ທ່ານຫງວຽນຈິວິ້ງ ພົບປະກັບບັນດາການນຳ ກະຊວງປ້ອງກັນປະເທດ ເຂົ້າຮ່ວມກອງປະຊຸມ Shangri-La 12
ທ່ານຫງວຽນຈິວິ້ງ ພົບປະກັບການນຳກະຊວງປ້ອງກັນປະເທດລັດເຊຍ
(ພາບ: TTXVN )
(vovworld)- ຢູ່ນອກກອງປະຊຸມປ້ອງກັນຄວາມສະຫງົບອາຊີ (ກອງປະຊຸມ Shangri-La) ຄັ້ງທີ 12 ຢູ່ສິງກະໂປ, ທ່ານພົນໂທຫງວຽນຈິວີ້ງ, ຮອງລັດຖະມົນຕີກະຊວງປ້ອງກັນປະເທດຫວຽດນາມ, ຫົວໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ ໄດ້ມີການພົບປະສອງຝ່າຍກັບການນຳກະຊວງປ້ອງກັນປະເທດມາເລເຊຍ, ນິວຊີແລນ, ອົດສະຕາລີ, ສິງກະໂປ, ບຣູໄນ, ລັດເຊຍ, ສເກົາຫຼີ, ອາເມລິກາ, ແລະ ຈີນ. ໃນການພົບປະສອງຝ່າຍຄັ້ງຕ່າງໆ, ຝ່າຍຕ່າງໆໄດ້ທົບທວນຄືນການພົວພັນດ້ານການທະຫານສອງຝ່າຍ ແລະ ແລກປ່ຽນທັດສະນະກ່ຽວກັບສະພາບຄວາມສະຫງົບປອດໄພຂອງພາກພື້ນ ແລະ ປຶກສາຫາລືບັນດາມາດຕະການເພື່ອແນໃສ່ເພີ່ມທະວີການພົວພັນດ້ານການປ້ອງກັນຊາດສອງຝ່າຍກ່ວາອີກ ບົນພື້ນຖານການພົວພັນມິດຕະພາບທີ່ເປັນມູນເຊື້ອ; ຊຸກຍູ້ບັນດາການພົວພັນຮ່ວມມື, ພັດທະນາບົນພື້ນຖານເຄົາລົບຊື່ງກັນ ແລະ ກັນ, ປາດຖະໜາວ່າຈະມີສຽງເວົ້າລວມກ່ຽວກັບບັນດາບັນຫາໃຫ່ຍໃນຂົງເຂດປ້ອງກັນຊາດຂອງພາກພື້ນ, ໂລກ ຊື່ງຕ່າງມີຄວາມສົນໃຈຄື: ສັນຕິພາບ, ສົງຄາມ, ຄວາມໝັ້ນຄົງການເດີນທະເລ, ຕ້ານການກໍ່ການຮ້າຍ… ທ່ານຮອງລັດຖະມົນຕີກະຊວງປ້ອງກັນປະເທດຫວຽດນາມ ຫງວຽນຈິວີ້ງ ຢືນຢັນວ່າ ຫວຽດນາມ ປາດຖະໜາຢາກສືບຕໍ່ສ້າງ ແລະ ປັບປຸງການພົວພັນມິດຕະພາບ, ການຮ່ວມມືກັບປະເທດຕ່າງໆ, ໃນນັ້ນມີການພົວພັນດ້ານການປ້ອງກັນຊາດ.
