ກອງປະຊຸມສະຫລຸບ ຂະແໜງໄອຍະການ
ປະທານປະເທດເຈືອງເຕີນຊາງກ່າວຄຳເຫັນທີ່ກອງປະຊຸມ
(ພາບ: noichinh.vn)
(vovworld)- ກ່າວຄຳເຫັນທີ່ກອງປະຊຸມສະຫລຸບຂະແໜງໄອຍະການ ຈັດຂຶ້ນໃນຕອນເຊົ້າວັນທີ 16/1, ທ່ານປະທານປະເທດເຈືອງເຕີນຊາງ ເນັ້ນໜັກວ່າ: ປີ 2014, ຫວຽດນາມ ຍັງຕ້ອງປະເຊີນໜ້າກັບການກີດຂວາງ, ສິ່ງທ້າທາຍຫຼາຍຢ່າງຄື: ເສດຖະກິດຍັງປະສົບກັບຄວາມຫຍຸ້ງຍາກ, ສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຍັງມີການຜັນແປອັນສັບສົນ, ໄພສໍ້ລາດບັງຫຼວງ, ຟູມເຟືອຍຍັງປະກົດຢ່າງສັບສົນ, ອາດຊະຍາກຳບາງປະເພດມີທ່າເພີ່ມຂຶ້ນ; ບັນດາອິດທິກຳລັງທີ່ເປັນປໍລະປັກຍາມໃດກໍ່ຊອກຫາວິທີກໍ່ຄວາມຂາດສະຖຽນລະພາບທາງສັງຄົມ, ນາບຂູ່ອະທິປະໄຕຜືນແຜ່ນດິນ. ສະນັ້ນ, ຂະແໜງໄອຍະການຕ້ອງກວດກາການເຄື່ອນໄຫວຕຸລາການ, ຮັບປະກັນການປັບໄຫມລົງໂທດອາດຊະຍາກຳຢ່າງທັນການ, ເຂັ້ມງວດ, ຖືກຄົນ, ຖືກໂທດ, ຖືກຕ້ອງຕາມກົດໝາຍ:
“ອົງການໄອຍະການທຸກຂັ້ນຕ້ອງເພີ່ມທະວີຄວາມຮັບຜິດຊອບໄອຍະການໃນການເຄື່ອນໄຫວສືບສວນຢ່າງຄົບຖ້ວນ, ແໜ້ນແຟ້ນກ່ຽວກັບເລື່ອງຮັບ, ແກ້ໄຂການແຈ້ງຂ່າວອາດຊະຍາກຳ ແລະ ສະເໜີເປີດການສືບສວນສອບສວນ; ເດັດດ່ຽວປະຕິບັດຢ່າງຄົບຖ້ວນບັນດາສິດເມື່ອປະຕິບັດສິດໄອຍະການ ແລະ ກວດກາການເຄື່ອນໄຫວຕຸລາການ, ຮັບປະກັນສິດຕັດສິນຂອງບັນດາອົງການດຳເນີນຄະດີທີ່ມີຂໍ້ອ້າງອີງ, ຖືກຕ້ອງຕາມກົດໝາຍ. ສົມທົບກັບອົງການສືບສວນເພື່ອປະຕິບັດບົດບາດ, ຄວາມຮັບຜິດຊອບຂອງອົງການໄອຍະການ; ສະກັດກັ້ນ, ແກ້ໄຂການສວຍໃຊ້ສິດອຳນາດ, ລະເມີດສິດປະຊາທິປະໄຕຂອງພົນລະເມືອງ ພ້ອມທັງຮັບປະກັນລັກສະນະເຂັ້ມງວດຂອງລັດຖະທຳມະນູນ ແລະ ກົດໝາຍ“./.