ທ່ານນາຍົກລັດຖະມົນຕີຫງວຽນເຕີນຢູງຕ້ອນຮັບສະມາຄົມນັກທຸລະກິດໄຕ້ຫວັນປະເທດຈີນຢູ່ຫວຽດນາມ
ທ່ານນາຍົກລັດຖະມົນຕີ ຫງວຽນເຕີນຢູງ ຕ້ອນຮັບສະມາຄົມນັກທຸລະກິດ ໄຕ້ຫວັນ
ພາບ:vtv4.vn
|
(vovworld)- ຕອນເຊົ້າວັນທີ 5/6 ຢູ່ ຮ່າໂນ້ຍ, ຢູ່ນອກເວທີປາໄສວິສາຫະກິດຫວຽດນາມ ກາງສະໄຫມ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ຕ້ອນຮັບສະມາຄົມນັກທຸລະກິດ ໄຕ້ຫວັນ ປະເທດຈີນ ຢູ່ ຫວຽດນາມ ໂດຍ ທ່ານຫລຽວໄຕເຕືອ, ປະທານສະມາຄົມນຳຫນ້າ.
ທີ່ການຕ້ອນຮັບ, ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ:ລັດຖະບານ ຫວຽດນາມ ສືບຕໍ່ປັບປຸງສະພາບແວດລ້ອມແຫ່ງການລົງທຶນ, ສ້າງເງື່ອນໄຂສະດວກໃຫ້ແກ່ບັນດາວິສາຫະກິດຕ່າງປະເທດມາລົງທຶນຢູ່ຫວຽດນາມ, ໃນນັ້ນ ມີບັນດາວິສາຫະກິດຂອງໄຕ້ຫວັນ. ເມື່ອເຕື້ອງເຖິງເຫດການທີ່ເກີດຂຶ້ນສຳລັບວິສາຫະກິດຕ່າງປະເທດຈຳນວນຫນຶ່ງໃນໄລຍະຜ່ານມາ, ໃນນັ້ນ ມີວິສາຫະກິດໄຕ້ຫວັນ, ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ: ເລື່ອງຈີນ ຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ເຂດໄຫລ່ທະວີບ ຂອງຫວຽດນາມ ໄດ້ກໍ່ໃຫ້ເກີດການແຫ່ຂະບວນປະທ້ວງຢູ່ບາງ ທອ້ງຖິ່ນ, ມີສ່ວນບຸກຄົນຈຳນວນຫນຶ່ງຖືກປຸກປັນຍຸແຍ່, ລະເມີດກົດໝາຍ, ມ້າງທຳລາຍຊັບສິນຂອງວິສາຫະກິດຈຳນວນຫນຶ່ງ, ໃນນັ້ນ ມີວິສາຫະກິດໄຕ້ຫວັນ. ພາຍຫລັງເຫດການດັ່ງກ່າວເກີດຂຶ້ນ, ຫວຽດນາມ ໄດ້ຊີ້ນຳແກ້ໄຂເຫດການນີ້ຢ່າງທັນການ, ສ້າງຕັ້ງກຸ່ມປະຕິບັດງານລົງເຮັດວຽກກັບແຕ່ລະວິສາຫະກິດ, ພ້ອມກັນແບ່ງເບົາ, ຫນູນຊ່ວຍວິສາຫະກິດທີ່ຖືກເສຍຫາຍ ກັບຄືນສູ່ເຄື່ອນໄຫວເປັນປົກກະຕິໂດຍໄວ. ຕາງຫນ້າສະມາຄົມນັກທຸລະກິດ ໄຕ້ຫວັນ ຢູ່ຫວຽດນາມ ຕີລາຄາສູງເລື່ອງ ນາຍົກລັດຖະມົນຕີ ຫວຽດນາມ ຫງວຽນເຕີນຢູງ ໄດ້ຊີ້ນຳບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆຢ່າງທັນການ ເພື່ອຮັກສາຄວາມເປັນລະບຽບຮຽບຮ້ອຍ, ຄວາມປອດໄພ, ສ້າງເງື່ອນໄຂສະດວກທີ່ສຸດໃຫ້ແກ່ບັນດາວິສາຫະກິດໄຕ້ຫວັນ ກັບຄືນສູ່ການຜະລິດດຳເນີນທຸລະກິດເປັນປົກກະຕິ.