ບັນຍາກາດວັນບຸນ ຄຼິດສະມາດ ພວມແຜ່ຂະຫຍາຍອອກສູ່ຫຼາຍທ້ອງຖິ່ນໃນທົ່ວຂອງປະເທດ ຫວຽດນາມ. ຢູ່ນະຄອນຫຼວງ ຮ່າໂນ້ຍ, ໂບດແຫ່ງຕ່າງໆ, ຖະໜົນຫຼາຍສາຍໄດ້ປະດັບປະດາດ້ວຍໄຟແສງສີ, ເຄື່ອງປະດັບທີ່ສວຍງາມ, ດຶງດູດປະຊາຊົນຫຼາຍຄົນມາຖ່າຍຮູບ ແລະ ຕ້ອນຮັບບັນຍາກາດຂອງວັນບຸນຄຼິດສະມາດ. ຢູ່ໂບດໃຫຍ່ (ເຊິ່ງເປັນໂບດໃຫຍ່ສຸດຢູ່ຮ່າໂນ້ຍ) ຍາມໃດກໍ່ມີສີສັນຫຼາກຫຼາຍ, ສວຍງາມ.

        ຢູ່ຖະໜົນຮ່າມລອງ (ຮ່າໂນ້ຍ), ໂບດຮ່າມລອງ ໄດ້ປະຕິບັດສຳເລັດຂັ້ນຕອນປະດັບກ່ອນນີ້ໜຶ່ງເດືອນ ເພື່ອຂ່ຳນັບຮັບຕ້ອນວັນບຸນ ຄຼິດສະມາດ. ທ່ານປະທານສະພາບໍລິຫານງານເຂດຊາວຄຼິດ ຮ່າມລອງ PhilipPhe ຫວູວັນເຕີ່ຍ, ໃຫ້ຮູ້ວ່າ:

        “ສຳລັບເຂດຊາວຄຼິດ ຮ່າມລອງ ແລ້ວ, ກ່ອນນີ້ໜຶ່ງເດືອນ ທຸກໆວຽກງານ, ໄດ້ເລີ່ມປະຕິບັດຂັ້ນຕອນກະກຽມການປະດັບປະດາເພື່ອຕ້ອນຮັບວັນບຸນ ຄຼິດສະມາດ ແລ້ວ. ປີນີ້ ກໍ່ມີການປ່ຽນແປງໃໝ່, ທຸກຄົນລ້ວນແຕ່ເຫັນວ່າບັນຍາກາດວັນບຸນ ຄຼິດສະມາດ ມີຄວາມຟົດຟື້ນຫຼາຍ, ໂບດແຫ່ງນີ້ບໍ່ພຽງແຕ່ແມ່ນບ່ອນເພື່ອຕ້ອນຮັບ ຊາວຄຼິດ ເທົ່ານັ້ນ ຫາກຍັງ ແມ່ນບ່ອນເພື່ອໃຫ້ແຂກທ່ອງທ່ຽວ ແລະ ຊາວໜຸ່ມ, ໄວໜຸ່ມ ມາຢ້ຽມຊົມອີກດ້ວຍ, ນີ້ກໍ່ແມ່ນການປະກອບສ່ວນເຮັດໃຫ້ວັດທະນະທຳລວມຂອງນະຄອນສວຍງາມຂຶ້ນຕື່ມ”.

        ຢູ່ນະຄອນ ໂຮ່ຈີມິນ, ເຊິ່ງເປັນນະຄອນໃຫຍ່ສຸດຂອງ ຫວຽດນາມ, ຖະໜົນສາຍຕ່າງໆ, ໂບດ, ເຂດຊາວຄຼິດ ຢູ່ນະຄອນ ໂຮ່ຈີມິນ ກໍ່ໄດ້ຕົບແຕ່ງ, ປະດັບປະດາຢ່າງສວຍງາມ, ຫຼາກຫຼາຍສີສັນດຶງດູດປະຊາຊົນມາຮ່ວມ ແລະ ຖ່າຍຮູບຢ່າງເບີກບານມ່ວນຊື່ນ. ບັນດາສູນການຄ້າກໍ່ໄດ້ປະດັບປະດາດ້ວຍໄຟແສງສີ, ຕົ້ນແປກຢູ່ປະຕູທາງເຂົ້າ.