(vovworld) – ວັນທີ 3/2, ຄະນະການນຳນະຄອນ ໂຮ່ຈີມິນ ໂດຍທ່ານເລຂາຄະນະພັກນະຄອນ ເລແທງຫາຍ ເປັນຫົວໜ້າຄະນະ ໄດ້ຖະຫວາຍທູບທຽນ, ດອກໄມ້ຢູ່ອະນຸສາວະລີປະທານ ໂຮ່ຈີມິນ ຢູ່ຫໍພິພິດທະພັນ ໂຮ່ຈີມິນ ສາຂານະຄອນ ໂຮ່ຈີມິນ. ພາຍຫຼັງພິທີຖະຫວາຍທູບທຽນ, ການນຳນະຄອນໄດ້ເຂົ້າຮ່ວມພິທີໄຂງານວາງສະແດງດ້ວຍຫົວຂໍ້ວ່າ “ປະທານ ໂຮ່ຈີມິນ - ຜູ້ກໍ່ຕັ້ງ ແລະ ຝຶກຝົນຫຼໍ່ຫຼອມພັກກອມມູນິດ ຫວຽດນາມ”. ຕອນເຊົ້າວັນດຽວກັນ, ອົງຄະນະພັກກຸ່ມປະຊາຊົນ - ອຳນາດການປົກຄອງ - ຄະນະພັກນະຄອນ ໂຮ່ຈີມິນຈັດຕັ້ງພິທີສະເຫຼີມສະຫຼອງ 85 ປີແຫ່ງວັນສ້າງຕັ້ງພັກກອມມູນິດ ຫວຽດນາມ ແລະ ຍ້ອງຍໍຊົມເຊີຍເລຂາໜ່ວຍພັກ, ເລຂາອົງຄະນະພັກດີເດັ່ນ 85 ຄົນ. ທ່ານນາງ ຫງວຽນຫງວຽດເຫ້ວ, ເລຂາໜ່ວຍພັກສະມາຄົມທະນາຍຄວາມນະຄອນ, ໜຶ່ງໃນບັນດາເລຂາທີ່ໄດ້ຮັບການຍ້ອງຍໍຊົມເຊີຍ, ແບ່ງປັນວ່າ:
“ພັກຂອງພວກເຮົາຍາມໃດກໍ່ຕ້ອງດຳເນີນຊີວິດຢ່າງກ້ວາງຂວາງເພື່ອໃຫ້ອ້າຍເອື້ອຍນ້ອງເຫັນໄດ້ອຸດົມຄະຕິຂອງພັກ, ຂອງການປະຕິວັດ ແລະ ເຂົ້າຮ່ວມຢ່າງສຸດຈິດສຸດໃຈ. ຕົວຢ່າງຄື: ໃນແຜນການປະຈຳປີ ຈັດຕັ້ງການຂົນຂວາຍສະມາຊິກຊາວໜຸ່ມກັບເມືອກົກເຂົ້າເຫງົ້າກໍ່, ກັບເມືອເຂດຫ່າງໄກຊອກຫຼີກ, ກໍ່ສ້າງຂົວຢູ່ເຂດຊົນນະບົດ, ເຮືອນແຫ່ງສາຍຈິດມິດໃຈ, ເຮືອນແຫ່ງຄວາມຮັກ… ຜ່ານນັ້ນຈົ່ງຂົນຂວາຍສະມາຊິກພັກສູ້ຊົນ, ປະກອບສ່ວນໃຫ້ແກ່ປະເທດໄດ້”
ແລະກໍ່ໃນວັນດຽວກັນ, ຢູ່ນະຄອນ ດ່າໜັ້ງ, ແຂວງ ທ໋າຍງວຽນ, ນະຄອນ ຮ່າໂນ້ຍ… ກໍ່ໄດ້ຈັດຕັ້ງພິທີສະເຫຼີມສະຫຼອງ 85 ປີແຫ່ງວັນສ້າງຕັ້ງພັກກອມມູນິດ ຫວຽດນາມ, ສະຫລຸບຂະບວນການແຂ່ງຂັນຮັກຊາດປີ 2014 ແລະ ປຸກລະດົມຂະບວນການແຂ່ງຂັນຮັກຊາດປີ 2015 ຢູ່ຮາກຖານ.
