(vovworld) – ໂດຍສືບຕໍ່ການຢ້ຽມຢາມເບລາຣຸດ, ໃນຕອນບ່າຍວັນທີ 26/11 (ຕາມເວລາທ້ອງຖິ່ນ), ຢູ່ສຳນັກງານປະທານາທິບໍດີ, ທີ່ນະຄອນຫຼວງ Mink, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ມີການເຈລະຈາກັບທ່ານປະທານາທິບໍດີ Alexander Lukashenko. ຢູ່ທີ່ນີ້, ທ່ານເລຂາທິການໃຫຍ່ ຫງວຽນຟຸຈ້ອງ ຢືນຢັນວ່າ, ຍາມໃດຫວຽດນາມ ກໍ່ຖືການພົວພັນມິດຕະພາບທີ່ເປັນມູນເຊື້ອເປັນສຳຄັນ ກໍ່ຄືປາດຖະໜາຢາກຊຸກຍູ້ການພົວພັນດ້ານເສດຖະກິດ - ການຄ້າ ແລະ ການຮ່ວມມືຫຼາຍດ້ານລະຫວ່າງ 2 ປະເທດ ໃຫ້ເໝາະສົມກັບການພົວພັນດ້ານການເມືອງອັນດີງາມ ແລະ ຄວາມສາມາດບົ່ມຊ້ອນຂອງແຕ່ລະຝ່າຍ, ເພື່ອຜົນປະໂຫຍດຂອງປະຊາຊົນ 2 ປະເທດ. ທ່ານເລຂາທິການໃຫຍ່ ຫງວຽນຟຸຈ້ອງ ແລະ ທ່ານປະທານາທິບໍດີ Alexander Lukashenko ເຫັນດີນຳກັນວ່າ, ໃນໄລຍະຈະມາເຖິງ, 2 ຝ່າຍຈະສືບຕໍ່ເພີ່ມທະວີການຢ້ຽມຢາມ ແລະ ການພົບປະລະຫວ່າງການນຳຂັ້ນສູງ 2 ປະເທດຕື່ມອີກ; ຍູ້ແຮງການພົວພັນໃນທຸກດ້ານຄື: ພາກລັດ, ສະພາແຫ່ງຊາດ, ລັດຖະບານ, ພັກການເມືອງ, ບັນດາອົງການສັງຄົມ ແລະ ການພົບປະແລກປ່ຽນປະຊາຊົນ ກໍ່ຄືເພີ່ມທະວີການເຄື່ອນໄຫວພົບປະແລກປ່ຽນ, ຮ່ວມມືແລກປ່ຽນບົດຮຽນໃນການຊີ້ນຳນຳພາ, ຄຸ້ມຄອງປະເທດ ເພື່ອແນໃສ່ເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນ ແລະ ປັບປຸງ, ຍົກສູງຄວາມໄວ້ເນື້ອເຊື່ອໃຈດ້ານການເມືອງລະຫວ່າງ 2 ປະເທດ.
ດ້ວຍຖານະເປັນສະມາຊິກໃນພັນທະມິດພາສີ, ເບລາຣຸດ ໃຫ້ຄຳໝັ້ນສັນຍາຍູ້ແຮງສິ້ນສຸດການເຈລະຈາ ແລະ ລົງນາມໃນສັນຍາການຄ້າເສລີ (FTA) ລະຫວ່າງຫວຽດນາມ ກັບພັນທະມິດພາສິດັ່ງກ່າວໂດຍໄວ. ພ້ອມທັງຈະສ້າງເງື່ອນໄຂສະດວກເພື່ອໃຫ້ສິນຄ້າຫວຽດນາມ ນຳເຂົ້າຕະຫຼາດເບລາຣຸດ ຫຼາຍກວ່າອີກ.
ການນຳ 2 ປະເທດໄດ້ເຫັນດີເປັນເອກະພາບຈະຍູ້ແຮງການຮ່ວມມືໃນບັນດາຂົງເຂດສຶກສາ - ບຳລຸງສ້າງ, ວັດທະນະທຳ, ກິລາ ແລະ ທ່ອງທ່ຽວ, ຕໍ່ສູ້ຕ້ານອາດຊະຍາກຳຂ້າມຊາດ; ພ້ອມກັນມານະພະຍາຍາມປະຕິບັດສັນຍາລະຫວ່າງລັດຖະບານ ແລະ ບັນດາຂໍ້ຕົກລົງທີໄດ້ລົງນາມໃນບັນດາຂົງເຂດດັ່ງກ່າວຢ່າງມີປະສິດທິຜົນ.
