(vovworld) - ຕອນບ່າຍວັນທີ 11/01, ທີ່ການຕ້ອນຮັບທ່ານປະທານກຳມາທິການການຕ່າງປະເທດ ແລະ ທ້ອນໂຮມຊາດແຫ່ງສະພາແຫ່ງຊາດສ.ເກົາຫຼີ Ahn Hoong Joon ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ, ທ່ານຮອງນາຍົກລັດຖະມົນຕີຫວຽດນາມ ຫວູດຶກດາມ ໄດ້ຕີລາຄາສູງບັນດາການເຄື່ອນໄຫວຮ່ວມມືລະຫວ່າງສະພາແຫ່ງຊາດ 2 ປະເທດ ໃນໄລຍະຜ່ານມາ. 2 ຝ່າຍໄດ້ປະຕິບັດບັນດາການເຄື່ອນໄຫວແລກປ່ຽນຄະນະຜູ້ແທນທຸກຂັ້ນເປັນປະຈຳ, ກໍ່ຄືແບ່ງປັນບັນດາບົດຮຽນໃນການຮ່ວມມືລະຫວ່າງ 2 ປະເທດ. ກ່ຽວກັບດ້ານການຄ້າ, ການລົງທຶນ, ທ່ານຮອງນາຍົກລັດຖະມົນຕີ ຫວູດຶກດາມ ຢືນຢັນວ່າ ຍາມໃດຫວຽດນາມ ກໍ່ສ້າງເງື່ອນໄຂດີທີ່ສຸດເພື່ອໃຫ້ບັນດານັກລົງທຶນສ.ເກົາຫຼີ ເຄື່ອນໄຫວຢ່າງຍາວນານຢູ່ຫວຽດນາມ. ທ່ານຮອງນາຍົກລັດຖະມົນຕີ ກໍ່ຂອບໃຈສະພາແຫ່ງຊາດສ.ເກົາຫຼີ ໄດ້ມີການເຄື່ອນໄຫວຫຼາຍຢ່າງເພື່ອປົກປ້ອງ ແລະ ໜູນຊ່ວຍປະຊາຄົມຊາວຫວຽດນາມ ທີ່ພວມດຳລົງຊີວິດຢູ່ສ.ເກົາຫຼີ. ທ່ານ Ahn Hoong Joon ໄດ້ຕີລາຄາສູງປະຊາຄົມຊາວຫວຽດນາມ ທີ່ພວມດຳລົງຊີວິດຢູ່ສ.ເກົາຫຼີ ໄດ້ມີການປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ, ສັງຄົມຂອງສ.ເກົາຫຼີ ໃນປະຈຸບັນ ແລະ ເນັ້ນໜັກວ່າ ໃນໄລຍະຈະມາເຖິງ, 2 ປະເທດຄວນສືບຕໍ່ເພີ່ມທະວີການຮ່ວມມືໃນບັນດາຂົງເຂດການສຶກສາ, ພັດທະນາເຕັກໂນໂລຊີຂໍ້ມູນຂ່າວສານກວ່າອີກ, ນີ້ແມ່ນບັນດາຂົງເຂດເຊິ່ງສ.ເກົາຫຼີ ມີທ່າແຮງ ແລະ ມີບົດຮຽນຫຼາຍຢ່າງເພື່ອສາມາດແບ່ງປັນກັບຫວຽດນາມ ໄດ້.