(vovworld) - ຕອນຄໍ່າວັນທີ 30/9 ຢູ່ ຮ່າໂນ້ຍ, ສະພາຮັບຜິດຊອບວຽກງານເຍົາວະຊົນສູນກາງສົມທົບກັບໂທລະພາບ ຫວຽດນາມ, ທະນາຄານ Vietcombank ຈັດຕັ້ງບຸນວັນເພັງເດືອນ 8 ໂດຍມີການເຂົ້າຮ່ວມຂອງເຍົາວະຊົນ 500 ຄົນທີ່ມາຈາກຫລາຍແຂວງ, ນະຄອນ. ກ່າວຄຳເຫັນໃນງານບຸນ, ທ່ານຮອງນາຍົກລັດຖະມົນຕີ Nguyen Thien Nhan ໄດ້ເນັ້ນຫນັກວ່າ: ຍາມໃດພັກ ແລະ ລັດ ກໍເອົາໃຈໃສ່, ເບິ່ງແຍງດູແລໃຫ້ແກ່ພວກນ້ອງເຍົາວະຊົນ. ທ່ານຮອງນາຍົກລັດຖະມົນຕີ ອວຍພອນໃຫ້ພວກນ້ອງໄດ້ຮັບບຸນວັນເພັງເດືອນ 8 ຢ່າງເບິກບານມ່ວນຊື່ນ, ມີຄວາມໄຝ່ຝັນໃຫມ່ ປະກອບສ່ວນສ້າງຄວາມເພິ່ງພໍໃຈໃຫ້ແກ່ພໍ່ແມ່, ແລະເຮັດໃຫ້ປະເທດຊາດພັດທະນາ. ທີ່ລາຍການຕ້ອນຮັບບຸນວັນເພັງເດືອນ 8 ນີ້, ສະພາຮັບຜິດຊອບວຽກງານເຍົາວະຊົນສູນກາງໄດ້ມອບທຶນສຶກສາ 20 ທຶນໃຫ້ແກ່ພວກນ້ອງເຍົາວະຊົນປະສົບກັບຄວາມຫຍຸ້ງຍາກ, ແຕ່ລະພູດລວມມູນຄ່າ 5 ລ້ານດົ່ງ.
ທ່ານຮອງນາຍົກລັດຖະມົນຕີ Nguyen Thien Nhan
ກ່າວຄຳເຫັນໃນບຸນວັນເພັງເດືອນ 8
ພາບ: internet
|
ສ່ວນຢູ່ເທດສະບານ Chi Linh ແຂວງ Hai Duong ແລະ ຢູ່ ເມືອງເກາະ Ly Son ກໍໄດ້ຈັດບຸນວັນເພັງເດືອນ 8 ເພື່ອນຳເອົາຄວາມເບິກບານມ່ວນຊື່ນໃຫ້ແກ່ເດັກນ້ອຍ. ເນື່ອງໃນໂອກາດນີ້, ການນຳກະຊວງແຮງງານທະຫານເສຍອົງຄະ ແລະ ສັງຄົມ ຫວຽດນາມ, ສະມາຄົມປົກປ້ອງສິດຂອງເດັກນ້ອຍ ຫວຽດນາມ ແລະ ແຂວງ Quang Ngai ໄດ້ໄປຢ້ຽມຢາມ ແລະ ມອບທຶນສຶກສາໃຫ້ແກ່ເດັກນ້ອຍປະສົບກັບຄວາມຫຍຸ້ງຍາກ 1.000 ທຶນ, ມອບຂອງຂວັນ 6000 ພູດໃຫ້ແກ່ເດັກນ້ອຍຢູ່ເມືອງເກາະ ແລະ ລູກຫລານຂອງບັນດານັກຮົບທີ່ພວມປະຕິບັດງານຢູ່ເຂດຊາຍແດນ, ໝູ່ເກາະ . ທ່ານນາງ Tran Thi Thanh Thanh ປະທານສະມາຄົມປົກປ້ອງສິດຂອງເດັກນ້ອຍ ຫວຽດນາມ ໃຫ້ຮູ້ວ່າ:
“ພ້ອມກັບເຫດການຈັດຕັ້ງໃຫ້ແກ່ເດັກນ້ອຍ, ສະມາຄົມຈະມຸ່ງໄປເຖິງບັນດາເປົ້າໝາຍແມ່ນເດັກອາພັບ, ບໍ່ທັນໄດ້ຮັບສິດຂອງຕົນ. ເດັກນ້ອຍຢູ່ເຂດຫ່າງໄກສອກຫລີກ, ເຂດພູດອຍ, ລູກຫລານຂອງບັນດາຄອບຄົວປະສົບກັບຄວາມຫຍຸ້ງຍາກພິເສດ. ຈຸດໝາຍຂອງພວກຂ້າພະເຈົ້າແມ່ນປະຕິບັດສິດຂອງເດັກນ້ອຍ, ເຮັດໃຫ້ເດັກນ້ອຍໄດ້ຊົມໃຊ້ສິດຂອງຕົນ ແລະ ເຂົ້າຮ່ວມການສະກັດກັ້ນບັນດາການກະທຳລະເມີດສິດຂອງເດັກນ້ອຍ.”