ຫຼັກໝັ້ນຂອງຫວຽດນາມ ໄດ້ຮັບການຊົມເຊີຍທີ່ ກອງປະຊຸມ Shangri – La ຄັ້ງທີ 13

ວັນຈັນ ທີ 2 ມິຖຸນາ ຄ.ສ. 2014 | 11:59:47

(ພົນເອກ, ລັດຖະມົນຕີກະຊວງປ້ອງກັນປະເທດຫວຽດນາມ ຟຸ່ງກວາງແທງ)

(vovworld) – ພົນເອກ, ລັດຖະມົນຕີກະຊວງປ້ອງກັນປະເທດຫວຽດນາມ ຟຸ່ງກວາງແທງ, ຫົວໜ້າຄະນະເຈລະຈາການທະຫານຂັ້ນສູງຫວຽດນາມ ເຂົ້າຮ່ວມການເຈລະຈາຄັ້ງນີ້ ໃຫ້ຮູ້ວ່າ, ການເຈລະຈາ Shangri – La ຄັ້ງນີ້ມີຄວາມໝາຍສຳຄັນຍິ່ງ, ເຊິ່ງແມ່ນສະຖານທີ່ເພື່ອໃຫ້ປະເທດຕ່າງໆແບ່ງປັນທັດສະນະ, ຂໍ້ມູນກ່ຽວກັບສະພາບການ, ນະໂຍບາຍຂອງຕົນ, ສ້າງຄວາມໄວ້ເນື້ອເຊື່ອໃຈ, ຊອກຫາມາດຕະການຮ່ວມມື, ໂດຍສະເພາະແມ່ນຂົງເຂດປ້ອງກັນຊາດເພື່ອປົກປັກຮັກສາສະຖຽນລະພາບ, ຄວາມໝັ້ນຄົງ, ຫຼີກລ້ຽງການສູ້ຢັນກັນ, ຫຼຸດຜ່ອນຄວາມເຄັ່ງຕຶງ, ເພີ່ມທະວີການຮ່ວມມື… ກ່ຽວກັບບັນຫາທະເລຕາເວັນອອກ, ທ່ານລັດຖະມົນຕີ ຟຸ່ງກວາງແທງ ໃຫ້ຮູ້ວ່າ, ນີ້ແມ່ນໜຶ່ງໃນບັນດາບັນຫາທີ່ໄດ້ຮັບຄວາມສົນໃຈທີ່ສຸດຢູ່ທີ່ Shangri – La ຄັ້ງທີ 13 ຍ້ອນນີ້ແມ່ນບໍລິເວັນທີມີທາງທະເລສາກົນສ້າງໃຫ້ມີການພົວພັນແລກປ່ຽນຄ້າຂາຍທີ່ສຳຄັນຍິ່ງສຳລັບບັນດາພື້ນຖານເສດຖະກິດ. ຖ້າຫາກຄວາມໝັ້ນຄົງ ປອດໄພບໍ່ໄດ້ຮັບການຮັບປະກັນ ຈະສົ່ງຜົນສະທ້ອນເຖິງບັນດາປະເທດໃນພາກພື້ນກໍ່ຄືຫຼາຍປະເທດໃນໂລກ. ປະຈຸບັນ, ເມື່ອສະພາບການຢູ່ທະເລຕາເວັນອອກ ພວມຂາດສະຖຽນລະພາບ, ບັນດາປະເທດລ້ວນແຕ່ສະແດງຄວາມວິຕົກກັງວົນປາດຖະໜາຢາກຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບຢູ່ທະເລຕາເວັນອອກ, ປາດຖະໜາວ່າ ບັນດາຝ່າຍແກ້ໄຂບັນຫາດ້ວຍມາດຕະການໂດຍສັນຕິວິທີ, ກົດໝາຍສາກົນ, ສົນທິສັນຍາກ່ຽວກັບກົດໝາຍທະເລ, ຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແລະ ກ້າວໄປເຖິງການສ້າງປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ລະຫວ່າງອາຊຽນ - ຈີນ. ທ່ານລັດຖະມົນຕີ ຟຸ່ງກວາງແທງ ຢືນຢັນວ່າ ບັນດາປະເທດຕ້ອງເຄົາລົບກົດໝາຍ, ບໍ່ໄດ້ມີການກະທຳພຽງຝ່າຍດຽວ, ສ້າງເປັນບັນຫາທີ່ເກີດຂຶ້ນແລ້ວ ຫຼື ນາບຂູ່ນຳໃຊ້ກຳລັງອາວຸດ ເພື່ອແກ້ໄຂບັນດາການຂັດແຍ້ງກ່ຽວກັບອະທິປະໄຕຜືນແຜ່ນດິນ.

ກ່ຽວກັບການປະກອບສ່ວນຂອງຄະນະຜູ້ແທນຫວຽດນາມ ທີ່ Shangri – La ຄັ້ງທີ 13, ທ່ານລັດຖະມົນຕີຟຸ່ງກວາງແທງໃຫ້ຮູ້ວ່າ, ໃນການເຈລະຈາຄັ້ງນີ້, ຄະນະຈັດຕັ້ງ ໄດ້ເຊີນຄະນະຜູ້ແທນຫວຽດນາມ ກ່າວປາໄສດ້ວຍຫົວຂໍ້ “ຄຸ້ມຄອງຄວາມເຄັ່ງຕຶງຍຸດທະສາດ” ແລະ ຫວຽດນາມໄດ້ແຈ້ງຂ່າວຢ່າງເປັນທາງການ, ພາວະວິໄສ, ຊື່ຕົງ, ທັນການເພື່ອໃຫ້ນັກການເມືອງ, ນັກຮຽນຮູ້, ບັນດາອົງການສື່ສານສາກົນຮັບຊາບກ່ຽວກັບສະພາບການຢູ່ທະເລຕາເວັນອອກປະຈຸບັນ ພາຍຫຼັງທີ່ຈີນ ຕັ້ງຮ້ານເຈາະນ້ຳມັນໄຮຢາງ ຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ແຜນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນແກ້ໄຂບັນຫາດ້ວຍການເຈລະຈາ, ດ້ວຍມາດຕະການສັນຕິພາບ, ໂດຍສະເພາະແມ່ນກົດໝາຍສາກົນ, ສົນທິສັນຍາກ່ຽວກັບກົດໝາຍວ່າດ້ວຍທະເລປີ 1982 ກໍ່ຄື DOC. ຫວຽດນາມ ລະງັບໃຈທີ່ສຸດ, ບໍ່ນຳໃຊ້ອາວຸດ ແລະ ບໍ່ນາບຂູ່ນຳໃຊ້ກຳລັງອາວຸດ, ພ້ອມທັງນຳໃຊ້ກຳລັງປະຕິບັດໜ້າທີ່, ບັນດາກຳປັ່ນຫາປາສົມທົບກັນຕໍ່ສູ້ເພື່ອປົກປັກຮັກສາອະທິປະໄຕ ແລະ ພວມມານະພະຍາຍາມຊອກຫາວິທີການແກ້ໄຂຄວາມເຄັ່ງຕຶ່ງດັ່ງກ່າວ ຜ່ານການເຈລະຈາກັບການນຳຂັ້ນສູງຂອງຈີນ.