2 ຝ່າຍເຫັນດີຄວນເພີ່ມທະວີການສົມທົບກັນຢ່າງແໜ້ນແຟ້ນກວ່າອີກ ແລະ ແບ່ງປັນຂໍ້ມູນຂ່າວທີ່ກ່ຽວຂ້ອງເຖິງບັນດາບັນຫາພາກພື້ນ ແລະ ສາກົນຢ່າງມີປະສິດທິຜົນ, ໂດຍຜ່ານບັນດາກົນໄກຮ່ວມມືທີ່ມີຢູ່ແລ້ວ, ຜ່ານການພົບປະ, ແລກປ່ຽນ 2 ຝ່າຍ ແລະ ຢູ່ເວທີປາໄສສາກົນຫຼາຍຝ່າຍ.
ກ່ຽວກັບບັນຫາທະເລຕາເວັນອອກ, ການນຳ 2 ທ່ານໄດ້ສະແດງຄວາມວິຕົກກັງວົນກ່ຽວກັບບັນດາການຜັນແປຫວ່າງມໍ່ໆມານີ້, ປາດຖະໜາວ່າຝ່າຍຕ່າງໆຈະແກ້ໄຂການຂັດແຍ້ງກັນໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ.
ກ່າວຄຳເຫັນທີ່ການປະຊຸມຂ່າວພາຍຫຼັງການເຈລະຈາ. ທ່ານປະທານາທິບໍດີ Lukashenko ຊີ້ແຈ້ງວ່າ.
“ໃນອະນາຄົດ ພວກເຮົາຈະສືບຕໍ່ເພີ່ມທະວີດຶງດູດການລົງທຶນ, ສ້າງຕັ້ງບັນດາບໍລິສັດຮ່ວມທຸລະກິດລະຫວ່າງ 2 ປະເທດ ກໍ່ຄືເພີ່ມທະວີໂຄງການກໍ່ສ້າງ ແລະ ພັດທະນາພື້ນຖານໂຄງລ່າງ. ໃນໄລຍະຈະມາເຖິງ ພວກເຮົາຈະລົງນາມໃນສັນຍາການຄ້າເສລີລະຫວ່າງ ຫວຽດນາມ ແລະ ບັນດາປະເທດໃນພັນທະມິດພາສີ. ເບລາຣຸດ ແລະ ຫວຽດນາມ ສືບຕໍ່ຮັກສາການພົບປະດ້ານການເມືອງທຸກຂັ້ນເປັນປະຈຳ, ພິເສດແມ່ນຂັ້ນສູງ.”
ສ່ວນທ່ານເລຂາທິການໃຫຍ່ ຫງວຽນຟຸຈ້ອງ ຖືວ່າ, ຫວຽດນາມ ແລະ ເບລາຣຸດ ມີຜົນປະໂຫຍດຄ້າຍຄືກັນຫຼາຍຢ່າງ, ມີຄວາມສາມາດບົ່ມຊ້ອນເພື່ອເປີດກວ້າງການຮ່ວມມື, ໃນນັ້ນມີການເຊື່ອມຕໍ່ 2 ພື້ນຖານເສດຖະກິດໃນໄລຍະຍາວ.
“ພວກຂ້າພະເຈົ້າໄດ້ເປັນເອກະພາບນຳກັນວ່າຈະສືບຕໍ່ສ້າງເງື່ອນໄຂສະດວກໃຫ້ບັນດາວິສາຫະກິດ, ນັກລົງທຶນ 2 ປະເທດເຊື່ອມຕໍ່ຄູ່ຮ່ວມມື, ໜູນຊ່ວຍຈັດຕັ້ງບັນດາເຄື່ອນໄຫວສົ່ງເສີມດ້ານການຄ້າ ເພື່ອຊ່ວຍໃຫ້ສິນຄ້າ, ການບໍລິການແຫຼ່ງເງິນລົງທຶນລະຫວ່າງ 2 ປະເທດສາມາດແຊກຊຶມເຂົ້າຕະຫຼາດຂອງກັນ ເພື່ອຊຸກຍູ້ການເຕີບໂຕດ້ານການຄ້າ ແລະ ການລົງທຶນ 2 ຝ່າຍ”.
ແລະກໍ່ໃນວັນດຽວກັນ, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ມີການພົບປະກັບປະຊາຄົມຊາວຫວຽດນາມ ອາໄສຢູ່ເບລາຣຸດ. ທ່ານເລຂາທິການໃຫຍ່ປາດຖະໜາວ່າ ປະຊາຄົມຊາວຫວຽດນາມ ອາໄສຢູ່ເບລາຣຸດ ຍາມໃດກໍ່ມີຄວາມສາມັກຄີ, ໜູນຊ່ວຍເຊິ່ງກັນ ແລະ ກັນ, ທັງຮັກສາສີສັນຊາດ, ທັງເສີມຂະຫຍາຍບົດບາດເປັນຂົວຕໍ່ມິດຕະພາບລະຫວ່າງ 2 ປະເທດ.