(vovworld) – ກອງປະຊຸມສະພາຂອງອົງການລັດຖະມົນຕີສຶກສາອາຊີຕາເວັນອອກສຽງໃຕ້ (SEAMEO) ຄັ້ງທີ 48 ໄດ້ໄຂຂຶ້ນໃນວັນທີ 7/5, ຢູ່ນະຄອນ Pattaya ຂອງ ໄທ. ທີ່ວາລະໄຂກອງປະຊຸມ, ທ່ານລັດຖະມົນຕີວ່າການກະຊວງສຶກສາ ແລະ ບຳລຸງສ້າງຫວຽດນາມ ຟ້າມວູ້ລ້ວນ, ປະທານສະພາ SEAMEO 47, ໃຫ້ຮູ້ວ່າ: ກອງປະຊຸມຄັ້ງນີ້ແມ່ນການເຄື່ອນໄຫວເພື່ອແນໃສ່ປະຕິບັດຄຳໝັ້ນສັນຍາຂອງບັນດາການນຳຂັ້ນສູງບັນດາປະເທດອາຊີຕາເວັນອອກສຽງໃຕ້ ໃນເລື່ອງຊຸກຍູ້ການສ້າງຕັ້ງປະຊາຄົມລວມ ອາຊຽນ ໃນປີ 2015. ໃນອາຍຸການເປັນປະທານຂອງຕົນ, ທ່ານລັດຖະມົນຕີ ຟ້າມວູ້ລ້ວນ ໄດ້ຮັບການຕີລາຄາວ່າ ໄດ້ປະຕິບັດສຳເລັດໜ້າທີ່ວຽກງານ ແລະ ປະຕິບັດບັນດາມະຕິເຊິ່ງສະພາໄດ້ຮັບຮອງເອົາຢູ່ກອງປະຊຸມ SEAMEO 47, ກໍຄືບັນດາທິດທາງທີ່ກຳນົດໃນການເຈລະຈາຍຸດທະສາດບັນດາລັດຖະມົນຕີ SEAMEO ຢູ່ ລາວເມື່ອເດືອນ 9/2014 ແລະ ກອງປະຊຸມໃຫຍ່ SEAMEO ເປັນຢ່າງດີ. ທີ່ວາລະປະຊຸມຄົບຄະນະຄັ້ງທຳອິດພາຍຫຼັງໄຂກອງປະຊຸມ, ທ່ານລັດຖະມົນຕີວ່າການກະຊວງສຶກສາ ແລະ ບຳລຸງສ້າງຫວຽດນາມ ຟ້າມ ວູ້ລ້ວນ ໄດ້ເປັນປະທານວາລະເລືອກຕັ້ງປະທານໃໝ່ຂອງ SEAMEO ແລະ ມອບຕຳແໜ່ງປະທານ SEAMEO ໃຫ້ທ່ານລັດຖະມົນຕີວ່າການກະຊວງສຶກສາໄທ ນະຣົງ ພິພັດທະນາໄສ.