ບັນດາລັດຖະມົນຕີການຕ່າງປະເທດ ອາຊຽນ ອອກຖະແຫຼງການຮ່ວມກ່ຽວກັບສະພາບການໃນແຫຼມ ເກົາຫຼີ
ບັນດາຜູ້ແທນເຂົ້າຮ່ວມກອງປະຊຸມ
|
(vovworld) - ວັນທີ 28/4, ບັນດາລັດຖະມົນຕີການຕ່າງປະເທດຂຶ້ນກັບກຸ່ມ ອາຊຽນ ໄດ້ອອກຖະແຫຼງການຮ່ວມຢ່າງເປັນທາງການ ທີ່ໄດ້ຍົກອອກຫຼັກໝັ້ນລວມສຳລັບບັນດາຄວາມເຄັ່ງຕຶງໃນແຫຼມ ເກົາຫຼີ, ຮຽກຮ້ອງໃຫ້ບັນດາຝ່າຍກ່ຽວຂ້ອງລະງັບໃຈເອງ, ຫຼີກລ້ຽງການເຮັດໃຫ້ສະພາບການເຄັ່ງຕຶງຂຶ້ນຕື່ມ ແລະ ເຊື່ອມຕໍ່ການເຈລະຈາຢ່າງຕັ້ງໜ້າ. ບັນດາລັດຖະມົນຕີ ໄດ້ສະແດງ “ຄວາມວິຕົກວັງວົນ” ກ່ຽວກັບອາວຸດນິວເຄຼຍຂອງ ສປປ ເກົາຫຼີ ແລະ ບັນດາກໍລະນີທົດລອງລູກສອນໄຟນຳວິຖີຂອງປະເທດນີ້, ຖືວ່າ ສະພາບການຂາດສະຖຽນລະພາບໃນແຫຼມ ເກົາຫຼີໄດ້ສົ່ງຜົນສະທ້ອນຢ່າງໜັກໜ່ວງເຖິງພາກພື້ນ. ບັນດາລັດຖະມົນຕີ ອາຊຽນ ໄດ້ຮຽກຮ້ອງ ສປປ ເກົາຫຼີ “ເຄົາລົບຢ່າງສົມບູນ” ບັນດາມະຕິກ່ຽວຂ້ອງຂອງສະພາຄວາມໝັ້ນຄົງ ສປຊ ແລະ ກົດໝາຍສາກົນ ພ້ອມທັງຮຽກຮ້ອງໃຫ້ ພຽງຢາງ ກັບຄືນສູ່ການເຈລະຈາໃນບັນຫານີ້.
ກ່ຽວກັບບັນຫາທະເລຕາເວັນອອກ, ບັນດາລັດຖະມົນຕີ ຢັ້ງຢືນຄວາມຕັດສິນໃຈຊຸກຍູ້ການສ້າງກອບກົດແຫ່ງການປະພຶດຢູ່ທະເລຕາເວັນອອກ (COC) ດ້ວຍເປົ້າໝາຍບັນລຸ ກົດແຫ່ງການປະພຶດຢູ່ທະເລຕາເວັນອອກຢ່າງແທດຈິງ, ມີປະສິດທິຜົນ ແລະ ເໝາະສົມກັບກົດໝາຍສາກົນ. ບັນດາລັດຖະມົນຕີ ເນັ້ນໜັກວ່າ: ໃນສະພາບການສາກົນ ແລະ ພາກພື້ນພວມມີບັນດາການຜັນແປສັບສົນຄືປະຈຸບັນ, ພິເສດແມ່ນສະພາບຄວາມເຄັ່ງຕຶງໃນແຫຼມ ເກົາຫຼີ ແລະ ບັນດາການເຄື່ອນໄຫວບູລະນະ, ນຳໃຊ້ກຳລັງການທະຫານບົນທະເລຕາເວັນອອກ, ອາຊຽນຕ້ອງສືບຕໍ່ມີສຽງເວົ້າລວມ, ແຂງແຮງ, ເສີມຂະຫຍາຍບົດບາດຕັ້ງໜ້າ ໃນການປະກອບສ່ວນຢ່າງແທດຈິງໃຫ້ສັນຕິພາບ, ສະຖຽນລະພາບໃນພາກພື້ນ ແລະ ໃນໂລກເວົ້າລວມ.