ຄະນະຜູ້ແທນສະຖາ ບັນກູບາມິດຕະພາບ ກັບບັນດາປະຊາຊາດ ຢ້ຽມຢາມຫວຽດນາມ
(vovworld) – ຄະນະປະທານສະຖາບັນ ກູບາ ມິດຕະພາບກັບບັນດາປະຊາຊາດ (ICAP) ໂດຍທ່ານນາງ Kenia Serranno Puig, ປະທານສະຖາບັນ ICAP ເປັນຫົວໜ້າຄະນະ, ພວມຢ້ຽມຢາມ ແລະ ເຮັດວຽກຢູ່ ຫວຽດນາມ ແຕ່ວັນທີ 7/4 – 12/4/2014.
ປະທານຄະນະກຳມະການແນວໂຮມປະເທດຊາດຫວຽດນາມ ຕ້ອນຮັບປະທານສະຖາບັນກູບາມິດຕະພາບກັບບັນດາປະຊາຊາດ
(ພາບ: VGP/Từ Lương))
ຕອນເຊົ້າວັນທີ 8/4, ທ່ານຫງວຽນທ້ຽນເຍິນ, ກຳມະການກົມການເມືອງ ປະທານຄະນະກຳມະການແນວໂຮມປະເທດຊາດຫວຽດນາມ ໄດ້ໃຫ້ການຕ້ອນຮັບທ່ານນາງ Kenia Serranno Puig ປະທານສະຖາບັນ ກູບາມິດຕະພາບກັບບັນດາປະຊາຊາດພວມຢູ່ຢ້ຽມຢາມຫວຽດນາມ ແຕ່ວັນທີ 7-12/4.
ນະການຕ້ອນຮັບ, ທ່ານປະທານ ຫງວຽນທ້ຽນເຍິນ ໄດ້ຂອບອົກຂອບໃຈພັກ, ລັດຖະບານ ແລະ ປຊຊ ກູບາ ໄດ້ສະໜັບສະໜູນ, ສາມັກຄີ ແລະ ສະຫງວນອາລົມຈິດຄວາມຮັກແພງອັນເລິກເຊິ່ງໃຫ້ແກ່ຫວຽດນາມ. ທ່ານປະທານ ຫງວຽນທ້ຽນເຍິນ ຢືນຢັນວ່າ, ກູບາ ພວມກ້າວເຂົ້າສູ່ໄລຍະພັດທະນາໃໝ່ດ້ວຍເລື່ອງຮັບຮອງເອົາກົດໝາຍວ່າດ້ວຍການລົງທຶນຕ່າງປະເທດ. ບັນດາການຫັນປ່ຽນນີ້ຈະປະກອບສ່ວນ, ສ້າງເງື່ອນໄຂສະດວກເພື່ອຊຸກຍູ້ນ້ຳໃຈສາມັກຄີມິດຕະພາບອັນເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດ. ຄຽງຄູ່ກັບການຮ່ວມມືດ້ານການເມືອງ, ສອງຝ່າຍເອົາໃຈໃສ່ເຖິງການຮ່ວມມື, ເປີດກາລະໂອກາດຮ່ວມມືໃນບັນດາຂົງເຂດກະສິກຳ, ໂທລະຄົມ, ແລກປ່ຽນບົດຮຽນປ່ຽນໃໝ່ການລົງທຶນຕ່າງປະເທດ, ເຂດອຸດສາຫະກຳ, ສ້າງເງື່ອນໄຂໃຫ້ວິສາຫະກິດຫວຽດນາມ ເຂົ້າຮ່ວມການລົງທຶນ.
ກ່ອນໜ້ານັ້ນ, ວັນທີ 7/4, ທີ່ການພົບປະກັບຜູ້ຕ່າງໜ້າສະຫະສະມາຄົມບັນດາອົງການມິດຕະພາບ ຫວຽດນາມ, ສະມາຄົມມິດຕະພາບ ຫວຽດນາມ - ກູບາ, ທ່ານປະທານສະຖາບັນ ICAP Kenia Serranno Puig ສະແດງຄວາມຂອບອົກຂອບໃຈຕໍ່ ຫວຽດນາມ ທີ່ໄດ້ສະຫງວນຄວາມສາມັກຄີ, ມິດຕະພາບທີ່ດີງາມໃຫ້ແກ່ ກູບາ ໃນຕະຫຼອດໄລຍະຜ່ານມາ; ພິເສດແມ່ນການແບ່ງປັນຄວາມເສົ້າສະຫຼົດໃຈຂອງພັກ, ລັດ, ປະຊາຊົນ ຫວຽດນາມ ຕໍ່ການເຖິງແກ່ມໍລະນະກຳຂອງ ທ່ານນາງວິລະຊົນ Melba Hernandez del Rey, ນັກຮົບຜູ້ຈົງຮັກພັກດີ ແລະ ອົງອາດກ້າຫານຂອງການປະຕິວັດ ກູບາ ໃນເດືອນ 3 ຜ່ານມາ. ທ່ານ Kenia Serranno Puig ໃຫ້ຮູ້ວ່າການຢ້ຽມຢາມຄັງນີ້ແມ່ນແນໃສ່ແບ່ງປັນຂໍ້ມູນຂ່າວສານກ່ຽວກັບສະພາບຂະບວນການສາມັກຄີໃນໂລກ; ແລກປ່ຽນກັບສະຫະສະມາຄົມ ແລະ ບັນດາອົງການທີ່ກ່ຽວຂ້ອງ ຫວຽດນາມ ກ່ຽວກັບສະພາບການປະຕິບັດແນວທາງການປັບປຸງຮູບແບບເສດຖະກິດ - ສັງຄົມຢູ່ ກູບາ, ກົດໝາຍວ່າດ້ວຍການລົງທຶນຕ່າງປະເທດ; ແລກປ່ຽນກ່ຽວກັບການຈັດຕັ້ງກອງປະຊຸມຄັ້ງທີ 7 ພາກພື້ນ ອາຊີ - ປາຊີຟິກ ສາມັກຄີກັບ ກູບາ ຢູ່ ຫວຽດນາມ ເມື່ອປີ 2015.