ທ່ານນາງ Pham Thi Hai Chuyen ລັດຖະມົນຕີກະຊວງແຮງງານ
ທະຫານເສຍອົງຄະ ແລະ ສັງຄົມ ຕອບຄຳຊັກຖາມ
ພາບ: internet
|
(vovworld) - ຕອນເຊົ້າວັນທີ 21/8, ຄະນະປະຈຳສະພາແຫ່ງຊາດ ຫວຽດນາມ ໄດ້ຈັດວາລະປະຊຸມໂດຍກົງຜ່ານເຄືອຂ່າຍອິນເຕີແນດ ກັບຄະນະສະມາຊິກສະພາແຫ່ງຊາດ (ສສຊ) ໃນທົ່ວປະເທດ ເພື່ອຊັກຖາມທ່ານນາງ Pham Thi Hai Chuyen ລັດຖະມົນຕີກະຊວງແຮງງານ ທະຫານເສຍອົງຄະ ແລະ ສັງຄົມ ຫວຽດນາມ ກ່ຽວກັບບາງບັນຫາທີ່ຜູ້ມີສິດເລືອກຕັ້ງພວມສົນໃຈ. ນັ້ນແມ່ນການປະຕິບັດນະໂຍບາຍສອນວິຊາຊີບ, ສ້າງວຽກເຮັດງານທຳໃຫ້ແກ່ຊາວຫນຸ່ມຊົນນະບົດ ແລະ ປະຊາຊົນຊົນເຜົ່າສ່ວນຫນ້ອຍ ແລະ ບັນຫາຄຸ້ມຄອງຄົນງານຕ່າງປະເທດທີ່ພວມເຮັດວຽກຢູ່ ຫວຽດນາມ. ກ່າວຄຳເຫັນທີ່ວາລະຊັກຖາມ, ທ່ານນາງ Nguyen Thi Kim Ngan ຮອງປະທານສະພາແຫ່ງຊາດໄດ້ສະເຫນີວ່າ:
“ເພື່ອເພີ່ມທະວີປະສິດທິຜົນການເຄື່ອນໄຫວຊັກຖາມ ແລະ ຕອບຄຳຊັກຖາມ, ຮັບປະກັນພາລະຫນ້າທີ່ຕິດຕາມກວດກາຂອງສະພາແຫ່ງຊາດ, ສະເຫນີທ່ານນາງລັດຖະມົນຕີກະຊວງແຮງງານ ທະຫານເສຍອົງຄະ ແລະ ສັງຄົມ ສືບຕໍ່ຊີ້ນຳປະຕິບັດການສອນວິຊາຊີບໃຫ້ມີປະສິດທິຜົນ ຕິດພັນກັບການແກ້ໄຂວຽກເຮັດງານທຳ, ຕອບສະຫນອງຄວາມຮຽກຮ້ອງຕ້ອງການຂອງຕະຫລາດແຮງງານນັບທັງຈຳນວນ ແລະ ຄຸນນະພາບກ່ຽວກັບອົງປະກອບຂະແຫນງອາຊີບ ແລະ ລະດັບການບຳລຸງສ້າງ.”
ຕອນບ່າຍວັນດຽວກັນ, ຄະນະປະຈຳສະພາແຫ່ງຊາດ ຈະດຳເນີນການຊັກຖາມທ່ານ Nguyen Van Binh ຜູ້ວ່າການທະນາຄານແຫ່ງລັດ ຫວຽດນາມ ກ່ຽວກັບບັນຫາຫນິ້ເສຍ ແລະ ໂຄງປະກອບລະບົບທະນາຄານການຄ້າ.