ພາບປະກອບ
|
(vovworld) – ວັນທີ 2/11, ອົງການຮ່ວມມືສາກົນ ຍີ່ປຸ່ນ (JICA) ແລະ ຄະນະກຳມະການປະຊາຊົນແຂວງ ດົ່ງນາຍ ບັນລຸໄດ້ຂໍ້ຕົກລົງກ່ຽວກັບການໜູນຊ່ວຍທຶນຮອນ ແລະ ປະຕິບັດໂຄງການລະບາຍນ້ຳ ແລະ ບຳບັດນ້ຳເສຍເຂດຕົວເມືອງ ບຽນຮ່ວາ ພາຍຫຼັງການເຈລະຈາເປັນເວລາ 10 ປີ. ທີ່ການເຊັນຂໍ້ຕົກລົງລະຫວ່າງ JICA ແລະ ຄະນະກຳມະການປະຊາຊົນແຂວງ ດົ່ງນາຍ, ທ່ານ ເຈີ່ນວັນຫວີງ, ຮອງປະທານຄະນະກຳມະການປະຊາຊົນແຂວງ ດົ່ງນາຍ ໃຫ້ຮູ້ວ່າ, ໂຄງການລະບາຍນ້ຳ ແລະ ບຳບັດນ້ຳເສຍເຂດຕົວເມືອງ ບຽນຮ່ວາ ບໍ່ພຽງແຕ່ມີຄວາມໝາຍອັນໃຫຍ່ຫຼວງສຳລັບນະຄອນເທົ່ານັ້ນ ຫາກນັບທັງທົ່ວພາກພື້ນອີກດ້ວຍ. ແຂວງ ດົ່ງນາຍຈະສ້າງເງື່ອນໄຂສະດວກທີ່ສຸດເພື່ອໃຫ້ໂຄງການຜັນຂະຫຍາຍບັນລຸໄດ້ ແລະ ລື່ນກາຍຄວາມກ້າວໜ້າ. ພາຍຫຼັງ JICA ແລະ ດົງນາຍ ເຊັນບັນດາເນື້ອໃນການປຶກສາຫາລື, ອົງການນີ້ຈະຍື່ນສະເໜີຕໍ່ລັດຖະບານ ຍີ່ປຸ່ນ ເພື່ອເປັນເອກະພາບກັບລັດຖະບານ ຫວຽດນາມ ເຊັນສັນຍາໃຫ້ກູ້ຢືມທຶນຜັນຂະຫຍາຍໂຄງການ.