(vovworld) -ຕອນບ່າຍວັນທີ 13/12, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ຄະນະຊາວໜຸ່ມກອມມູນິດ ໂຮ່ຈີມິນ ໄດ້ປະກາດຜົນຂອງການເລືອກຕັ້ງຄະນະບໍລິຫານງານສູນກາງຊາວໜຸ່ມຄັ້ງທີ 10 ແລະ ລົງມະຕິຮັບຮອງເອົາບັນດາຄາດໝາຍພື້ນຖານຂອງວຽກງານຊາວໜຸ່ມ ແລະ ຂະບວນການຊາວໜຸ່ມອາຍຸການ 2012 - 2017. ກອງປະຊຸມໃຫຍ່ໄດ້ເລືອກຕັ້ງຜູ້ແທນ 151 ຄົນເຂົ້າໃນຄະນະບໍລິຫານງານສູນກາງຊາວໜຸ່ມຄັ້ງທີ 10. ຕອນຄຳ່ຂອງວັນດຽວກັນ ໄດ້ດຳເນີນກອງປະຊຸມຄັ້ງທຳອິດຂອງຄະນະບໍລິຫານງານສູນກາງຊາວໜຸ່ມຊຸດທີ 10 ແລະ ເລືອກຕັ້ງຄະນະປະຈຳ, ເລຂາທີໜຶ່ງ ແລະ ຄະນະເລຂາສູນກາງຊາວໜຸ່ມ.
ມີຜູ້ແທນເຊິ່ງແມ່ນບັນດາພະນັກງານ, ສະມາຊິກຊາວໜຸ່ມດີເດັ່ນກວ່າ 1000 ຄົນ ທີ່ຕາງໜ້າໃຫ້ສະມາຊິກຊາວໜຸ່ມ 7 ລ້ານຄົນທີ່ມາຈາກທຸກແຖບຖິ່ນຂອງປະເທດ ແລະ ພວມຮໍ່າຮຽນ, ປະຕິບັດງານຢູ່ຕ່າງປະເທດ ໄດ້ເຂົາຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ຂອງຄະນະຊາວຫນຸ່ມກອມມູນິດໂຮ່ຈິມິນ ທີ່ດຳເນີນໄປໃນລະຫວ່າງວັນທີ 12 – 14/12, ຢູ່ທີ່ຮ່າໂນ້ຍ. ໃນການໂອລົມກັບບັນນາທິການວິທະຍຸກະຈາຍສຽງຫວຽດນາມ ຢູ່ນອກກອງປະຊຸມໃຫຍ່, ຮ້ອຍໂທ ເລຫງອກຈູງ (Le Ngoc Chung), ນັກການເມືອງຮ້ານຍາມ DK1/20, ກອງພັນ DK1, ກອງບັນຊາການກອງທັບເຮືອເຂດ 2 ໄດ້ສະແດງຄວາມມ່ວນຊື່ນເມື່ອໄດ້ກັບຄືນເຂດດິນຕໍ່ແຜ່ນ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ. ອ້າຍ ເລຫງອກຈູງ ເວົ້າຄວາມໃນໃຈວ່າ.
“ມີ 2 ເລື່ອງທີ່ຂ້າພະເຈົ້າຢາກຝາກຝັງເຖິງໄວໜຸ່ມທົ່ວປະເທດນັ້ນແມ່ນ; ພວກເພື່ອນຈົ່ງເຊື່ອໝັ້ນຕໍ່ໄວໜຸ່ມກອງທັບເຮືອ, ໄວໜຸ່ມຂອງຮ້ານຍາມ ແລະ ໄວໜຸ່ມຂອງເຈືອງຊາ. ຢູ່ທີນັ້ນ, ຍາມໃດເພື່ອນຮ່ວມກົມກອງຂອງຂ້າພະເຂົ້າກໍກ່ຽມພ້ອມຮັບມື ແລະ ຜ່ານຜ່າຄວາມຫຍຸ້ງຍາກ, ທົດສອບທຸກຢ່າງ ເພື່ອປົກປັກຮັກສາອະທິປະໄຕເຂດທະເລໝູ່ເກາະທີ່ສັກກະລະບູຊາຂອງປະເທດຊາດ, ດ້ວຍຄຳໝັ້ນສັນຍາຂອງບັນດາຜູ້ເຮັດໜ້າທີ່ຮັກສາທະເລວ່າ ຍັງມີຊີວິດ ແມ່ນຈະຮັກສາທະເລຂອງປະເທດໄດ້”.
ກັບເມື່ອເຂົ້າຮ່ວມປະຊຸມໃຫຍ່ຜູ້ແທນທົ່ວປະເທດຄັ້ງນີ້, ອ້າຍ ດັ້ງເຕີດຢຸງ (Dang Tat Dung), ປະທານສະມາຄົມນັກສຶກສາຫວຽດນາມ ຢູ່ Leeds, ແຫ່ງລາຊະອານາຈັກອັງກິດ, ປາດຖະໜາວ່າ ຢາກປະກອບຂໍ້ລິເລີ່ມໃຫ້ແກ່ວຽກງານສາມັກຄີ, ເຕົ້າໂຮມຊາວໜຸ່ມ, ນັກສຶກສາຫວຽດນາມ ຢູ່ຕ່າງປະເທດ.
“ກ່ອນທີ່ກັບເມື່ອຫວຽດນາມ, ຂ້າພະເຈົ້າໄດ້ຝາກບົດປະກອບຄຳເຫັນໃຫ້ສູນກາງຊາວໜຸ່ມ, ໃນນັ້ນຊີ້ແຈ້ງບາງຂໍ້ສະເໜີເພື່ອໃຫ້ນັກສຶກສາ, ຊາວໜຸ່ມຕ່າງປະເທດພ້ອມກັນເຂົ້າຮ່ວມ. ຄຽງຂ້າງນັ້ນ, ຕ້ອງມີຂໍ້ມູນຂ່າວທີ່ມີຫຼາຍຮູບຫຼາຍແບບ, ເໝາະສົມກັບສະພາບແວດລ້ອມຂອງຊາວໜຸ່ມຕ່າງປະເທດກວ່າອີກ.”
ຕາມອ້າຍ ດັ້ງເຕີດຢຸງ ແລ້ວ, ເລື່ອງແບ່ງປັນຂໍ້ມູນຂ່າວ ບໍ່ພຽງແຕ່ຊ່ວຍໃຫ້ຊາວໜຸ່ມ, ນັກສຶກສາຫວຽດນາມ ຢູ່ຕ່າງປະເທດມີຄວາມສະໜິດຕິດພັນກັບບ້ານເກີດເມືອງນອນກວ່າເທົ່ານັ້ນ ຫາກຍັງສ້າງເງື່ອນໄຂສະດວກເພື່ອໃຫ້ເຂົ້າເຂົ້າສະແດງໃຫ້ເຫັນຄວາມຕ້ອງການ, ຄວາມມຸ້ງຫວັງທີ່ສົມເຫດສົມຜົນຂອງຕົນອີກດ້ວຍ, ເພື່ອປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດຢ່າງຕັ້ງໜ້າ.