ທ່ານເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ລາວ ຫງວຽນແມ້ງຮູ່ງ
ວັນທີ 3/2, ທ່ານເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ລາວ ຫງວຽນແມ້ງຮູ່ງ, ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງຂອງ ລາວ ມາອວຍພອນເນື່ອງໃນໂອກາດສະເຫຼີມສະຫຼອງ 85 ປີແຫ່ງວັນສ້າງຕັ້ງພັກກອມມູນິດ ຫວຽດນາມ (3/2/1930 – 3/2/2015). ບັນດາການນຳ ລາວ ເນັ້ນໜັກວ່າ: ໃນຕະຫຼອດ 85 ປີຜ່ານມາ, ພັກກອມມູນິດ ຫວຽດນາມ, ໂດຍປະທານ ໂຮ່ຈີມິນ ຜູ້ຍິ່ງໃຫຍ່ເປັນຜູ້ກໍ່ຕັ້ງ ແລະ ຝຶກຝົນຫຼໍ່ຫຼອມ ໄດ້ນຳພາປະຊາຊົນ ຫວຽດນາມ ອ້າຍນ້ອງດຳເນີນພາລະກິດຕໍ່ສູ້ຢ່າງພິລະອາດຫານ, ປົດປ່ອຍຊາດ, ນຳປະເທດຊາດຫລຸດພົ້ນອອກຈາກແອກປົກຄອງຂອງພວກລ່າເມືອງຂຶ້ນ ແລະ ຈັກກະພັດ, ໂຮມປະເທດຊາດເປັນເອກະພາບ. ການນຳລາວ ເຊື່ອໝັ້ນວ່າ: ພາຍໃຕ້ການຊີ້ນຳ, ນຳພາທີ່ສະຫຼາດສະຫຼຽວຂອງພັກກອມມູນິດ ຫວຽດນາມ, ປະຊາຊົນ ຫວຽດນາມ ອ້າຍນ້ອງສືບຕໍ່ຍາດໄດ້ຜົນງານໃໝ່, ໃຫຍ່ຫຼວງຫຼາຍຢ່າງກ່ວາອີກ, ພ້ອມທັງຢັ້ງຢືນວ່າ: ໃນຕະຫຼອດໄລຍະຜ່ານມາ, ການພົວພັນທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ ລາວ - ຫວຽດນາມ ຍັງຄົງສືບຕໍ່ໄດ້ຮັບການປັບປຸງ, ເພີ່ມທະວີ ແລະ ນັບມື້ນັບກ້າວເຂົ້າສູ່ລວງເລິກ. ເນື່ອງໃນໂອກາດປີໃໝ່ 2015, ບັນດາການນຳ ລາວ ໄດ້ອວຍພອນໃຫ້ພັກກອມມູນິດ ຫວຽດນາມ ຍື່ນຍົງຄົງຕົວຕະຫຼອດໄປ, ປະຊາຊົນ ຫວຽດນາມ ມີປີໃຫມ່ວັດທະນະຖາວອນ, ພ້ອມທັງອວຍພອນໃຫ້ການພົວພັນສາມັກຄີແບບພິເສດລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດຈະສວຍສົດງົດງາມ, ໝັ້ນຄົງຂະໜົງແກ່ນໄປຊົ່ວກະລະນານ.
ເນື່ອງໃນໂອກາດນີ້, ສະຖານທູດ ຫວຽດນາມ ປະຈຳ ຍີ່ປຸ່ນ ໄດ້ຈັດຕັ້ງພິທີສະເຫຼີມສະຫຼອງ 85 ປີແຫ່ງວັນສ້າງຕັ້ງພັກກອມມູນິດ ຫວຽດນາມ, ປຸກລະດົມຂະບວນການແຂ່ງຂັນສ້າງຜົນງານຂ່ຳນັບຮັບຕ້ອນກອງປະຊຸມໃຫຍ່ພັກທຸກຂັ້ນ, ມຸ່ງໄປເຖິງກອງປະຊຸມໃຫຍ່ທົ່ວປະເທດຄັ້ງທີ 12 ຂອງພັກກອມມູນິດ ຫວຽດນາມ.
ໃນໂອກາດນີ້, ການນຳຫຼາຍປະເທດໄດ້ສົ່ງໂທລະເລກອວຍພອນ 85 ປີ ແຫ່ງວັນສ້າງຕັ້ງພັກກອມມູນິດຫວຽດນາມ
ຄະນະບໍລິຫານງານສູນກາງພັກກອມມູນິດຈີນ ໄດ້ຝາກ ໂທລະເລກອວຍພອນ 85 ປີແຫ່ງວັນສ້າງຕັ້ງພັກກອມມູນິດຫວຽດນາມ. ເນື້ອໃນໂທລະເລກມີຕອນວ່າ: ພວກຂ້າພະເຈົ້າດີໃຈເມື່ອເຫັນວ່າ, 85 ປີຜ່ານມາ, ພັກກອມມູນິດຫວຽດນາມໄດ້ສາມັກຄີນຳພາປະຊາຊົນຫວຽດນາມໃຫ້ບັນລຸຜົນງານຫຼາຍຢ່າງໃນພາລະກິດກໍ່ສ້າງສັງຄົມນິຍົມ ແລະ ປ່ຽນໃໝ່. ພວກຂ້າພະເຈົ້າເຊື່ອໝັ້ນຢ່າງແນ່ວແນ່ວ່າ, ພາຍໃຕ້ການຊີ້ນຳ, ນຳພາຂອງຄະນະບໍລິຫານງານສູນກາງ ພັກກອມມູນິດຫວຽດນາມ, ພາລະກິດປ່ຽນໃໝ່ຂອງຫວຽດນາມຈະບັນລຸໄດ້ບັນດາຄາດໝາຍທີ່ໄດ້ວາງອອກຢ່າງແນ່ນອນ.