ວັນທີ 2/6, ພົນໂທຫງວຽນຈິວີ້ງ, ຮອງລັດຖະມົນຕີກະຊວງປ້ອງກັນປະເທດຫວຽດນາມ, ຫົວໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ Shangri-La 12 ພວມດຳເນີນໄປຢູ່ສິງກະໂປ ໄດ້ມີບົດປາໄສທີ່ວາລະປະຊຸມຄົບຄະນະ, ໃນນັ້ນ ໄດ້ເນັ້ນຫນັກເຖິງຄວາມຈຳເປັນຂອງເລື່ອງຊຸກຍູ້ການຮ່ວມມືປ້ອງກັນຊາດ, ສ້າງກຳລັງແຮງສັງລວມເພື່ອຮັບມືກັບສິ່ງທ້າທາຍລວມ ແລະ ຖືວ່າ ນີ້ແມ່ນຫນຶ່ງໃນບັນດາມາດຕະການສຳຄັນເພື່ອຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ. ທ່ານ ຫງວຽນຈີວີ້ງ ເນັ້ນຫນັກວ່າ: ຫວຽດນາມ ມີຄວາມວິຕົກກັງວົນຕໍ່ສິ່ງທ້າທາຍທີ່ພວມຜັນແປໄປນັບມື້ນັບສັບສົນໃນພາກພື້ນ. ຕໍ່ຫນ້າສິ່ງທ້າທາຍລວມນັ້ນ ຕ້ອງມີຄວາມຮັບຮູ້ຢ່າງຄົບຖ້ວນ ແລະ ມີການກະທຳເປັນເອກະພາບຂອງທຸກປະເທດ. ຍາມໃດຫວຽດນາມ ກໍພ້ອມແລ້ວຮ່ວມມືກັບທຸກຝ່າຍກ່ຽວຂ້ອງເພື່ອຊອກຫາມາດຕະການພື້ນຖານ ແລະ ຍາວນານໃຫ້ແກ່ບັນຫາທະເລຕາເວັນອອກບົນພື້ນຖານກົດໝາຍສາກົນ. ຫວຽດນາມ ມີຄວາມເຊື່ອໝັ້ນວ່າ ບັນດາປະເທດຈະມີບາດກ້າວຊຸກຍູ້ການຮ່ວມມືປ້ອງກັນຊາດຢ່າງແທດຈິງກວ່າ ບົນຈິດໃຈເຂົ້າອົກເຂົ້າໃຈເຊິ່ງກັນ ແລະກັນ, ສະເໝີພາບ, ຊ່ວຍເຫລືອ ແລະ ເຄົາລົບເຊິ່ງກັນ ແລະ ກັນ. ນັ້ນແມ່ນວິທີດີສຸດເພື່ອຮັກສາສັນຕິພາບ, ສະຖຽນລະພາບ, ການພັດທະນາຢູ່ພາກພື້ນ ອາຊີ ປາຊີຟິກ.
* ກ່ຽວຂ້ອງເຖິງບົດປາໄສຂອງທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ທີ່ພິທີໄຂກອງປະຊຸມ Shangri La 12.
ບັນດາສຳນັກຂ່າວສານລືຊື່ລ້ວນແຕ່ຄັດສະເຫນີ ແລະ ລົງພິມບົດປາໄສຂອງທ່ານນາຍົກລັດຖະມົນຕີຫງວຽນເຕີນຢູງກອງປະຊຸມ Shangri La 12 .ບັນດາສຳນັກຂ່າວສານສ່ວນຫລາຍແມ່ນສົນໃຈເຖິງຄຳຮຽກຮ້ອງສ້າງຄວາມໄວ້ເນື້ອເຊື່ອໃຈຂອງນາຍົກລັດຖະມົນຕີຫງວຽນເຕີນຢູງກໍຄືນະໂຍບາຍປ້ອງກັນຊາດຂອງຫວຽດນາມ.
ສຳນັກຂ່າວສານ NHK ຂອງຍີ່ປຸນ ສົນໃຈເຖິງຄຳຮຽກຮ້ອງຂອງທ່ານນາຍົກລັດຖະມົນຕີ ຫງວຽນເຕີນຢູງທີ່ວ່າ: ອາຊຽນ ແລະ ຈີນ ຕ້ອງສ້າງຄວາມໄວ້ເນື້ອເຊື່ອໃຈໃນເທື່ອລະກ້າວ. ສ່ວນ BBC ໃຫ້ຮູ້ວ່າ: ນາຍົກລັດຖະມົນຕີຫວຽດນາມ ຮຽກຮ້ອງສ້າງຄວາມໄວ້ເນື້ອເຊື່ອໃຈຍຸດທະສາດຢູ່ ອາຊີ ປາຊີຟີກ ເພື່ອຫລຸດຜ່ອນຄວາມເຄັ່ງຕຶງຢູ່ພາກພື້ນ. ຄວາມສາມັກຄີພາຍໃນກຸ່ມ ອາຊຽນ ແລະ ສ້າງຄວາມໄວ້ເນື້ອເຊື່ອໃຈແມ່ນ 2 ບັນຫາຈຸດສຸມຊ່ືງສຳນັກຂ່າວສານ Reuters ໄດ້ໃຫ້ຂ່າວກ່ຽວກັບບົດປາໄສຂອງທ່ານນາຍົກລັດຖະມົນຕີຫງວຽນເຕີນຢູງ. ຫນັງສືພິມ Channel New Asia, Strait Times ຂອງສິງກະໂປ ແລະ ສຳນັກຂ່າວສານ AFP ແລະ BBC ກໍສົນໃຈເຖິງຄຳປະກາດຂອງທ່ານນາຍົກລັດຖະມົນຕີ ຫງວຽນເຕີນຢູງກ່ຽວກັບເລື່ອງ ຫວຽດນາມ ຈະເຂົ້າຮ່ວມການຮັກສາສັນຕິພາບຂອງ ສປຊ.