(vovworld) - ຕອນເຊົ້າວັນທີ 27/01, ຢູ່ສຳນັກງານປະທານປະເທດ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ມີການພົບປະ, ອວຍພອນປີໃໝ່ບັນດານັກປະຕິວັດອາວຸໂສ, ບັນດາການນຳ, ອະດີດການນຳພັກ, ລັດ, ແນວໂຮມປະເທດຊາດຫວຽດນາມ, ພະນັກງານບັນດາອົງການຂັ້ນສູນກາງ ແລະ ນະຄອນຮ່າໂນ້ຍ.
ກ່າວຄຳເຫັນທີ່ພິທີພົບປະ, ທ່ານເລຂາທິການໃຫຍ່ ຫງວຽນຟຸຈ້ອງ ເນັ້ນໜັກເຖິງບັນດາຜົນງານເຊິ່ງຫວຽດນາມ ບັນລຸໄດ້ໃນປີ 2013 ເຊິ່ງແມ່ນໝາກຜົນຂອງຄວາມມານະພະຍາຍາມອັນໃຫຍ່ຫຼວງຂອງປະຊາຊົນທົ່ວປະເທດ, ປະຊາຄົມຊາວຫວຽດນາມ ອາໄສຢູ່ຕ່າງປະເທດ ໂດຍພາຍໃຕ້ການຊີ້ນຳນຳພາອັນຖືກຫຕ້ອງຂອງພັກ, ການບໍລິຫານຂອງລັດຢ່າງຕັ້ງໜ້າ. ທ່ານເລຂາທິການໃຫຍ່ ຫງວຽນຟຸຈ້ອງ ຊີ້ແຈ້ງວ່າ.
“ປີ 2014, ທົ່ວພັກ, ທົ່ວປວງຊົນ, ທົ່ວກອງທັບ ຕ້ອງສືບຕໍ່ສູ້ຊົນປະຕິບັດຄາດໝາຍ ຮັບປະກັນເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້; ຟື້ນຟູການເຕີບໂຕ ແລະ ຍົກສູງຄວາມສາມາດແກງແຍ່ງຂອງພື້ນຖານເສດຖະກິດ; ຮັບປະກັນຊີວິດສັງຄົມ, ສະວັດດີການສັງຄົມ ແລະ ປົວແປງຊີວິດການເປັນຢູ່ໃຫ້ແກ່ປະຊາຊົນ. ພ້ອມກັນນັ້ນ, ດ້ວຍຄວາມມານະພະຍາຍາມສ້າງການຫັນປ່ຽນຢ່າງແຮງ ໃນວຽກງານກໍ່ສ້າງພັກ, ລັດ, ແນວໂຮມປະເທດຊາດ ແລະ ບັນດາອົງການຈັດຕັ້ງມະຫາຊົນ; ສືບຕໍ່ປະຕິບັດມະຕິສູນກາງຄັ້ງທີ 4 ຊຸດທີ 11 ກ່ຽວກັບການກໍ່ສ້າງພັກ, ຕິດພັນກັບການຮໍ່າຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມິນເປັນຢ່າງດີ; ສ້າງການຫັນປ່ຽນໃນການປ້ອງກັນ, ຕ້ານການສໍ້ລາດບັງຫຼວງຢ່າງແຮງ; ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ, ປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກຢ່າງມີໄຊ; ພ້ອມທັງຮີບເຮັ່ງກະກຽມບັນດາວຽກງານດັ່ງກ່າວເພື່ອກ້າວໄປເຖິງກອງປະຊຸມໃຫຍ່ອົງຄະນະພັກທຸກຂັ້ນ ແລະ ກອງປະຊຸມໃຫຍ່ຄັ້ງທີ 12 ຂອງພັກ. ເພື່ອບັນລຸໄດ້ບັນດາຄາດໝາຍດັ່ງກ່າວ, ທົ່ວພັກ, ທົ່ວປວງຊົນ ແລະ ທົ່ວກອງທັບ ຕ້ອງເພີ່ມທະວີຄວາມສາມັກຄີ, ຮ່ວມແຮງຮ່ວມໃຈ, ເສີມຂະຫຍາຍນ້ຳໃຈຮັກຊາດ, ຄຸນນະທາດ ແລະ ສະຕິປັນຍາ ຫວຽດນາມ, ຕັດສິນໃຈສ້າງປະເທດໃຫ້ນັບມື້ນັບຈະເລີນຮຸ່ງເຮືອງ, ປະຊາຊົນມີຄວາມຜາສຸກ”.
ແລະກໍ່ໃນວັນດຽວກັນ, ທີ່ການອວຍພອນປີໃໝ່ບັນດາພະນັກງານ, ລັດຖະກອນຫ້ອງວ່າການສູນກາງພັກ, ທ່ານເລຂາທິການໃຫຍ່ ຫງວຽນຟຸຈ້ອງ ຮຽກຮ້ອງໃຫ້ຫ້ອງວ່າການສູນກາງ ຕ້ອງຍົກສູງຄຸນນະພາບວຽກງານເປັນເສນາທິການ, ຮັບໃຊ້ບັນດາອົງການຊີ້ນຳນຳພາຂອງພັກ, ເຊິ່ງຕົ້ນຕໍ່ແມ່ນກົມການເມືອງ, ຄະນະເລຂາສູນກາງພັກ, ຈັດຕັ້ງ, ປະຕິບັດ ແລະ ສຳເລັດບັນດາໂຄງການດຳເນີນງານໃນປີ 2014.