ຄະນະບໍລິຫານງານສູນກາງພັກກອມມູນິດກູບາ ກໍ່ມີໂທລະເລກອວຍພອນພັກກອມມູນິດຫວຽດນາມ. ໂທລະເລກຊີ້ແຈ້ງວ່າ: ໃນໂອກາດສະເຫຼີມສະຫຼອງ 85 ປີແຫ່ງວັນສ້າງຕັ້ງພັກກອມມູນິດຫວຽດນາມ, ໃນນາມພັກກອມມູນິດ ແລະ ປະຊາຊົນກູບາ, ພວກຂ້າພະເຈົ້າຂໍສົ່ງຄຳອວຍພອນຢ່າງອົບອຸ່ນທີ່ສຸດມາຍັງບັນດາການນຳ, ສະມາຊິກພັກ ແລະ ປະຊາຊົນຫວຽດນາມ. ພວກເຮົາຈະສືບຕໍ່ປັບປຸງລັດທິສັງຄົມນິຍົມ, ກໍ່ສ້າງພັກ ແລະ ສາຍພົວພັນອ້າຍນ້ອງລະຫວ່າງສອງພັກ, ລັດຖະບານ ແລະ ປະຊາຊົນສອງປະເທດກູບາ - ຫວຽດນາມ.
ໃນໂທລະເລກອວຍພອນຂອງພັກແຮງງານ ສປປ ເກົາຫຼີ ມີຕອນຂຽນວ່າ: ພວກຂ້າພະເຈົ້າຮູ້ສຶກພາກພູມໃຈທີ່ສຸດເມື່ອເຫັນວ່າ, ພາຍໃຕ້ການນຳພາຂອງພັກກອມມູນິດຫວຽດນາມ, ປະຊາຊົນຫວຽດນາມ ຍາດໄດ້ບັນດາຜົນງານອັນໃຫຍ່ຫຼວງໃນພາລະກິດຕໍ່ສູ້ ເພື່ອກໍ່ສ້າງປະເທດຫວຽດນາມສັງຄົມນິຍົມ. ພວກຂ້າພະເຈົ້າເຊື່ອໝັ້ນຢ່າງແນ່ວແນ່ວ່າ, ສາຍພົວພັນມິດຕະພາບ ແລະ ການຮ່ວມມືລະຫວ່າງສອງພັກ, ແລະ ປະຊາຊົນສອງປະເທດ, ໂດຍການນຳຜູ້ອາວຸໂສຂອງສອງປະເທດສ້າງຕັ້ງ ແລະ ເພີ່ມພູນຄູນສ້າງນັ້ນ, ຈະນັບມື້ນັບເພີ່ມທະວີ ແລະ ພັດທະນາກວ່າອີກ, ເພື່ອໄຊຊະນະຂອງພາລະກິດສັງຄົມນິຍົມ.
ໃນນາມພັກປະເທດລັດເຊຍ, ທ່ານນາຍົກລັດຖະມົນຕີລັດເຊຍ Dmitry Medvedev ເນັ້ນໜັກວ່າ, ພັກກອມມູນິດຫວຽດນາມແມ່ນກຳລັງນຳພາຂອງສັງຄົມຢ່າງສະເໝີຕົ້ນສະເໝີປາຍ, ຕັ້ງໜ້າດຳເນີນນະໂຍບາຍຫັນເປັນທັນສະໄໝ ແລະ ເຊື່ອມໂຍງເຂົ້າພື້ນຖານເສດຖະກິດໂລກ. ທ່ານສະແດງຄວາມເຊື່ອໝັ້ນວ່າ, ເລື່ອງເຮັດໃຫ້ການປະສານສົມທົບກັນດຳເນີນງານລະຫວ່າງພັກການເມືອງລັດເຊຍ ແລະ ພັກກອມມູນິດຫວຽດນາມເລິກເຊິ່ງກວ່າອີກ ຈະສືບຕໍ່ຊຸກຍູ້ເລື່ອງປັບປຸງສາຍພົວພັນຄູ່ຮ່ວມມືຍຸດທະສາດຮອບດ້ານລັດເຊຍ - ຫວຽດນາມ