ຫວຽດນາມ ພ້ອມແລ້ວທີ່ຈະຕ້ອນຮັບບັນດານັກລົງທຶນຂອງສະພາດຳເນີນທຸລະກິດອາຊີ
ທ່ານຮອງນາຍົກລັດຖະມົນຕີ ຫວຽດນາມ ເວືອງດີງເຫວ້
ເຂົ້າຮ່ວມງານລ້ຽງຂ່ຳນັບຊົມເຊີຍເວທີປາໄສລະດູບານໃໝ່ 2017
(ພາບ: TTXVN)
(vovworld) - ຕອນຄ່ຳວັນທີ 23/02 ທ່ານຮອງນາຍົກລັດຖະມົນຕີ ຫວຽດນາມ ເວືອງດີງເຫວ້ ໄດ້ເຂົ້າຮ່ວມງານລ້ຽງຂ່ຳນັບຊົມເຊີຍເວທີປາໄສລະດູບານໃໝ່ 2017 ດ້ວຍຫົວຂໍ້ວ່າ: “ການລົງທຶນໃຫ້ 50 ປີຕໍ່ໄປ: ຄວາມໝັ້ນຄົງ ແລະ ລັກສະນະປະດິດຄິດສ້າງ” ໂດຍສະພາດຳເນີນທຸລະກິດ ອາຊີ ຈັດຕັ້ງຢູ່ນະຄອນ ໂຮ່ຈີມິນ. ທ່ານຮອງນາຍົກລັດຖະມົນຕີ ເວືອງດີງເຫວ້ ຕີລາຄາສູງຫົວຂໍ້ຂອງເວທີປາໄສມີລົມຫາຍໃຈຂອງຍຸກສະໄໝ, ໄປທັນບັນດາທ່າອ່ຽງ ແລະ ກະແສຟອງໃໝ່ສຸດ, ບໍ່ພຽງແຕ່ຢູ່ ຫວຽດນາມ ເທົ່ານັ້ນ ຫາກຍັງຢູ່ທັງພາກພື້ນ ແລະ ໂລກອີກດ້ວຍ. ທ່ານຮອງນາຍົກລັດຖະມົນຕີ ເວືອງດີງເຫວ້ ຫວັງວ່າ ເວທີປາໄສຈະມີບັນດາວາລະປຶກສາຫາລືຕັ້ງໜ້າ ແລະ ຟົດຟື້ນກ່ຽວກັບການພົວພັນໜູນຊ່ວຍລະຫວ່າງຂໍ້ລິເລີ່ມ ແລະ ການພັດມະນາແບບຍືນຍົງ, ແບ່ງປັນຢ່າງກົງໄປກົງມາ ແລະ ເປີດເຜີຍ ເພື່ອພ້ອມກັນຮ່ວມແຮງຮ່ວມໃຈປະກອບສ່ວນເຂົ້າໃນການພັດທະນາແບບຍືນຍົງຂອງພາກພື້ນ ໃນນັ້ນມີ ຫວຽດນາມ. ເມື່ອແລກປ່ຽນກັບບັນດາສະມາຊິກສະພາດຳເນີນທຸລະກິດ ອາຊີ ກ່ຽວກັບບັນດາບັນຫາທີ່ກ່ຽວຂ້ອງເຖິງນະໂຍບາຍພັດທະນາເສດຖະກິດຂອງ ຫວຽດນາມ, ທ່ານຮອງນາຍົກລັດຖະມົນຕີ ເວືອງດີງເຫວ້ ຢືນຢັນວ່າ ພັກ ແລະ ລັດ ຫວຽດນາມ ປະຕິບັດແຜນນະໂຍບາຍສະເໝີຕົ້ນສະເໝີປາຍຢ່າງຕັ້ງໜ້າ, ເປັນເຈົ້າການເຊື່ອມໂຍງເຂົ້າກັບເສດຖະກິດສາກົນ, ກາຍເປັນຄູ່ຮ່ວມມືໄວ້ເນື້ອເຊື່ອໃຈຂອງທຸກປະເທດເພື່ອນຄ້າ ແລະ ບັນດານັກລົງທຶນ. ທ່ານຮອງນາຍົກລັດຖະມົນຕີ ເວືອງດີງເຫວ້ ເນັ້ນໜັກວ່າ ຫວຽດນາມ ຂ່ຳນັບຮັບຕ້ອນ ແລະ ສ້າງເງື່ອນໄຂດີທີ່ສຸດໃຫ້ແກ່ບັນດານັກລົງທຶນ, ພິເສດແມ່ນບັນດານັກລົງທຶນມີເຕັກໂນໂລຢີດີ, ມີທັກສະການການຄຸ້ມຄອງດີ ແລະ ພິເສດແມ່ນບຸລິມະສິດໃຫ້ບັນດາວິສາຫະກິດທີ່ພ້ອມແລ້ວຈະເຊື່ອມຕໍ່ກັບວິສາຫະກິດ ຫວຽດນາມ ແລະ ເໝາະສົມກັບນະໂຍບາຍສ້າງໂຄງປະກອບພື້ນຖານເສດຖະກິດຂອງ ຫວຽດນາມ ຄືນໃໝ່.