ຫວຽດນາມສະໜັບສະໜູນ ເພີ່ມທະວີການຮ່ວມມືຍຸດທະສາດອາຊຽນ - ອິນເດຍ
(ພາບປະກອບ)
(vovworld) - ຕອນບ່າຍວັນທີ 20/02, ການເຈລະຈາປະຈຳປີລະຫວ່າງອິນເດຍ - ສະຫະສະມາຄົມປະຊາຊາດອາຊີຕາເວັນອອກສຽງໃຕ້ (ASEAN) ຄັ້ງທີ 5 ໄດ້ອັດລົງຢູ່ New Delhi. ໃນຂອບເຂດການເຈລະຈາ, ທ່ານຮອງລັດຖະມົ ນຕີການຕ່າງປະເທດຫວຽດນາມ ຟ້າມກວາງວິງ, ຫົວໜ້າຄະນະຜູ້ແທນຫວຽດນາມ, ໄດ້ມີບົດກ່າວປາໄສສຳຄັນ ຕີລາຄາສູງການຮ່ວມມືຍຸດທະສາດລະຫວ່າງອາຊຽນ - ອິນເດຍ ໃນທຸກຂົງເຂດ. ທ່ານຮອງລັດຖະມົນຕີການຕ່າງປະເທດ ຟ້າມກວາງວິງ ຢືນຢັນວ່າ ຫວຽດນາມ ສະໜັບສະໜູນເພີ່ມທະວີການຮ່ວມມືຍຸດທະສາດອາຊຽນ - ອິນເດຍ ໃນທຸກຂົງເຂດຍິ່ງກວ່າອີກ. ອາຊຽນ ຕີລາຄາສູງບົດບາດຂອງອິນເດຍ ແລະ ນະໂຍບາຍ “ມຸ່ງໄປສູ່ທິດຕາເວັນອອກ” ຂອງອິນເດຍ ທີ່ມີຕໍ່ເຂດອາຊີຕາເວັນອອກສ່ຽງໃຕ້. ອາຊຽນ ປາດຖະໜາວ່າ ອິນເດຍ ຈະສືບຕໍ່ສະໜັບສະໜູນ ແລະ ໜູນຊ່ວຍຂໍ້ລິເລີ່ມຮ່ວມສຳພັນພາກພື້ນ ກໍຄືການຮ່ວມມືໃນພາກພື້ນແມ່ນ້ຳຂອງ - ແມ່ນ້ຳຄົງຄາ; ມານະພະຍາຍາມຊຸກຍູ້ການເຈລະຈາ, ການຮ່ວມມື, ສ້າງຄວາມໄວ້ເນື້ອເຊື່ອໃຈ, ໂດຍສະເພາະແມ່ນພ້ອມກັນສ້າງໂຄງປະກອບການຮ່ວມມືໃນພາກພື້ນ ເພື່ອແນໃສ່ຮັບປະກັນສັນຕິພາບ, ສະຖຽນລະພາບ ແລະ ການຮ່ວມມືພັດທະນາໃນພາກພື້ນໃຫ້ດີກວ່າ, ໃນນັ້ນມີບັນຫາຮັບປະກັນຄວາມສະຫງົບປອດໄພ ແລະ ຄວາມປອດໄພໃນການເດີນທະເລໃນທະເລຕາເວັນອອກ. ທ່ານຮອງລັດຖະມົນຕີການຕ່າງປະເທດ ຟ້າມກວາງວິງ ປາດຖະໜາວ່າ ບໍ່ພຽງແຕ່ບັນດາປະເທດອາຊຽນເທົ່ານັ້ນ ຫາກບັນດາປະເທດອື່ນໆ ໃນນັ້ນມີອິນເດຍ ຈະໃຫ້ການສະໜັບສະໜູນຄວາມມານະພະຍາຍາມລວມຂອງອາຊຽນ ແລະ ບັນດາປະເທດທີ່ກ່ຽວຂ້ອງເພື່ອແນໃສ່ຮັບປະກັນສັນຕິພາບ, ສະຖຽນລະພາບ, ຄວາມສະຫງົບປອດໄພ, ຄວາມປອດໄພໃນການເດີນທະເລຢູ່ທະເລຕາເວັນອອກອີກດ້ວຍ.