ກອງປະຊຸມShangri-Laຄັ້ງທີ13:ຫລາຍຄະນະຜູ້ແທນສົນໃຈເຖິງການຜັນແປທີ່ອັນຕະລາຍຢູ່ທະເລຕາເວັນອອກ
(vovworld)-ກອງປະຊຸມ Shangri- La ຄັ້ງທີ 13 ຖືກໄຂຂຶ້ນໃນຕອນຄຳ່ວັນທີ 30/5 ຢູ່ ສິງກະໂປ ໂດຍມີການເຂົ້າຮ່ວມຂອງຜູ້ແທນກວ່າ 400 ທ່ານ ມາຈາກ 30 ປະເທດ ແລະ ອົງການສາກົນ. ທີ່ວາລະໄຂກອງປະຊຸມ, ທ່ານນາຍົກລັດຖະມົນຕີ ຍີ່ປຸ່ນ Shinzo Abe ດ້ວຍຖານະເປັນນັກປາຖະກະຖາຕົ້ນຕໍຂອງ ກອງປະຊຸມ Shangri- La 13 ໄດ້ສະແດງການສະຫນັບສະຫນູນຂອງຍີ່ປຸ່ນ ກັບບັນດາປະເທດສະມາຊິກ ອາຊຽນ ໃນການຮັບປະກັນຄວາມໝັ້ນຄົງຢູ່ບັນດາເຂດທະເລ ແລະ ເຂດນ່ານຟ້າກໍຄືການຮັກສາຄວາມເສລີໃນການເດີນທະເລ ແລະ ຄວາມເສລີໃຫ້ແກ່ບັນດາຖ້ຽວບິນທາງອາກາດ. ທ່ານນາຍົກລັດຖະມົນຕີ Shinzo Abe ຊີ້ແຈ້ງວ່າ: ລັດຖະບານ ຍີ່ປຸ່ນ ສະຫນັບສະຫນູນຢ່າງແຮງບັນດາຄວາມມານະພະຍາຍາມຂອງ ຟິລີບປີນ ໃນເລື່ອງຮຽກຮ້ອງການແກ້ໄຂຄວາມຂັດແຍ້ງຢູ່ທະເລຕາເວັນອອກຕ້ອງສອດຄ່ອງກັບ 3 ຫລັກການກ່ຽວຂ້ອງເຖິງກົດໝາຍທະເລ ແລະ ຍີ່ປຸ່ນ ຊົມເຊີຍບັນດາຄວາມມານະພະຍາຍາມຂອງຫວຽດນາມໃນການແກ້ໄຂບັນດາບັນຫາຜ່ານການເຈລະຈາ. ທ່ານ Abe ຮຽກຮ້ອງ ອາຊຽນ ແລະ ຈີນ ບັນລຸປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກໂດຍໄວ(COC).
ທ່ານນາຍົກລັດຖະມົນຕີ ຍີ່ປຸ່ນ Shinzo Abe ກ່າວຄຳເຫັນ
ທີ່ກອງປະຊຸມ
ພາບ:baotintuc.vn
|
ກ່ອນຫນ້ານັ້ນ, ຕອນບ່າຍວັນທີ 30/5, ທີ່ກອງປະຊຸມ Shangri-La ຄັ້ງທີ 13 ຢູ່ ສິງກະໂປ, ໃນການພົບປະສອງຝ່າຍຄັ້ງຕ່າງໆກັບຄະນະຜູ້ແທນຫວຽດນາມ, ຫົວຫນ້າຄະນະຜູ້ແທນປະເທດ ນິວເຊີແລນ, ສິງກະໂປ ແລະ ລັດເຊຍ ລ້ວນແຕ່ສະແດງຄວາມສົນໃຈເຖິງສະພາບການເຄ່ັ່ງຕຶງຢູ່ທະເລຕາເວັນອອກ. ທີ່ການພົບປະສອງຝ່າຍກັບທ່ານພົນເອກ ຟຸ່ງກວາງແທງ, ລັດຖະມົນຕີກະຊວງປ້ອງກັນປະເທດຫວຽດນາມ, ລັດຖະມົນຕີກະຊວງປ້ອງກັນປະເທດ ນີວເຊີແລນ Jonathan Coleman, ລັດຖະມົນຕີກະຊວງປ້ອງກັນປະເທດ ສິງກະໂປ Ng Eng Heng ລ້ວນແຕ່ສະແດງຄວາມສົນໃຈກ່ຽວກັບບັນດາການຜັນແປທີ່ອັນຕະລາຍປະຈຸບັນຢູ່ທະເລຕາເວັນອອກ ຊື່ງພວມນາບຂູ່ເຖິງສັນຕິພາບ ແລະ ຄວາມໝັ້ນຄົງໃນພາກພື້ນ. ທ່ານລັດຖະມົນຕີກະຊວງປ້ອງກັນປະເທດຫວຽດນາມແຈ້ງໃຫ້ຄູ່ຕຳແຫນ່ງ 2 ທ່ານດັ່ງກ່າວຮັບຊາບວ່າ: ນັບແຕ່ເມື່ອຈີນ ຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ເຂດໄຫລ່ທະວີບຂອງຫວຽດນາມ, ຫວຽດນາມ ໄດ້ຕັ້ງຫນ້າພົວພັນຕິດຕໍ່, ເຈລະຈາກັບຝ່າຍຈີນ ຢູ່ຫລາຍຂັ້ນ ດ້ວຍຄວາມປາດຖະຫນາຢາກໃຫ້ສອງຝ່າຍລະງັບໃຈ, ແກ້ໄຂຄວາມຂັດແຍ້ງໂດຍສັນຕິວິທີ. ທ່ານພົນເອກ ຟຸ່ງກວາງແທງ ຢືນຢັນວ່າ: ຫວຽດນາມ ລະງັບໃຈທີ່ສຸດ ແລະ ຕັດສິນໃຈປົກປັກຮັກສາອະທິປະໄຕໂດຍສັນຕິວິທີ.