(vovworld) - ຕອນບ່າຍວັນທີ 01/07, ໃນຂອບເຂດກອງປະຊຸມລັດຖະມົນຕີກະຊວງແຮງງານ ແລະ ສະຫວັດດີການສັງຄົມຫວຽດນາມ - ລາວ ຄັ້ງທີ 3, ບັນດາຜູ້ແທນໄດ້ສຸມໃສ່ປຶກສາຫາລືແບ່ງປັນຂໍ້ມູນກ່ຽວກັບບັນດາກົດໝາຍນະໂຍບາຍໃໝ່ກ່ຽວກັບ ສະຫວັດດີການສັງຄົມຂອງຫວຽດນາມ - ລາວ; ປຶກສາຫາລືກ່ຽວກັບເນື້ອໃນ ແລະ ບັນດາມາດຕະການປະຕິບັດໃນໄລຍະຈະມາເຖິງ. 2 ຝ່າຍໄດ້ເປັນເອກະພາບນຳກັນ ຜັນຂະຫຍາຍສັນຍາຮ່ວມມືແຮງງານລະຫວ່າງ 2 ລັດຖະບານຫວຽດນາມ ແລະ ລາວ ເຊິ່ງໄດ້ຮັບການລົງນາມໃນກອງປະຊຸມຄັ້ງນີ້ຢ່າງມີປະສິດທິຜົນ. ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ແລະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມລາວ ໄດ້ລົງນາມໃນບົດບັນທຶກ ກອງປະຊຸມລັດຖະມົນຕີກະຊວງແຮງງານ ແລະ ສະຫວັດດີການສັງຄົມຫວຽດນາມ - ລາວ ຄັ້ງທີ 3. 2 ຝ່າຍໄດ້ເຫັນດີຈັດຕັ້ງກອງປະຊຸມຄັ້ງທີ 4 ຢູ່ລາວ ໃນປີ 2015. ທ່ານນາງ ຟ້າມທິຫາຍຈ່ວຽນ, ກຳມະການສູນກາງພັກ, ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ໃຫ້ຮູ້ວ່າ.
“2 ຝ່າຍສືບຕໍ່ສົມທົບກັບກະຊວງການຕ່າງປະເທດອະນຸກຳມະການຫວຽດນາມ - ລາວ ແລະ ບັນດາກະຊວງທີ່ກ່ຽວຂ້ອງຢ່າງແໜ້ນແຟ້ນ ເພື່ອຜັນຂະຫຍາຍສັນຍາຮ່ວມມື; ສືບຕໍ່ສົມທົບກັບກະຊວງປ້ອງກັນປະເທດ ແລະ ບັນດາຂະແໜງທີ່ກ່ຽວຂ້ອງເພື່ອປະຕິບັດການຄົ້ນຫາ, ເຕົ້າໂຮມອັດຖິນັກຮົບທີ່ເສຍສະຫຼະຊີວິດເພື່ອຊາດ, ແລກປ່ຽນບົດຮຽນລະຫວ່າງບັນດາຫົວໜ່ວຍທີ່ກ່ຽວຂ້ອງຂອງ 2 ກະຊວງ ກ່ຽວກັບການສ້າງກົດໝາຍ, ນະໂຍບາຍ ແລະ ບັນດາຮູບແບບກ່ຽວກັບຄົນງານວຽກເຮັດງານທຳ ແລະ ນະໂຍບາຍເງິນເດືອນ ກໍ່ຄືບັນດານະໂຍບາຍລະອຽດໃນຂົງເຂດເຊິ່ງຫວຽດນາມ ຮັບຜິດຊອບ, ເພື່ອສ້າງເງື່ອນໄຂສະດວກໃຫ້ແຕ່ລະຝ່າຍເປັນເສນາທິການວາງແຜນນະໂຍບາຍຂອງຕົນ.”