(ບັນດາສະມາຊິກລັດຖະສະພາເຂົ້າຮ່ວມ
ວາລະຊັກຖາມ ແລະ ຕອບຄຳຊັກຖາມ)
(vovworld) – ການເຊື່ອມໂຍງເສດຖະກິດເຂົ້າກັບສາກົນ, ການປ້ອງກັນ ຕ້ານການສໍ້ໂກງດ້ານການຄ້າ, ຮັບປະກັນຄວາມສະຫງົບປອດໄພທາງສັງຄົມ, ພັດທະນາຂະແໜງການທ່ອງທ່ຽວ, ຂະແໜງການກະສິກຳ ແມ່ນບັນດາເນື້ອໃນຕົ້ນຕໍ ເຊິ່ງບັນດາສະມາຊິກສະພາແຫ່ງຊາດຊັກຖາມ ແລະ ຕອບຄຳຊັກຖາມໃນຕອນບ່າຍວັນທີ 17/11. ຕາມທ່ານຮອງນາຍົກລັດຖະມົນຕີ ຮ່ວາງຈູງຫາຍ ແລ້ວ, ຫວຽດນາມ ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບເສດຖະກິດສາກົນ. ຫວຽດນາມ ເຂົ້າຮ່ວມສັນຍາການຄ້າເສລີ 10 ສະບັບ ແລະ ກະກຽມເຂົ້າຮ່ວມປະຊາຄົມເສດຖະກິດ ອາຊຽນ ໃນປີ 2015. ມາຮອດປີ 2025 ຫວຽດນາມ ຈະລົງນາມໃນສັນຍາການຄ້າເສລີຕື່ມອີກ 10 ສະບັບ. ທ່ານຮອງນາຍົກລັດຖະມົນຕີ ຮ່ວາງຈູງຫາຍ ຊີ້ແຈ້ງວ່າ:
“ເມື່ອເຊື່ອມໂຍງ ບັນຫາທຳອິດແມ່ນ ຫວຽດນາມ ຕ້ອງປ່ຽນໃໝ່ລະບົບເອກະສານນິຕິກຳ ແລະ ກົດໝາຍ ເພື່ອກົມກຽວກັບວິວັດການເຊື່ອມໂຍງ. ລັດຖະບານໄດ້ອະນຸມັດຜ່ານບັນດາໂຄງການໜູນຊ່ວຍກ່ຽວກັບການສົ່ງເສີມການຄ້າ, ການລົງທຶນ, ກອງປະຊຸມສຳມະນາ…ເພື່ອໃຫ້ບັນດາວິສາຫະກິດລື້ງເຄີຍກັບເງື່ອນໄຂເຊື່ອມໂຍງເທື່ອລະກ້າວ. ສຳລັບບັນດາວິສາຫະກິດ, ເຂົ້າເຈົ້າກໍ່ ສ້າງຍຸດທະສາດ, ກຳນົດແຜນດຳເນີນງານຂອງຕົນເພື່ອເຊື່ອມໂຍງ”.
ກ່ຽວຂ້ອງເຖິງເລື່ອງ ຜູ້ມີສິດເລືອກຕັ້ງບໍ່ພໍໃຈເລື່ອງ ຫລາຍທ້ອງຖິ່ນໄດ້ກໍ່ສ້າງບັນດາເຂດບໍລິຫານລັດດ້ວຍມູນຄ່າສູງ ຟຸມເຟືອຍ, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ຮຽກຮ້ອງຢຸດຕິການກໍ່ສ້າງ.
ອະພິປາຍກ່ຽວກັບການເຊື່ອມໂຍງດ້ານເສດຖະກິດ, ທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ຫວູຮູຍຮ່ວາງ ໃຫ້ຮູ້ວ່າ, ຫວຽດນາມ ໄດ້ ແລະ ພວມເຈລະຈາບາງສັນຍາການຄ້າທີ່ສຳຄັນເຊັ່ນ: ສັນຍາ TPP ສັນຍາການຄ້າເສລີກັບສະຫະພາບເອີລົບ… ເມື່ອສັນຍາເຫຼົ່ານັ້ນໄດ້ຮັບການເຈລະຈາສຳເລັດ ມັນຈະຊ່ວຍໃຫ້ວິສາຫະກິດຫວຽດນາມເຊື່ອມໂຍງຢ່າງເລິກເຊິ່ງ, ກວ້າງຂວາງກວ່າອີກ.
“ຄາດໝາຍວາງອອກໃນວິວັດແຫ່ງການເຈລະຈາ, ນັ້ນແມ່ນຕ້ອງຮຽກຮ້ອງ ບັນດາຄູ່ຮ່ວມມືສະຫງວນຜົນປະໂຫຍດຕ່າງໆ ໃຫ້ຫວຽດນາມ . ແລະພວກເຮົາສາມາດບັນລຸໄດ້ຄວາມຮຽກຮ້ອງນີ້ໂດຍພື້ນຖານແລ້ວ “
ທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ຫວູຮູຍຮ່ວາງ ກໍ່ຍົກອອກບັນດາມາດຕະການປ້ອງກັນ, ຕ້ານການສໍ້ໂກງທາງດ້ານການຄ້າ, ການແກ້ໄຂສະພາບສິນຄ້າປອມ.
ສຳລັບບັນຫາປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍສັງຄົມ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ ຫວຽດນາມ ແມ່ນປະເທດຮັບປະກັນຄວາມປອດໄພ ແລະ ຄວາມເປັນລະບຽບຮຽບຮ້ອຍທາງສັງຄົມ. ທ່ານກໍ່ຊີ້ແຈ້ງບັນດາມາດຕະການຮັບປະກັນ ຄວາມປອດໄພ ແລະ ຄວາມເປັນລະບຽບຮຽບຮ້ອຍທາງສັງຄົມ.
ສ່ວນທ່ານຮອງນາຍົກລັດຖະມົນຕີ ຫວູດຶກດາມ ກໍ່ຕອບຄຳຊັກຖາມກ່ຽວກັບການຮັບປະກັນຄວາມປອດໄພ ແລະ ສຸຂະອະນາໄມຂອງອາຫານ, ຮັບປະກັນສຸຂະພາບໃຫ້ປະຊາຊົນ ແລະ ສິດຜົນປະໂຫຍດຂອງຜູ້ໃຊ້ສອຍ…
ແລະກໍ່ໃນຕອນບ່າຍວັນທີ 17/11, ທ່ານລັດຖະມົນຕີວ່າການກະຊວງວັດທະນະທຳ, ກິລາ ແລະ ທ່ອງທ່ຽວ ຮ່ວາງຕ໋ວນແອງ, ທ່ານລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດ ກາວດຶກຟາດ, ທ່ານລັດຖະມົນຕີວ່າການກະຊວງຄົມມະນາຄົມສົນສົ່ງ ດິງລາທັງ, ທ່ານນາງ ລັດຖະມົນຕີວ່າການກະຊວງສາທາລະນະສຸກ ຫງວຽນທິກິມຕ໋ຽນ ແລະ ທ່ານລັດຖະມົນຕີວ່າການກະຊວງສຶກສາ ຟ້າມຫວຸລ້ວນສືບຕໍ່ຕອບຄຳຊັກຖາມໃນຂົງເຂດທີ່ຕົນຮັບຜິດຊອບ.