីសកម្មភាពទីក្រុងហាណូយ ផែនការសកម្មភាពទីក្រុងវៀងច័ន្ទ; សេចក្តីថ្លែងការណ៍ស្ដីពីកិច្ចស្រុះស្រួលអាស៊ាន ២; ធម្មនុញ្ញអាស៊ាន; ផែនទីបង្ហាញផ្លូវសម្រាប់កសាងសហគមន៍អាស៊ាន; ចក្ខុវិស័យសហគមន៍អាស៊ានឆ្នាំ ២០២៥។

អគ្គលេខាធិការអាស៊ាន លោក កៅ គឹមហួន។ (រូបថត៖ TTXVN)

អគ្គលេខាធិការអាស៊ាន លោក កៅ គឹមហួន បានសង្កត់ធ្ងន់លើការរួមវិភាគទានរបស់វៀតណាមថា៖ “ចាប់តាំងពីក្លាយជាសមាជិកផ្លូវការរបស់អាស៊ាន ខ្ញុំគិតថា វៀតណាមជានិច្ចកាលជាសមាជិកដ៏សកម្ម និងមានការរួមវិភាគទានសំខាន់ៗជាច្រើនដល់អាស៊ាន។ មិនថាកាន់តួនាទីជាប្រធានអាស៊ាន បំពេញភារកិច្ចក្នុងលេខាធិការដ្ឋានអាស៊ាន ឬជាប្រទេសសម្របសម្រួលជាមួយដៃគូសន្ទនាទេ វៀតណាមជានិច្ចកាលជាសមាជិកដ៏សកម្ម ហើយនៅវេទិកាអន្តរជាតិនានា វៀតណាមក៏តែងតែជំរុញផលប្រយោជន៍របស់ប្រទេសអាស៊ានផងដែរ។ អាចនិយាយបានថា វៀតណាមគឺជាសមាជិកដ៏សកម្ម ម្ចាស់ការ និងមានការរួមវិភាកទានដ៏យ៉ាងធំធេងសម្រាប់អាស៊ាន”។

មិនត្រឹមតែចូលរួមកសាងការសម្រេចចិត្តប៉ុណ្ណោះទេ ក្នុងដំណាក់កាលអភិវឌ្ឍន៍នីមួយៗរបស់អាស៊ាន វៀតណាមជានិច្ចកាលធ្វើការយ៉ាងសកម្ម និង ម៉ឺងម៉ាត់ ដើម្បីរួមជាមួយអាស៊ាន នាំការសម្រេចចិត្តទាំងនោះចូលក្នុងការអនុវត្តជាក់ស្ដែង ដូចជាការអនុវត្តឯកសារចក្ខុវិស័យ ការនាំធម្មនុញ្ញអាស៊ានចូលក្នុងជីវភាព។ នាបច្ចុប្បន្ននេះ វៀតណាមបាននិងកំពុងរួមជាមួយសមាជិកអាស៊ានដទៃទៀត អនុវត្តន៍យ៉ាងសកម្មនូវការកសាងសហគមន៍ អនុវត្តន៍យ៉ាងម៉ឺងម៉ាត់នូវការសន្យា ហើយស្នើគំនិតផ្តួចផ្តើមលើវិស័យជាច្រើន។ គួរឲ្យកត់សម្គាល់ថា វៀតណាមជាប្រទេសមួយក្នុងចំណោមប្រទេសទាំងពីរដែលមានអត្រាអនុវត្តខ្ពស់បំផុតនៃវិធានការអាទិភាពក្នុងផែនការមេកសាងសហ
គមន៍សេដ្ឋកិច្ចអាស៊ាន (បន្ទាប់ពីសិង្ហបុរី)។

ខិតខំប្រឹងប្រែងលើកកំពស់ឋានៈនិងតួនាទីរបស់អាស៊ានលើឆាកអន្តរជាតិ

វៀតណាមមានការរួមចំណែកដ៏សំខាន់ជាច្រើនក្នុងការពង្រីកទំនាក់ទំនង និងជំរុញកិច្ចសហប្រតិបត្តិការរវាងអាស៊ាន និងដៃគូនានា។ នាឆ្នាំ ២០១០ ក្នុងឋានៈជាប្រធានអាស៊ាន វៀតណាមបានជំរុញការពង្រីកនៃកិច្ចប្រជុំកំពូលអាស៊ីបូព៌ា (EAS) សម្រាប់ប្រទេសរុស្ស៊ី និងសហរដ្ឋអាមេរិកចូលរួម។ វៀតណាមក៏បានបំពេញដោយជោគជ័យនូវតួនាទីសម្របសម្រួលទំនាក់ទំនងអាស៊ានជាមួយចិន សហភាពអឺរ៉ុប (EU) ឥណ្ឌា និងជប៉ុនផងដែរ។ ការរួមវិភាគទានរបស់វៀតណាមចំពោះអាស៊ានក៏ត្រូវបានបង្ហាញតាមរយៈការទទួលរៀបចំប្រកបដោយជោគជ័យនូវសកម្មភាព និងកិច្ចប្រជុំសំខាន់ៗរបស់អាស៊ាន តាមនោះរួមចំណែកពង្រឹងសាមគ្គីភាព ឯកភាពក្នុងអាស៊ាន ហើយលើកកំពស់កិត្យានុភាពរបស់សមាគម និងបង្កើតសញ្ញាសម្គាល់របស់ប្រទេសប្រធាន។

លោក Veeramalla Anjaiah នៅមជ្ឈមណ្ឌលសិក្សាស្រាវជ្រាវអាស៊ីអាគ្នេយ៍។ (រូបថត៖ VOV)

ក្នុងបរិបទដែលពិភពលោក និងតំបន់តែងតែរងផលប៉ះពាល់ដោយការប្រែប្រួលយ៉ាងឆាប់រហ័ស និងស្មុគស្មាញ ដែលប៉ះពាល់ដោយផ្ទាល់ និងដោយប្រយោលដល់សន្តិសុខ និងស្ថិរភាពនៅអាស៊ីអាគ្នេយ៍ វៀតណាមបានរួមចំណែកក្នុងដំណើរការកសាងគោលការណ៍ និង “ច្បាប់លេងល្បែង” ហើយចូលរួមជាមួយអាស៊ាន ឆ្លើយតបប្រកបដោយប្រសិទ្ធភាពទៅនឹងការគម្រាមកំហែងដល់សន្តិភាព សន្តិសុខ និងស្ថិរភាពក្នុងតំបន់ ជំរុញកិច្ចសន្ទនា កិច្ចសហប្រតិបត្តិការក្នុងប្លុក និងជាមួយដៃគូនានារបស់អាស៊ាន។ លោក Veeramalla Anjaiah នៅមជ្ឈមណ្ឌលសិក្សាស្រាវជ្រាវអាស៊ីអាគ្នេយ៍ (CSEAS) បានវាយតម្លៃថា៖

“វៀតណាមកំពុងសហប្រតិបត្តិការប្រកបដោយប្រសិទ្ធភាពជាមួយបណ្តាប្រទេសជាសមាជិក ដើម្បីឆ្លើយតបទៅនឹងការគំរាមកំហែងដល់សន្តិភាព សន្តិសុខ និងស្ថិរភាពក្នុងតំបន់ ទន្ទឹមនឹងនោះជំរុញកិច្ចសន្ទនា និងកិច្ចសហប្រតិបត្តិការ។ វៀតណាមបានដើរតួនាទីយ៉ាងសំខាន់ក្នុងចក្ខុវិស័យអាស៊ានស្តីពីឥណ្ឌូ-ប៉ាស៊ីហ្វិក (AOIP) ឆ្នាំ២០១៩ និងសេចក្តីថ្លែងការណ៍ស្តីពីការប្រតិបត្តិរបស់ភាគីនានានៅសមុទ្រខាងកើតឆ្នាំ ២០០២។ បច្ចុប្បន្ននេះ វៀតណាមរួមជាមួយប្រទេសអាស៊ានកំពុងចរចាជាមួយចិនដើម្បីបង្កើតក្រមប្រតិបត្តិ (COC) នៅសមុទ្រខាងកើត។ វៀតណាមសាមគ្គីជាមួយអាស៊ាននៅក្នុងគ្រប់ឱកាស រួមចំណែកដល់ជោគជ័យនៃប្លុក ហើយកំពុងខិតខំប្រឹងប្រែងសហប្រតិបត្តិការដើម្បីសន្តិភាព ការអភិវឌ្ឍ និងវិបុលភាពនៃតំបន់ទាំងមូលផងដែរ”។

ដោយមានបាវចនា ម្ចាស់ការ សកម្ម ទទួលខុសត្រូវ និងប្រកាន់ខ្ជាប់នឹងគោលការណ៍របស់អាស៊ាន វៀតណាមបានចូលរួមជាមួយបណ្តាប្រទេសជាសមាជិក ខិតខំប្រឹងប្រែងនាំនាវាអាស៊ានជំនះពុះពារលើខ្យល់ព្យុះ ឆ្លើយតបដោយម្ចាស់ការនិងសម្របខ្លួនទៅនឹងបរិបទថ្មី រក្សាយ៉ាងរឹងមាំនូវសន្ទុះសហប្រតិបត្តិការនិងការតភ្ជាប់តំបន់ បញ្ជាក់ពីមជ្ឈភាព និងលើកកំពស់ឋានៈរបស់អាស៊ានលើឆាកអន្តរជាតិ៕