(vovworld) - ໂດຍສືບຕໍ່ວາລະປະຊຸມປະຈຳເດືອນກໍລະກົດ, ວັນທີ 31/07, ພາຍໃຕ້ການເປັນປະທານຂອງທ່ານນາຍົກລັດຖະມົນຕີ ຫງວຽນເຕີນຢຸງ, ລັດຖະບານໄດ້ປຶກສາຫາລືກ່ຽວກັບແຜນຮ່າງ “ປ່ຽນໃໝ່ການສຶກສາ ແລະ ບຳລຸງສ້າງໂດຍພື້ນຖານ, ຮອບດ້ານ, ຕອບສະໜອງຄວາມຮຽກຮ້ອງຕ້ອງການຫັນເປັນອຸດສາຫະກຳ, ທັນສະໄໝ ໃນເງື່ອນໄຂເສດຖະກິດການຕະຫຼາດຕາມກຳນົດທິດສັງຄົມນິຍົມ ແລະ ເຊື່ອມໂຍງເຂົ້າກັບສາກົນ”.
ບັນດາສະມາຊິກລັດຖະບານໄດ້ສຸມໃສ່ປຶກສາຫາລື, ປະກອບຄຳເຫັນເຂົ້າບັນດາເນື້ອໃນໃຫຍ່ຂອງແຜນຮ່າງທີ່ກ່ຽວຂ້ອງເຖິງການຍົກສູງຜະລິດທິຜົນການລົງທຶນເພື່ອພັດທະນາການສຶກສາ, ປ່ຽນໃໝ່ຮູບແບບໂດຍພື້ນຖານ ແລະ ວິທີການກວດກາ, ການສອບເສັງ ແລະ ຕີລາຄາຄຸນນະພາບການສຶກສາ.... ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢຸງ ຖືວ່າ ຜົນງານທຸກຢ່າງທີ່ບັນລຸໄດ້ຂອງປະເທດຊາດລ້ວນແຕ່ມີການປະກອບສ່ວນຢ່າງຕັ້ງໜ້າຂອງການສຶກສາບຳລຸງສ້າງ. ແຕ່ວ່າ, ເມື່ອທຽບໃສ່ຄວາມຮຽກຮ້ອງທີ່ວາງອອກ, ຈຳເປັນຕ້ອງມີການປ່ຽນໃໝ່ການສຶກສາ ບຳລຸງສ້າງໂດຍພື້ນຖານ ແລະ ຮອບດ້ານ ເພື່ອຕອບສະໜອງຄວາມຮຽກຮ້ອງຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ.