ຜູ້ແທນກ່າວຄຳເຫັນທີ່ການໂອ້ລົມສົນທະນາ
(ພາບ: Hoàng Hải/TTXVN)
|
(vovworld) – ພື້ນຖານເສດຖະກິດຫວຽດນາມ ພວມເຊື່ອມໂຍງຢ່າງເລິກເຊິ່ງ, ກວ້າງຂວາງກັບຫຼາຍປະເທດ ແລະ ເຂດແຄ້ວນໃນທົ່ວໂລກ. ໃນສະພາບການຄ້າປະຈຸບັນ, ຄຳຮຽກຮ້ອງຕ້ອງການທີ່ວາງອອກໃຫ້ບັນດາວິສາຫະກິດ, ນັກທຸລະກິດຫວຽດນາມ ແມ່ນມານະພະຍາຍາມພັດທະນາຢ່າງບໍ່ຢຸດຢັ້ງ ເພື່ອມີບັນດາຜະລິດຕະພັນທີ່ມີຄຸນນະພາບ, ຕອບສະໜອງຄວາມຮຽກຮ້ອງຕ້ອງການຂອງຕະຫຼາດສາກົນ. ຕໍ່ໜ້າຄວາມຮຽກຮ້ອງຕ້ອງການດັ່ງກ່າວ, ບັນດາວິສາຫະກິດພາຍໃນປະເທດຕ້ອງມີການກະກຽມຢ່າງລອບຄອບ, ເພື່ອທ່ວງທັນກັບບັນດາປະເທດໃນປະຊາຄົມເສດຖະກິດອາຊຽນ. ນັ້ນແມ່ນຂໍ້ມູນຂ່າວ, ເຊິ່ງບັນດາຜູ້ແທນໄດ້ເນັ້ນໜັກທີ່ການໂອ້ລົມສົນທະນາ “ນັກທຸລະກິດ ແລະ ສື່ມວນຊົນມຸ່ງໄປສູ່ປະຊາຄົມເສດຖະກິດອາຊຽນ “ ເຊິ່ງຈັດຂຶ້ນໃນຕອນເຊົ້າວັນທີ 28/1, ຢູ່ນະຄອນໂຮ່ຈີມິນ, ໂດຍຄະນະໂຄສະນາສຶກສາສູນກາງຢູ່ນະຄອນໂຮ່ຈີມິນ ສົມທົບກັບກົມວຽກງານພາກໃຕ້ຂອງກະຊວງຖະແຫຼງຂ່າວ ແລະ ສື່ສານ, ສະມາຄົມນັກຂ່າວຫວຽດນາມ ແລະ ສະໂມສອນນັກທຸລະກິດໄຊງ່ອນ ອາຊຽນສົມທົບກັນຈັດຕັ້ງ. ທ່ານນາງ ຟານທິຮົ່ງຊວນ, ປະທານສະມາຄົມມິດຕະພາບຫວຽດນາມ - ອາຊີຕາເວັນອອກສ່ຽງໃຕ້, ໃຫ້ຮູ້ວ່າ:
“ຢາກກໍ່ສ້າງປະຊາຄົມເສດຖະກິດອາຊຽນໃຫ້ສຳເລັດ, ພວກເຮົາຕ້ອງມີການພົວພັນລະຫວ່າງນັກທຸລະກິດ, ສື່ມວນຊົນ ແລະ ສື່ສານຢ່າງແໜ້ນແຟ້ນກວ່າອີກ. ພວກເຮົາຕ້ອງພະຍາຍາມເຮັດແນວໃດໃຫ້ຂ່າວຢ່າງຄົບຖ້ວນກ່ຽວກັບບັນດາປະເທດພວມກະກຽມໃຫ້ປະຊາຄົມນີ້ ເພື່ອໃຫ້ບັນດາວິສາຫະກິດບໍ່ຖືກຖອຍຫຼັງ, ບໍ່ພຽງແຕ່ຮັບມືຕໍ່ການທ້າທາຍເທົ່ານັ້ນ, ຫາກຕ້ອງບັນລຸໄດ້ບັນດາກາລະໂອກາດ ເພື່ອກໍ່ສ້າງປະຊາຄົມອາຊຽນລວມອີກດ້ວຍ“.